23 DAVID
Jatunbacha runahuanmi macanajurca
DAVIDCA Elá pamba chimba ladopi shuj runa shayajujtami ricurca. Chai jarica Goliat shutimi carca. Paica jatun jatun, shinllipacha runami carca. Cazi 3 metros altomi carca. Shinaca paipa ayudanteca paipa ladopica uchillapachami ricurishcanga. Gentecunaca cai jatun jatun runata ricushpaca ninandami manllarin carca. Shinapash Davidca Goliatta ricushpaca na manllarishpami na manllaj cashcata ricuchirca.
Asha tiempo jipaca Jehová mandashcashnami Samuelca Davidtaca Israel llactapi cati rey cachun agllarca. Chai punllamandapachami Jehovapa espíritu santo Davidtaca importante, jatun ruraicunata rurachunmi ayudarca. Chaimi gentecunaca David Israel llactamanda soldadocunahuan tandanajushpa macanajungapaj yapa joven cajpipash Davidtaca ‘alipacha macanajunata yachaj, na manllajmi canʼ nishpa rijsirca. Shuj punllaca Davidpa taita Jeseca Davidpa huauquicuna imashina cashcata ricuchunmi paitaca macanajuna pushtuman cacharca. Davidpa huauquicunaca Israelmanda soldadocunami carca. Chai tiempopica Davidca 20 huatagutallapash na charishcangachu.
David Elá pambaman chayashpaca israelita soldadocuna shuj ladopi, cutin filisteo soldadocuna caishuj ladopi cashcatami ricurca. Israelitacunaca Goliathuan, caishuj filisteocunahuanbash macanajunataca ninandami manllanajurca. Israelita soldadocunapash, filisteo soldadocunapash huaquin semanacunatami chashna na macanajushpalla shuyanajushcarca. Chaipimi Davidca Goliat israelitacunamanda imashina burlarijujta uyarca. Shina rurashpaca yanga dioscunata adoraj cai runaca Jehová Diosmandami burlarijurca. Chaimandami Davidca ninanda culirarca. Davidca Goliatmanda, shinallata Goliatta huañuchishpa saquij runaman rey Saúl imata caranatami soldadocunata tapuchi callarirca. Shinapash Davidpa huauqui Eliabca David macanajuita ricungapalla shamushcata pensashpami paitaca shinllita rimarca. Pero Davidca chai jatun jatun runahuan macanajuchunmi soldadocunata animashpa catirca.
Rey Saulca David ima nishcata yachaj chayashpaca paita apamuchunmi cacharca. Davidca reyta animangapaca: “Goliattaca nipipash na manllanachu can” nircami. Shinallata: “Ñucami paihuan macanajungapaj llujshisha” nishpami ofricirirca. David huañuchi tucunata seguro cashpami Saulca Goliathuan macanajuchunga na munarca. Shinapash Davidca: “Ñuca taitapa llamacunata shuj león y shuj oso micungapaj munajpica paicunata huañuchichunmi Jehová Diosca ayudahuarca” nircami. Shina nijpica Saulca Davidtaca “rilla” nircami. Shinallata Davidmanga macanajungapaj paipa ropata, paipa espadatapashmi curca. Shinapash Davidpaca chai churajuna y chai espadaca yapa jatun, yapa llashami carca. Chaimi Davidca chai cosascunata llujchishpa paipa vara caspihuan, paipa huaracahuanllami quidarca.
Davidca pambata rijushpami shuj larcamanda picha llambu rumicunata japirca. Chai jipaca macanajuna pushtuman rishpami paipa jatun jatun contrapaman quimirirca. Goliatca Davidta ricushpaca “shuj caspihuan” macanajungapaj shamushcamandami paimanda burlarirca. Davidca paipa huaracataca ali alimi utilizaita usharca. Shinapash Goliatca David shuj huaracata charishcataca talvez na ricushcangachu. Goliatca “paipa yanga dioscunapa shutipimi Davidtaca maldicirca”. Shinallata Davidmanga: “Canda huañuchishpami, canba aichata angacunaman y sacha animalcunaman cusha” nircami.
David joven cashpaca Jehová Diospa shutita difindingapami shuj jatun jatun contrahuan macanajurca
Davidca: “Canga ñucahuan macanajungapaca shuj espadahuan y ishcai lanzacunahuanmi shamujungui. Pero ñucaca Tucuilla Angelcunata Mandaj Jehová Diospa shutipimi canhuan macanajungapaj shamujuni. Canga Taita Diospa israelita soldadocunamandami burlarishcangui” nishpami contestarca. Chai shimicunahuanmi Davidca imamanda na manllashcata ricuchirca. Davidca Goliat paita yali jatun cashcataca na pensarijurcachu. Chaipa randica, Jehová Dioshuan ricushpaca Goliat uchillapacha cashcatami pensarirca. Shinaca Davidca Goliatta huañuchinata, shinallata filisteocuna chai macanajuita na mishai ushanataca alimi yacharca.
Davidca paipa contrapaman calpashpami quimirirca. Paipa bolsomanda shuj rumita japishpami huaracapi churashpa muyuchi callarirca. Goliatca David shuj huaracata charishcataca chaipimi cuenta japishcanga. Shinapash ñana imatapash rurai usharcachu. David chai rumita cacharijpica rumica Goliatpa frentepimi clavarirca. Goliatca ‘uraisingami urmarca’. Davidca calpashpa rishpami chai filisteopa espadata llujchishpa paipa umata cuchushpa saquirca. Chaita ricushpaca israelita soldadocunaca ñana manllanajurcachu. Paicunaca caparishpami filisteo soldadocunata atacarca. Chai macanajuita mishanaca israelitacunapaca importantepachami carca. Davidpa ejemploca israelitacuna ama manllachunmi ayudarca. Cunan punllacunapipash paipa ejemploca ama manllachunmi ayudashpa catin.
Bibliapi ima nijta liipai
¿Imatata nipanguiman?
Davidca ¿imashinata na manllashcataca ricuchirca?
Ashtahuan informacionda mascapai
1. ¿Davidpa maijan punda familiacunata na manllaj cashcata ricuchirca? (Mat. 1:5, 6; Luc. 3:31-38; w12 1/10 24 párr. 2).
2. Cai historia cierto cashcataca ¿imashinata yachapanchi? (wp16.5 13). A
Collection the Israel Antiquities Authority. Photo © The Israel Museum, by Meidad Suchowolski
Foto A: Más o menos 2 mil 800 huatacuna huashamanda cai rumipica “Davidpa familia” escribishcami tiajun.
3. David joven michij caj tiempopica ¿imashinata paipa causaica carca? (w11 1/9 27, 28). B
Todd Bolen/BiblePlaces.com
Foto B
4. Huaquingunaca ¿imatata Davidmandaca pensarca? (w21.03 3 párr. 6; it “Eliab” núm. 4 párr. 1).
Imata yachajushcapi pensaripai
Davidpa ejemploca ¿imashinata ayudaita ushan...
... manllaihuan cajpi? C
Foto C
... nali munaicunata charijpi?
Na manllashcata ricuchishpaca ¿imashinata shujcunata ayudaita ushapangui? (1 Sam. 17:50-53).
¿Imashinata Davidpa ejemplota catishpa na manllashcata ricuchita ushapangui?
Ima pasashcapi pensaripai
Cai historiaca Jehová Diosmandaca ¿imatata yachachihuan?
Cai historiaca Jehovapa voluntadhuan y Bibliapa temahuanga ¿imatata ricunata charin?
David causarijpica ¿imatata paita tapungapaj munaiman?
Ashtahuan yachajupai
Huahuacunapa cai cancionbica David imamanda na manllashcata yachajupai.
Huauquicunaca shujcuna paicunata respetachun munashpaca ¿imatata ruraita ushan?
“Jovenguna, cangunapi confiachunga ¿imatata rurana canguichi?” (w21.03 2-5 párrs. 1-11)