David y Goliat

Jehová Diosca Samueltaca: Jesé runapa huasiman ri. Chaipimi ‘paipa churicunamanda shuj reyta agllashcani’ nircami. Chaimi Samuelca Jesepa huasiman rishpa, paipa punda churita ricushpaca ‘Diosca paitami rey cachun agllashcanga’ yarca. Shinapash Jehová Diosca Samueltaca paitaca na agllashcanichu. Ñucaca gentecunashnaca na ricunichu. Gentecunaca ñavitallami ricun. Pero ñucaca gentecunapa shungutami ricuni nirca.

Jesé runaca paipa 6 churicunatapashmi Samuelman ricuchirca. Chaimi Samuelca: “Jehová Diosca paicunamandaca ni maijandapash na agllashcachu ¿caicunallachu quiquinba churicuna capan?” nishpa tapurca. Shina nijpimi Jeseca: “uchilla huambragu faltapanrami. Paica llamacunatami michijupan” nirca. David ‘chayamujpimi Jehová Diosca Samueltaca: paimi can. Paitami rey cachun agllashcani. Jatarishpa, paipa umapi aceiteta talishpa javilla’ nirca. Shinami Davidtaca Saulpa randi israelitacunapa rey cachun agllarca.

Asha tiempo jipaca israelitacunaca filisteocunahuanmi macanajunajurca. Filisteocunaca shuj jatun macanajuj Goliat shuti runatami soldadopurapica charirca. Cada punllami Goliat runaca: Cangunapuramanda shuj jarita ñucahuan macanajuchun agllaichi. Pai ñucahuan macanajushpa ñucata vincijpica, ñucanchicunaca cangunapa sirvientecunami tucushun. Pero si ñuca vincishpa gananica, cangunami ñucanchipa sirvientecuna tucunguichi nishpami israelitacunamanda burlarishpa caparijurca.

Davidpa huauquicunaca soldadocuna caimandami, chaishuj soldadocunandi carpacunapi tandanajushca carca. Chaimi Davidca paipa huauquicunaman micunata apashpa rijurca. Chaipimi Goliat runa israelitacunata caparijujta uyashpa Davidca: “Ñuca amolla, ñucami paihuan macanajungapaj llujshisha” nirca. David shina nijpimi rey Saulca: “Canga huambrarami cangui. Chai filisteota vincitaca na ushanguichu” nirca. Chaimi Davidca Jehová Diosmi ñucataca ayudahuanga nirca.

Shina nijpimi ‘Saulca paipa macanajuna ropata Davidmanga churachirca’. Shinapash Davidca “caicunata churajushpaca” na macanajuita ushashachu nirca. ‘Chai jipami 5 llambu rumicunata huaicumanda japingapaj rirca. Chai rumicunataca bolsopimi churarca. Chai jipami huaracata paipa maquipi chariria Goliatpaman rirca’. Goliat Davidta ricushpaca cashnami caparirca: “Shamuyari, candaca huañuchishpami canba aichataca angacunaman y sacha animalcunaman cusha” nircami. Davidca na manllashpami cashna nirca: “Canga ñucahuan macanajungapaca shuj espadahuan y ishcai lanzacunahuanmi shamujungui. Pero ñucaca Jehová Diospa shutipimi canhuan macanajungapaj shamujuni. Jehová Dios ñucanchita salvangapaca espadacunatapash, lanzacunatapash na minishtinllu. Paimi tucui cangunataca ñucanchi maquipi entreganga”.

Chai jipaca Davidca chai rumita paipaj huaracapi churashpami, Jehová Diospa ayudahuan chai filisteo runapa frentepi huashajujta shitarca. Chaimandami chai runaca huañushpa alpaman urmarca. Chaita ricushpami filisteocunaca paicunata ama huañuchichun calpanajurca. Davidca Jehová Diospimi confiarca. Quiquinbash ¿David cuendachu Jehovapi confiangui?