Noeca shuj arcatami rurarca

Tiempohuanga ashtaca ashtaca gentecunami cai alpapica tiai callarirca. Ashtaca gentecunaca nali, millaicunami tucurca. Huaquin angelcunapashmi nali, millaicuna tucurca. Chai angelcunaca jahua cielopi causaita saquishpami cai alpaman shamurca. Chai angelcuna ¿imapa shamushcata yachanguichu? Paicunaca cai alpapi huarmicunahuan cazarangapaj munashpami, jahua cielomanda cai alpaman shamurca.

Chai angelcunaca cai alpapi huarmicunahuanmi huahuacunata charirca. Chai huahuacuna viñashpaca millai nalicunami tucurca y gentecunata llaquichirca. Ama shina catichunmi Jehová Diosca Ninan Manllanai Tamiahuan chai nali gentecunata tucuchigrijurca.

Shinapash Noé shuti jariguca na chai gentecunashna carcachu. Paica tucui shunguhuanmi Jehová Diosta juyarca. Noeca paipa huarmiguhuanga quimsa churicunatapashmi charirca. Sem, Cam y Jafet shuticunami carca. Noepa churicunaca cazadocunami carca. Jehová Diosca Noetaca shuj arcata rurachunmi mandarca. Chai arcaca caspihuan rurashca yacupi huambunalla shuj jatun caja cuendami carca. Chai arcapimi Noepash, paipa familiapash Ninan Manllanai Tamiamanda salvari ushana carca. Shinallata Jehová Diosca animalcunapash salvarichunmi ashtaca animalcunata chai arcaman yaicuchichun mandarca.

Noeca uchallami chai arcata rurai callarirca. Noepash, paipa familiapash casi 50 huatacunapimi arcata ruraitaca tucuchirca. Jehová Dios mandashca shinami chai arcataca rurarca. Chai huatacunapica Noeca gentecunamanga Ninan Manllanai Tamia tiagrinmi nishpami villachirca. Shina villajpipash nipi na cazurcachu.

Ñami arcaman yaicuna tucurca. Jipaman ¿ima pasashcata yachangapaj munanguichu?