¿Noepa punllacunapica ciertopachachu shuj Diluvio tamiaca tiarca o yanga cuentollachu can?
Bibliapica caitami yachachin
Ninan Manllanai Tamia o Diluvioca ciertopachami tiarca. Nali gentecunata tucuchingapami Taita Diosca ninanda tamiachirca. Ashtahuangarin, ali gentecuna y animalcunapash salvarichunmi, Taita Diosca Noetaca shuj arcata rurangui nirca (Génesis 6:11-20). Bibliapimi shuj Ninan Manllanai Tamia tiashcataca nijun. Bibliaca, ‘Taita Dios escribichishca shimi, tucuillami paipa yuyaicuna can’. Bibliapi nijushcamandami, Ninan Manllanai Tamia tiashcataca seguro capanchi (2 Timoteo 3:16).
¿Ciertopachachu tiarca o cuentollachu can?
Bibliapica Noé tiashcata, Ninan Manllanai Tamia tiashcatapashmi parlajun. Shinaca Noepa tiempopi tiashca Diluvio tamiaca ciertopachami tiarca, na shuj cuentollachu can.
Bibliata escribishca gentecunaca, Noé ciertopacha tiashcatami crirca. Por ejemplo, Esdras y Lucasca alipachami investiganata yachan carca. Israel llactapa punda familiacunamanda parlashpaca, Noemandapashmi paicunaca parlarca (1 Crónicas 1:4; Lucas 3:36). Evangelio librocunata Mateo y Lucas escribinajushpaca, Noepa punllacunapi Ninan Manllanai Tamiamanda Jesús imata nishcatami escribirca (Mateo 24:37-39; Lucas 17:26, 27).
Profeta Ezequiel y apóstol Pablopash Noeca shinlli fetami charirca, alita rurajmi carca nishpami escribirca (Ezequiel 14:14, 20; Hebreos 11:7). Si Noé nunca na tiashca cajpica ¿Noeca shinami carca shina nishpa escribinajunmanlla carca? Noepash, Bibliapi shuj huarmigucunapash y jaricunapash Taita Diosta ali sirvishpami shuj alipacha ejemplota ñucanchimanga saquirca. Paicuna ciertopacha tiashcamandami paicunapa ejemplotaca cati ushapanchi (Hebreos 12:1; Santiago 5:17).
Bibliapica ashtaca cosascunatami Ninan Manllanai Tamiamandaca nin. Cuentocunaca “había una vez...” o “punda tiempocunapica... tiashca nin” nishpami callarin. Pero Ninan Manllanai Tamiamanda parlashpaca, Bibliapica na shina nishpachu callarin. Ashtahuangarin, Diluvio tamiahuan ricunata charij huaquin cosascuna ima huatapi, ima quillapi, ima punllapi pasashcatami villan (Génesis 7:11; 8:4, 13, 14). Shinallata Noé rurashca arca ima medidacunata charishcatapashmi Bibliapica villajun (Génesis 6:15). Chaicunata ricushpami Ninan Manllanai Tamiaca ciertopacha tiashcata y na solo shuj cuentolla cashcata yachapanchi.
¿Imamandata Taita Diosca Ninan Manllanai Tamiata cachamurca?
Bibliapica, Ninan Manllanai Tamia nara tiashca punllacunapica ‘cai alpapi gentecunaca ashtahuan ashtahuan nalicunami tucunajurca’ nishpami villan (Génesis 6:5). Gentecunaca millai millaicunami carca, shuj shujhuanmi relaciones sexualesta charin carca. Chaimandami “Taita Diosca cai alpa huaglishca cashcata” ricurca ninmi (Génesis 6:11; Judas 6, 7).
Bibliapi nishca shinaca, nali angelcunapa culpamandami, cai alpapi causaica ashtahuan huaglishca nin. Chai nali angelcunaca cai alpapi huarmicunahuan relaciones sexualesta charingapami cai alpamanga urai shamushca nin. Chai angelcuna charishca huahuacunatami nefilimguna nin carca. Chai nefilimgunapa culpamandami ashtaca llaquicuna tiarca (Génesis 6:1, 2, 4, nota). Chaimi Taita Diosca tucui nali ruraicunata tucuchishpa, ali gentecunamanga cutin shuj mushuj ali causana oportunidadta cungapaj decidirca (Génesis 6:6, 7, 17).
¿Ninanda tamianataca gentecunaca yacharcachu?
Ari yacharcami. Taita Diosca Noemanga ima pasanataca villarcami. Shinallata, paipash, paipa familiapash y animalcunapash salvarichunmi Taita Diosca shuj arcata rurachun Noetaca mandarca (Génesis 6:13, 14; 7:1-4). Noeca gentecunamanga ima pasanataca villarcami. Pero nipipash na uyarcachu (2 Pedro 2:5). Bibliapica ninmi: “Ninan Manllanai Tamia chayamushpa tucuillata tucuchingacamanmi, chai gentecunaca na cuenta japishpa shina causanajurca” (Mateo 24:37-39).
Noé rurashca arcaca ¿imashinata carca?
Noé rurashca arcaca shuj baúl o caja cuendami carca. 133 metros de largo, 22 metros de ancho y 13 metros de altomi carca.a Arcaca ali caspicunahuan rurashca, canllamanbash y ucumanbash breahuanshnalla pintashcami carca. Quimsa pisomi carca y tauca cuartocunatapashmi charirca. Arcapa shuj ladomanga pungumi tiajurca. Cutin jahua ladomanga, largomanmi shuj ventana cuenda tiajushca yarin. Shinallata yacu calpachunga, chaupipica bajada cuendaguta rurashca shuj techotami charishca yarin (Génesis 6:14-16).
Noeca ¿mashna tiempopishi arcataca rurai tucuchirca?
Bibliapica mashna tiempopi arcata Noé rurai tucuchishcataca na villajunllu. Pero ashtaca huatacunapimi tucuchishca yarin. Noeca ña 500 yali huatacunata charijpimi paipa primer churica nacirirca. Y Noé ña 600 huatacunata charijpimi Ninan Manllanai Tamiaca urmamurcab (Génesis 5:32; 7:6).
Taita Diosca, Noepa quimsandi churicuna nacirishcamanda, más o menos 50 o 60 huatacuna jipami, Noetaca shuj arcata rurai nishpa mandarianga. Arcata rurai nishpa mandangacamanga, Noepa churicunaca ñami viñarianga y ñami cazarariangapash (Génesis 6:14, 18). Shina cashca cajpica, Noeca 40 o 50 huatacunapimi arcataca rurashpa tucuchirianga.
a Bibliapica arcapa medidacunamanda parlashpaca, mashna codocuna cashcatami nin. Hebreocunapa medidapica shuj codoca 44,45 centimetrocunatami mindin cashca nin (Nuevo Diccionario Bíblico, primera edición, página 1089).
b Noé y punda tiempopi shuj gentecunapash mashna huatacunata causashcata yachangapaj munashpaca, La Atalaya del 1 de diciembre de 2010pi llujshishca “Los personajes bíblicos: ¿de veras vivieron tanto?” nishca temata ricupangui.