Ochopuracunami salvarirca

Noeca paipa familiahuan y ashtaca animalcunahuanmi arcamanga yaicurca. Jehová Dios arcapa punguta vichashca jipami tamiai callarirca. Shina ushashcata tamiajpimi arcaca yacupi huambui callarirca. Asha ashami alpa enterota yacuca quilparca. Arcaman na yaicushca gentecunaca tucuillami huañurca. Shinapash Noé, paipa familiapash arca ucupi caimandami salvarirca. Pensaripai, Jehová Diosta cazushcamanda salvarishpaca ¿imashinashi paicunaca sintirirca?

40 punllacunata, 40 tutacunata tamiashca jipami tamiaca yalirca, yacuca asha asha chaquishpa catirca. Shinami chai arcaca shuj jatun urcu jahuapi quidarca. Shinapash ashtaca yacu tiashcamandami Noepash, paipa familiapash arcamandaca nara llujshi usharca.

Noepash, paipa familiapash shuj huata yalitami arca ucupi carca. Shinallata punllandimi yacuca asha asha chaquirishpa catirca. Chai jipami Jehová Diosca arcamanda llujshichilla nirca. Paicunapaca tucuimi juyailla, mushuj causai carca. Shina salvashcamandami paicunaca ninanda agradicishpa, Jehová Diosman huaquin animalcunata rupachishpa shuj ofrendagutashna cararca.

Jehová Diosca Noepa ofrendataca ninandami alicachirca. Chaimi Jehová Diosca nunca más na cai alpapi tucuilla gentecunata y animalcunataca ashtaca yacucunahuanga tucuchishachu nishpa prometirca. Chai promesata yarichunmi cielopi shuj arcoirista ricuchirca. ¿Ima horapash shuj arcoirista ricushcanguichu?

Shinallata Jehová Diosca Noeta, paipa familiataca huahuacunata charishpa cai alpapi jundachunmi mandarca.