Moisesca Jehovatami adorarca

Jacobpa familia Egipto llactapi causanajujpipash paicunataca israelitacuna nishpami rijsin carca. Jacobpash, Josepash huañujpica shuj mushuj faraonmi mandai callarirca. Chai faraonga israelitacuna egipciocunata yali ashtahuan miranajujpimi manllarijurca. Chaimi israelitacunataca esclavo cachun churarca. Paicunataca ladrillocunata rurachun, pambapi shinllita trabajachunmi obligan carca. Egipciocuna nali tratajpipash israelitacunaca ashtahuanmi mirashpa catinajurca. Faraón chaita ricushpami tucuilla chaira nacirishca jari huahuacunata huañuchichun mandarca. Cutin huarmi huahuacunataca na huañuchinachu canguichi nishpami mandarca. Israelitacunaca ¿imashinashi sintirinajurca?

Shuj israelita Jokébed shuti huarmiguca shuj juyailla huahuagutami ungurca. Ama huañuchichunmi shuj canastagupi churashpa Nilo yacupi sucuscuna tiaj pushtupi pacashpa saquirca. Chai huahuapa pani Miriamga ima pasajta ricungapami chaipi quidarca.

Faraonba ushica Nilo yacupi armangapaj rishpami shuj canastapica shuj huahuagu huacajujta ricushpami llaquirirca. Chaimi Miriamga: “Canba randi cai huahuaguta chuchuchichunga ¿nachu shuj hebrea huarmiguta mascashpa carachun munapanguiman?” nishpa tapurca. Faraonba ushica ari cayagripailla nircami. Shina nijpimi Miriamga paipa mamata pushamungapaj rirca. Chaimi Faraonba ushica Jokébed huarmigutaca: “Cai huahuaguta apashpa ñucapa randi chuchuchipai, ñucaca pagashallami” nircami.

Jokébed huarmiguca chai huahuagu viñajpica faraonba ushipaman aparca. Faraonba ushica chai huahuataca Moisés shutita churashpami, paipa propio huahuatashna viñachirca. Moisesca faraonba ushipa churishna viñajuimandami ima munashcata charita usharca. Shinapash Moisesca Jehovataca nunca na cungarcachu. Paica israelita cashcataca alimi yacharca. Chaimi Jehovata sirvinata agllarca.

Moisés ña 40 huatacunata charishpami israelitacunata ayudangapaj munarca. Shuj punllaca Egiptomanda runa shuj israelita esclavota macajujtami ricurca. Shina ricuimandami Moisesca yapa shinllita huactashcamanda chai egipcio runata huañuchirca. Jipaca alpapi pambashpa saquirca. Faraón chaita yachaj chayashpaca Moisestaca huañuchingapami munarca. Chaimandami Moisesca pacajushpa Madián llactaman rirca. Chaipipash Jehová Diosca Moisesta cuidarcami.