Egiptota llaquichishca quimsa plagacuna

Israelitacuna esclavocuna cajpimi, egipciocunaca shinllita trabajachun obligan carca. Chaimi Jehová Diosca Moisés y Aarondaca faraonman cashna nichun cacharca: “Ñuca llactataca tandanajushpa desiertopi ñucata adorangapaj richunmi saquina cangui”. Shinapash, faraonga orgulloso caimandami cashna nishpa tigrachirca: “Chai Jehovaca ¿pita canyari? Ñucaca Jehovataca na rijsinichu y israelitacunatapash richunga na saquishachu”. Chai jipaca faraonga israelitacunataca ashtahuan shinllita trabajachunmi obligarca. Chaita ricushpami Jehová Diosca faraondaca 10 plagacunahuan llaquichigrijurca. Chaimi Jehová Diosca Moisestaca faraonba shunguca shinlli shinlli rumishna caimandami israelitacunata richunga na saquingapaj munan. Chaimi ñucaca río Nilo yacutaca yahuarman tigrachisha nircami. Moisesca Jehovata cazushpami faraonbaman rirca. Chaipica Aarón, Nilo yacuta paipa vara caspihuan huactajpi yacuca yahuarman tigrajta faraonga ricurca. Shinallata Nilo yacupi tiashca pescadocunapashmi huañurca. Yacupash ashnajujpimi Egipto llactapi causajcunaca na ufiai usharca. Shina ricushpapash faraonga israelitacuna richunga na saquircachu.

Siete punllacuna jipaca Jehová Diosca Moisestaca cutinmi faraonmanga cashna nichun cacharca: ‘Ñuca llactata na richun saquijpica canba tucui llactapimi sapocunata plagashna jundachun cachamugrini’. Shina nijpipash faraón runaca na cazurcachu. Chaimi Aarón paipa vara caspita jahuaman alzajpi Egipto llactaca sapocunahuan jundarca. Tucuicunapa huasi ucupi, camacunapi, micuna platocunapi, tucui ladocunapimi sapocunaca tiarca. Chai jipami faraonga Moisestaca: “Ñucata y ñuca llactata sapocunamanda salvachun Jehovata rogaichi. Ñucaca israelitacuna Jehovaman sacrificiocunata rurangapaj richunga saquishallami” nirca. Chaimi Jehová Diosca sapocunata huañuchirca. Egipciocunaca huañushca sapocunataca, caipi chaipimi mundunanajurca. Chai llactaca ninandami ashnajurca. Shinapash faraonga cutinmi israelitacunataca na richun saquirca.

Jipamanga Jehová Diosca Moisesmanga: “Aarondaca cashna ni: ‘Canba vara caspihuan alpata huactai. Chai polvo alpaca Egipto llacta enteropimi uchilla chuspigucunaman tigranga’” nirca. Shinami chai jamzi chuspicunaca tucui gentecunata picanajurca. Chaimi huaquin egipciocunaca faraonmanga: “Chaitaca Diospa poderhuanmi rurashca” ninajurca. Shina nijpipash faraonga israelitacuna richunga na saquircachu.