Egipto llactata llaquichishca último plaga

Moisesca faraondaca ñana tigramushachu nishpami rirca. Shinapash nara rishpallatami: “Egipto llactapica chaupi tutami tucuilla primer churicunami huañunga. Faraonba churimanda callarishpa hasta esclavapa primer churipashmi huañunga” nirca.

Jehová Diosca israelitacunataca: ‘Cangunapa familiacunamandaca maltun jatun llamata japishpa pascua punllapi huañuchinguichi’. ‘Llamapa yahuarhuanmi pungupa ishcandi lado caspicunapi y jahua caspipipash shuj señalta churana canguichi’. ‘Shinallata chai tutaca aichataca ninapi cusashpami, levadura illa tandata micuna canguichi’. Ashtahuanbash llujshingapaj listo cana capanguichi. Porque cai tutami cangunataca salvasha nircami. Israelitacunachaita uyashpaca ¿imashinashi sintirirca?

Ña chaupi tutaca Jehová Diospa shuj angelmi Egiptopi tucui huasicunata yalirca. Huasi pungu caspi na yahuarhuan javishca cajpica, chai huasipi punda churitaca huañuchircami. Shinapash huasi pungu caspi yahuarhuan javishca cajpica, chai huasipi punda churitaca na huañuchircachu. Egiptomanda familiacuna charij o pobre cajpipash paicunapa punda churicunaca huañurcami. Shinapash israelitacunapa punda churicunaca ni shujllapash na huañurcachu.

Faraonba punda churipashmi huañurca. Chaimandami faraonga ñana ushashpa Moisestapash, Aarondapash cashna nirca: ‘Caimanda llujshishpa rihuaichi. Canguna y chaishuj israelitacunapash ñuca llactamanda richi. Canguna nishcashna cangunapa llamacunatapash, cangunapa vacacunatapash apashpa richi’.

Chai tutaca luna llenami carca. Tucuilla israelitacunami familiapura tandanajushpa Egiptomanda llujshishpa rirca. Shinallata 600 mil jaricuna, ashtaca ashtaca huarmicuna, huahuacuna, huaquin na israelitacunapashmi Jehová Diosta adorangapaj paicunahuan rirca. Shinami israelitacunataca Jehová Diosca salvarca.

Jehová Dios israelitacunata salvashcata yaringapaca cada huatami maltun llamagupa aichataca ninapi cusashpami, levadura illaj tandahuan micuna carca. Chaitami pascua micuna nin.