Egipto llactata llaquichishca 6 plagacuna

Moisespash Aaronbash Taita Dios nishcata villangapaj rishpami faraondaca: ‘Ñucapa llactata na richun saquijpica, tábano chuspicunatami canba llactaman y canba huasicunamanbash cachasha’ nirca. Tábano nishcacunaca jatun chuspicunami carca. Chai chuspicunaca ninandami pican carca. Chai ashtaca ashtaca chuspicunami, ‘faraonba huasipi, paita sirvijcunapa huasicunapipash, tucuilla Egipto llactapimi ninanda jundanajurca’. Shinapash israelitacuna causanajuj Gosén llactapica ni shuj chuspillapash na tiarcachu. Cai plagapash, cati plagacunapash Egiptopi causajcunatallami llaquichirca. Israelitacunataca na llaquichircachu. Chaimi faraonga Moisestaca cashna rogarca: Cai chuspicunata anchuchichun Jehovata mañapai. Chaica israelitacunataca richun saquishallami nirca. Jehová Dios tucuilla chuspicunata anchuchijpipash, faraonga israelitacuna richunga na saquircachu. Paica chaita ricushpapash Jehová Diosta na cazushpa catirca.

Jehová Diosca Moisesmanga: ‘Faraon israelitacunata egiptomanda llushichun na saquijpica, canba tucui animalcunaca huañungrin’ nircami. Cayandi punllaca Jehová nishcashnami egipciocunapa tucuilla animalcunaca huañurca. Ashtahuangarin israelitacunapa animalcunaca ni shuj na huañurcachu. Shinapash faraonga terco shungu caimandami nimamanda na cazungapaj munajurca.

Chaimi Jehová Diosca Moisestaca cashna mandarca: Uchufata ishcandi maquihuan japishpa faraonba ñaupapi huairaman shitana cangui nirca. ‘Chai uchufami, ñutu alpa tucushpa tucuilla Egipto llactapi rigarirca. Shina rurajpimi, chupu tugyanalla caracha unguica gentecunata, animalcunatapash japirca’. Shinapash, cutinmi faraonga israelitacunataca na cachashachu nirca.

Jehová Diosca cutinmi Moisestaca faraonbaman cashna nichun cacharca: ‘¿Cridoyashpachu ñuca llactata richunga na saquingapaj munajungui? Cayapa cashna horastaca ninandapachami granizohuan tamiachigrini’. Chaimi cayandi punllaca Jehová Diosca “culun nichirca y granizohuan tamiachirca. Ninatapashmi alpamanga cachamurca”. Egipto llactapica, ima horapash na chashna tamiashcachu carca. “Granizoca Egipto pambacunapi ima tiashcacunataca tucuillatami tucuchirca. Gentecunata, animalcunata, jihuacunata, quirucunatapash tucuillatami tucuchirca”. Shinapash ‘Israelitacuna causanajushca Gosén pushtupica na granizohuan tamiarcachu’. Chaimandami faraonga: Caita tucuchichun Jehovata mañapai. Shina mañajpica israelitacunaca ringallami nirca. Shinapash ña chaicuna tucurijpica faraonga israelitacunataca na cacharcachu.

Chaimi Moisesca faraonmanga: “Granizo na tucuchishca plantacunataca saltamontecunami tucuillata micushpa tucuchinga” nircami. Ashtaca ashtaca langosta jurucunami Egipto llactapi quirucunapi ima verdellacunatapash, pamba jihuacunatapash tucuillata micushpa tucuchirca. Chaimandami faraonga Moisestaca: Chai langostacunata anchuchichun Jehovata cutin mañapai nirca. Shina mañajpimi Jehová Diosca chai langostacunataca anchuchirca. Shinapash faraonba shunguca ashtahuanmi shinlliyarca.

Chai jipaca Jehová Diosca Moisestaca: “Canba vara caspitaca jahua cieloman alzai” nircami. Shina rurajpimi “tucuilla Egipto llactaca quimsa punllata yanapacha yana tucurca”. Chaimi ni pipash na ricuita usharca. “Pero israelitacuna causanajushca pushtupica punchallami carca”.

Chaimandami Faraonga, Moisestaca: “Jehovata adorangapaj richi. Pero llamacuna y vacacunaca caipimi quidanga” nirca. Moisesca cashnami tigrachirca: ‘Ñucanchi animalcunatapash apashpami rishun. Ni shuj animaltallapash na saquishpaca rishunllu. Porque chai animalcunamanda ñucanchi Taita Dios Jehovata adorangapami utilizashun’. Chaita uyashpami faraonga ninanda culirashpa cashna caparirca: “Caimandaca rita rihuai. Si cutin shamunguica, candaca huañuchishpami saquisha” nirca.