Juanga Jesús shamunatami villachirca

Juanga Zacariaspa y Elizabetpa churimi carca. Jehová Diosca Juandami profeta shina utilizashpa Mesías shamunata gentecunaman villachun agllarca. Shinapash llactacunapi o sinagogacunapi villachinapa randica, desiertocunapimi villachijurca. Juanda ‘uyangapaca Jerusalenmanda, Judea llactamandapashmi’ ashtaca gentecuna shamunajurca. Juanga: Taita Diospa ñaupajpi ali cangapaca nali ruraicunata saquinami canguichi nircami. Shina villachijpimi ashtaca gentecunaca paipa pecadocunamanda arrepentirirca. Chaimi Juanga Jordán yacupi paicunataca bautizarca.

Juanga minishtirishca cosascunahuanllami causarca. Paica camello animalpa milmahuan rurashca ropatami churajun carca. Paica saltamonte jurucunata y sacha abejapa mielta micushpami causan carca. Gentecunaca Juanmanda ashtahuan yachangapami munarca. Chaimi jatun tucushca fariseocunapash, saduceocunapash Juanda ricungapaj rirca. Juanga paicunataca: Cangunaca arripintirishpa, cambianami canguichi. “Na cangunapaj shungupilla: ‘Abrahanmi ñucanchi taita’ ninajunachu canguichi”. Abrahanba huahuacuna cashpapash, Taita Diospa huahuacunaca na canguichichu nircami.

Ashtaca gentecunami Juandaca: Taita Diosta cushichingapaca ¿imatata rurana canchi? nishpa tapunajurca. Chaimi Juanga: “Ishcai churajunata charijcunaca ni shuj churajunata na charijcunamanmi shuguta carana can” nirca. ¿Imamanda shina nishcata yachanguichu? Juanga, gentecuna Taita Diosta cushichingapaca, shujcunata juyana cashcata yachachunmi munarca.

Shinallata impuestota cobrajcunatapash Juanga cashna nirca: “Leycunapi mandashca impuestocunatallami cobrana canguichi. Na imatapash mirachishpaca cobrajunachu canguichi” nirca. Shinallata soldadocunamanbashmi: “A la fuerzaca na pitapash culquita quichunachu canguichi. Llullacunahuanbash na pitapash juchachinachu canguichi” nircami.

Sacerdotecuna, levitacunaca Juanda ricungapaj rishpami: ¿Canga pita canguiyari? ninajurcami. Shina nijpimi Juanga: “Ñucaca profeta Isaías nishcashnami”, gentecuna Jehovaman quimirichun ayudajuni nirca.

Juan yachachishcataca gentecunaca ninandami gushtan carca. Juandaca tauca gentecunami Mesías cashcata o na cashcata yachangapaj munarca. Chaimi paica: “Ñucaca yacupimi bautizani. Cangunapurapica shuj runagumi tian. Paitaca na rijsinguichichu. Paica ñucapa jipami shamunga. Ñucaca paipa chaquipi churajushca sandaliata safaitallapash na miricipanichu”. ‘Paimi cangunataca, Diospa espíritu santohuan bautizanga’ nirca.