16 BARAC Y DÉBORA
“Quiquinhuanmi risha”
ISRAELITACUNACA shinlli punllacunapimi causanajurca. Paicuna Jehová Diosta na cazushcamandami Jehová Diosca cananeocuna y paicunapa shuj contracunapash paicunata llaquichichun saquirca. Chai punllacunapica Canaán llactapica Jabín shuti runami rey carca. Y paipa soldadocunataca Sísara shuti manllanayai, nalipacha runami mandajurca. Paicunaca macanajungapaca ruedacunapi jirruhuan rurashca cuchillocunatashna charij 900 carretacunatami charirca.
Sisarapa soldadocuna 20 huatacunata llaquichishcamandami israelitacunaca manllashpa causanajurca. Cai soldadocunaca shuj llactata atacashpaca joven huarmigucunata apashpami violan cashcanga. Chaimandami israelitacunaca ninanda manllan cashcanga. Chaimi ñangunapica pipash na purin carca. Pueblocunapash jichushcami quidarca. Mayoría israelitacunaca armacunata na charishcamandami na difindirita usharca.
Chai tiempopica Jehovapa profetisa Débora shuti na manllaj huarmigumi causarca. Gentecunaca difícil juiciocunata arreglangapami paipaman rin carca. Débora huarmiguta utilizashpami Jehová Diosca Barac runaguman imata ruranata ricuchirca. Jehová Diosca israelitacunata juzgachun, salvachunmi Baractaca agllarca. Pensaripashunchi: 10 mil soldadocunata tandachishpa paicunata Tabor lomaman pushachun Jehová Dios munashcata yachaj chayashpaca Barac runaguca ¿imashinashi sintirishcanga? Chaita rurashca jipaca Jehová Diosca Sísara runata y paipa soldadocunata mishachunmi Baracta ayudagrijurca.
Barac runaguca ¿shuj huarmi imata ruranata ricuchishcamanda culirashpa orgulloso cashcatachu ricuchirca? Na. Chaipa randica: “Débora rijpillami Tabor lomaman risha” nircami. ¿Shinlli feta na charishcamandachu shina nirca? Na. Jipamanga apóstol Pabloca shinlli feta charij jaricunamanda, huarmicunamanda parlashpaca Baracmandapashmi parlarca (Heb. 11:1, 2, 32). Barac runaguca Jehová Dios paita ayudachunmi munarca. Y Jehová Dios paipa llactata ñaupaman pushangapaj Débora huarmiguta utilizajushcataca Barac runaguca alimi yacharca. Chaimandami paita y paipa soldadocunata cumbachun Deborata mañashpaca shinlli feta charishcata ricuchirca. Deboraca na manllashpami Baractaca: “Quiquinhuanmi risha” nirca. Shinapash: “Sísara runataca ni can, ni shuj jaripash na huañuchingachu” nircami. Taita Diosca Sísara runata huañuchichunga shuj huarmitami utilizagrijurca.
Barac runaguca Jehová Dios mandashcataca uchallami pactachi callarirca. Israelitacuna ashalla armacunata charijpipash Barac runaguca 10 mil jaricunata tandachishpami macanajuchun prepararca. Paicunataca Tabor loma jahuamanmi pusharca. Chai lomaca cazi 600 metro altomi can. Shinallata Jezreel shuti pamba ladopimi can. Chai lomamandami Débora, Barac y paipa soldadocunapash Sisarapa soldadocuna macanajungapaj carretacunahuan shamunajujta ricui usharca.
Barac runaguca soldadocunata mandaj cashcamandaca paipa ricuipi ima ali cashcata pensashpami Sisarapa carretacuna Tabor lomaman chayamuchun shuyaita ushanman carca. Porque carretacunahuan vichaiman rinaca ashtahuan shinllimi can. Chaimi Baracpaca Sisarapa soldadocunata mishanaca ashtahuan fácil canman carca. Shinapash chai macanajuica na paipa cashcata, más bien Jehová Diospa cashcatami ali yacharca. Chaimandami Deborata utilizashpa Jehová imata nishcata cazushpa Barac y paipa soldadocunapash chai manllanayai carretacunapi contracunahuan macanajungapaca lomamanda uraiman calpashpa pugru pambapi macanajungapaj rirca.
Shuj juez y shuj profetisa huarmigumi shuj millai runapa y carretacunata charij ashtaca soldadocunapa contra shayarirca
Israelita soldadocunapaca chai macanajuitaca na mishai ushanashnallami ricurirca. Shinapash na manllashcata ricushpami Jehová Diosca paicunataca ayudarca. Jehová Diosca cananeo soldadocunatami pandachirca. Shinallata ushashcata tamiachijpimi macanajuj pushtupash turu turu tucurca. Chaimi chai carretacunaca turupi pambarishpa quidarca. Carretacunata ñana utilizaita ushashpami Sisarapa soldadocunaca carretacunamanda uriajushpa israelitacunahuan macanajuna tucurca. Sisarapa tucuilla soldadocunami huañurca. Chaipica Sisarahuanga ¿imata pasarca?
Sisaraca chai turu turu pambata calpashpami chaimanda llujshita usharca. Paica pailla salvaringapami paipa soldadocunataca jichushpa rirca. Shinapash Barac runaguca paita catishpami rirca. Jehová Diosca tucuitami ricujurca. Y Sísara huañuna cashcataca ñami decidishcarca.
Bibliapi ima nijta liipai
¿Imatata nipanguiman?
Barac y Deboraca ¿imashinata na manllashcataca ricuchirca?
Ashtahuan informacionda mascapai
1. Sísara runa llaquichijujpica israelitacunaca ¿imashinata causanajurca? (w15 1/8 12 párr. 6).
2. Samuel nara profeta tucujpillata Israel llactapica 12 juezcunami tiarca. ¿Imamandata huaquingunaca “Deboraca chai 12 juezcunapurapica na carcachu” nin? (w86 1/6 31 párrs. 6-8).
3. Deboraca ¿imamandata ‘israelitacunapaca mamashna’ carca? (Juec. 4:4, 5; 5:7; w15 1/8 13 párr. 1). A
Dibujo A
Dibujo A
4. Débora y Barac ‘estrellacunaca Sísara runahuanmi macanajurca’ nishpaca ¿imatata ningapaj munarca? (Juec. 5:20; w05 15/1 25 párr. 5).
Imata yachajushcapi pensaripai
¿Ima situaciongunapita shuj huauquica Barac runashnallata humilde cashcata ricuchishpa shuj panigupa ayudata chasquita ushan? B
Foto B
Débora huarmiguca Baracta cumbashpa ringapaca ¿imamandata na manllashcata ricuchina carca? ¿Ima pasajpita Débora huarmigushna na manllaj cashcata ricuchina capanchi?
¿Imashinata Barac y Deborapa ejemplota catishpa na manllashcata ricuchita ushapangui?
Ima pasashcapi pensaripai
Cai historiaca Jehová Diosmandaca ¿imatata yachachihuan?
Cai historiaca Jehovapa voluntadhuan y Bibliapa temahuanga ¿imatata ricunata charin?
Barac y Débora causarijpica ¿imatata paicunata tapungapaj munaiman?
Ashtahuan yachajupai
Jehová Dios ñucanchi rurashcacunata valichijta cai historiapi ricupai.
“Sirvina munaita charishpa Jehová Diosta alabashunchi” (w17.04 27-32)
Confianamanda, humilde canamanda y cazunamandaca Barac y Deborapa ejemploca ¿imatata yachachin?