‘Huarmicunapurapica alicachi tucushca cachun’

SÍSARA runaca ashtaca shinlli soldadocunata mandajmi carca. Shinapash paipa soldadocunata huañuchichun saquishpami Jezreel pambamanda pacajushpa rirca. Israelitacuna armacunata cazi na charishpa, chaquilla rishpapash 900 carretacunata charij paipa soldadocunata mishashcataca na crishcangachu. Pero cunanga Sísara runaca maipi pacajugrinatami mascajurca. Chaimandami quenitapuramanda Héber shuti runapa carpa huasiman pacajungapaj rirca.

Mayoría quenita gentecunaca Moisespa punllacunamandapachami israelitacunahuanga ali llevarin carca. Moisespa huarmica quenita familiacunapuramandami carca. Jaelpa punllacunapica quenitacunaca Israel llactapimi causanajurca. Héber runa quenita cashpapash chaishuj quenitacunamandaca diferentemi carca. Paica israelitacunapa lado tucunapa randica, Canaán llactamanda Jabín reytarami apoyarca. Y Sisaraca Jabinba soldadocunapa generalmi carca. Chaimandami, “Heberpa carpa huasipi pacajugrishallami” yashpa pensarca. Shinapash Heberpa huarmi Jael paipa cusashnallata na igual pensashpa israelitacunata difindinataca Sisaraca pensaitallapash na pensashcangachu.

Sísara carpaman chayajpica Heberca na chaipi cashcachu carca. Jael huarmillami chaipi cashca carca. Shinaca Sísara shamujujta ricushpaca Jaelca ñapashmi imata ruranataca pensarina carca. Jaelca Sísara pi cashcata, peligroso, nali runa cashcataca alimi yachashcanga. Jehová Diosca Deborata utilizashpami: “Sísara runataca shuj huarmimi huañuchinga” nishcarca. Shinapash Jaelca chaitaca na yachashcangachu. Pero Jehová Dios imata rurachun munashcataca alimi yachashcanga. ¿Imamandata shina nipanchi?

Porque Jehová Diosca Barac runagu Sísara runata imashina mishashcata ricuchingapami Débora huarmiguta shuj cancionda escribichirca. Chaj cancionbica: “Tucui huarmicunamanda yalica, quenita Héber runapa huarmi Jael shuti huarmigu ashtahuan bendiciashca cachun. Carpa huasicunapi causaj huarmicunamandaca pai ashtahuan bendiciai tucushca cachun” nijurcami. Huaquingunaca: “Jaelca nali, llulla huarmimi cashca” nishcami. Pero chaica na ciertochu can. Jaelca Rahab huarmigushnami na manllashpa contracunapa lado tucunapa randica, Jehovapa lado tucurca. Jaelca Sísara Jehovapa contra cashcata, Jehová Dios paita tucuchingapaj munashcataca alimi yacharca. Y Jaelca Jehová Dios munashcashnami Sísara runata huañuchina oportunidadta charirca. Chaitaca ¿imashinata rurai ushagrijurca?

Jaelca Sisarahuan macanajungapaj fuerzata na charishcataca alimi yacharca. Sisaraca ali macanajunata yachaj, shinlli soldadomi carca. Chaimandami Jael huarmiguca Sísara runataca carpa ucuman samachun yaicuchirca. Chaipimi shuj jatanahuan tapachirca. Chai jipaca Sísara yacuta mañajpica Jaelca yacupa randica, lechetami cararca. Shinallata Sisaraca Jaeltaca carpa pungupi chapashpa quidachunmi mandarca. Shinallata: “Pipash ‘¿shuj jari canba carpa huasiman yaicurcachu?’ nishpa tapujpica ‘na’ ninami cangui” nishpami mandarca. Chai jipami Sisaraca puñushpa quidarca.

Jaelca chai rato Sísara runata huañuchina cashcatami yacharca. Chaipimi shuj llashaj jatun mazota y shuj estacatapash japirca. Chai cosascunaca caspihuan rurashcami cashcanga. Jaelca chai herramientacunataca alimi utilizanata yachashcanga. Sisarata huañuchingapaca alilla, upallagumi quimirirca. Shinapash Jael na cuidadota charijpi Sísara rijcharishpaca paitarami llaquinaita huañuchinman carca. Pero Jaelca na pandarircachu. Chai estacataca Sisarapa umapimi ñapash tacarca. Chashnami Sísara runaca huañurca.

Jipamanga Barac runaguca Sisarata mascashpami chayarca. Jaelca paita tuparingapaj llujshishpa: “Shamupai. Quiquin mascajuj runata ricuchipasha” nircami. Barac carpa huasiman yaicushpaca Débora nishca profecía pactarishcatami ricurca. Deboraca: “Jehová Diosca shuj huarmipa maquipimi Sísara runataca entreganga” nishcarcami.

Barac y Deboraca israelitacuna contracunata mishashcamandami cushijushpa candarca. Chai candashcapica Jael huarmigutaca ninandami alicachinajurca. Bibliapica Jaelmandaca ñana cutin parlanllu. Shinapash 3 mil 200 huatacuna yalishcajpipash paipa ali ejemplomandami yachajushpa catita ushapanchi. Cunan punllacunapica Taita Diosta sirvijcunaca armacunahuan, imapash cosascunahuanga na macanajunachu capanchi. Shinapash cai nali mundo, Diablo y paipa demoniocuna ama pandachichunga shuj macanajuipishnami causanajupanchi. Chaimandami Jael huarmigushna na manllaj cashcata ricuchina capanchi.

Bibliapi ima nijta liipai

• Jueces 4:​9, 11, 17-22; 5:​24-31

¿Imatata nipanguiman?

Jaelca ¿imashinata na manllashcataca ricuchirca?

Imata yachajushcapi pensaripai

• Shuj panigu na Testigo cusata charishpaca ¿ima situaciongunapita Jael huarmigushnallata na manllaj cashcata ricuchina can?

  Respuesta

• Jaelca Débora huarmigushna na profetisa o Barac runagushna na soldado cashpapash paipa tucui usharishcagutami rurarca. Shinaca imatapash na rurai ushashpaca Jaelpa ejemplomandaca ¿imatata yachajupanchi? B

  Respuesta

  

• ¿Imashinata Jaelpa ejemplota catishpa na manllashcata ricuchita ushapangui?

  Respuesta

Ima pasashcapi pensaripai

• Cai historiaca Jehová Diosmandaca ¿imatata yachachihuan?

  Respuesta

• Cai historiaca Jehovapa voluntadhuan y Bibliapa temahuanga ¿imatata ricunata charin?

  Respuesta

• Jael causarijpica ¿imatata paita tapungapaj munaiman?

  Respuesta

Ashtahuan yachajupai

Jaelpa ejemplo shuj joven Testigo paniguta paipa crishcacunata difindichun imashina ayudashcata cai videopi ricupai.

Na manllashpa, shinlli tucushpa catijcuna cashunchi: Meroz llactamanda gentecunashna canapa randica, Jael huarmigushna cashunchi (1:40)

Jael huarmigushnami punda tiempocunapica ashtaca ali huarmigucuna tiashca. Paicunamanda yachajungapaca cai temata ricupai.

“Bibliapi parlashca huarmicunamandaca ¿imatata yachajunchi?” (ijwbq tema 161)