30 SAREPTA LLACTAMANDA VIUDA HUARMIGU
Shinllipacha tiempocunapi causashpapash na manllashcatami ricuchirca
SHUJ viuda huarmiguca paipa churiguhuanmi Sidón llactamanda Sarepta pushtupi causarca. Chai llactapi ashtaca tiempota na tamiashcamandami alpaca chaquishca chaquishca carca. Chaimandami plantagucuna na viñajpi gentecunaca imatapash micungapaca ashagutalla charirca. Israelitacunapa juyaj Taita Diosca viudagucuna, taita illa huahuagucuna ima minishtishcata charichunmi leycunata churashcarca. Shinapash cai viuda huarmiguca Israelpica na causarcachu. Pai causajushca llactataca Etbaal shuti runami mandarca. Etbaalca Astoret yanga huarmi diospa sacerdotemi cashcanga. Chai yanga diosta adorangapaca gentecunaca mapa, nalipacha cosascunatami ruran carca. Shinaca chai viuda huarmigupaca chai shinlli punllacunapi, chai nali gentecunapurapi causanaca shinllipachami cashcanga. Chai viuda huarmiguca: “Ñucapash, ñuca huahuagupash ¿imashi tucushun? Ayudata minishtijushcataca ¿pipash cuenta japinllu? Ñucamandaca ¿pipash preocuparinlla?” nishpami pensarishcanga.
Viuda huarmiguca paipash ama huañungapaj, paipa churigupash ama huañuchunmi micunaguta taringapaca ninanda esforzarirca. Shinapash micunagu cazi na tiaimandami paipash, paipa churigupash ña huañugrinajurca.
Viuda huarmiguca yanga dioscunata adoraj gentecunapa chaupipi causashpapashmi Jehová Diospica crirca. Chai huarmiguca shujcunamanda diferente cashcatami ricuchirca. Chaita ricushpami Taita Diosca paitaca juyarca. Cai huarmiguca Jehová Diosmandaca talvez imashapashmi yachaj chayashcanga. Jehovamanda yachajushca cashpaca Jehová paipa pueblota cuidangapaj imacunatalla rurashcamandami manllarishca cashcanga. Paica Jehová Dioslla ciertopacha Dios cashcatami yacharca. Cai huarmigu causashcamanda más o menos mil huatacuna jipaca Jesusca cai huarmigu shuj ali ejemplo cashcatami nirca. Shinallata cai huarmiguta Jehová Dios ayudashcatami parlarca. Shinapash cai huarmigutaca Jehová Diosca ¿imashinata ayudarca?
Jehová Diosca profeta Eliastaca Sarepta llactaman richunmi mandarca. Jehová Diosca chai chaquishca tiempopi shuj viuda huarmigu micunata carashpa ayudanatami Eliasmanga villarca. Profeta Elías Sarepta llactaman chayashpaca shuj huarmigu ninata japichingapaj yamdata tandachijujtami ricurca. Paita ricushpaca aligumanmi: “Ama shinagu cashpa ufiangapaj shuj vaso yacuguta carahuai” nishpa mañarca. Shina nijpica chai huarmiguca ¿imatata rurarca? Eliasta na rijsishpapash Bibliapica chai huarmiguca “yacuta apamungapaj” rishcatami villan. Cai huarmiguca Elías runagu Taita Diospa profetacunashna churajushcata ricushpa y aliguman parlajta uyashpami Taita Diosta sirvij runagu cashcata cuenta japishcanga. Jehová Diosca shuj viuda huarmigupaman richunmi Eliastaca cachashcarca. Chaimi Eliasca: “¿Cai huarmigupamanllu Jehová Diosca cachamuhuashca?” nishpa pensarishcanga. Chaita seguro cangapaca chai huarmigutaca: “Shuj tandaguta carahuai” nishpami mañarca.
Viuda huarmiguca Eliastaca: ‘Quiquinba Taita Diosca causajuj Diosmi’ nircami. Chai jipaca pai imashina causajushcatami villarca. Viuda huarmigu ‘quiquinba Taita Diosca causajuj Diosmi’ can nishpaca ‘causajuj Taita Diospi’ tucui shungu crishcatami ricuchirca (Jer. 10:10). Cai huarmiguca: “Tandataca na charipanichu. Jatun jarrapica maqui vali harinatallami charipani. Y uchilla jarrapica ashalla aceitetallami charipani” nishpami Eliasmanga villarca. Shinallata pai y paipa churigu imagutapash micungapaj ninata japichigrijushcatami villarca. Ashtahuanbash ‘chai ultimota micushca jipaca yarjaimanda huañushunllami’ nircami.
Viuda huarmigu y paipa churigu micungapaj cazi nimata na charishpapash paicuna charishca último micunagutami Jehová Diospa profetamanga cararca
Shina nijpimi Eliasca chai huarmigutaca: “Ama manllaichu” nirca. Viuda huarmiguca Elías chashna ninataca talvez na pensashcangachu. Porque micuna illaimandami paipa churiguca huañugrijurca. Chaimandami viuda huarmiguca manllaita charishcanga. Shina cashpapashmi Elías nijujta uyashpa catirca. Chaipimi Eliasca Jehová Dios paita imashina ayudanata villarca. Cai viuda huarmigu Eliasman shuj uchilla tandaguta rurashpa carajpica Jehová Dios bendiciana cashcatami Eliasca villarca. Jehová Diosca chaquishca tiempo tucuringacaman jarracunapi tiashca harina y aceitepash ama tucurichunmi ayudagrijurca.
Chaipimi viuda huarmiguca Jehová Diospi crishcata o na crishcata ricuchina carca. Viuda huarmiguca ¿paipa charishca último micunagutachu Jehová Diospa profetamanga caragrijurca? Viuda huarmiguca Jehová Dios paipa llactata cuidangapaj shuj shuj jatun milagrocunata rurashcataca talvez yachashcangami. Chai milagrocunahuan ricujpica paita y paipa churiguta cuidanaca Jehová Diospaca nima shinllica na carcachu. Shinaca viuda huarmiguca huañunata manllajushpapash ¿imatata rurarca? Bibliapica: ‘Elías nishcashnami rurarca’ nijunmi.
Jehová Diosca cai huarmigutaca ninandami bendiciarca. Shuj milagrota rurashpami Jehová Diosca jarracunapi tiashca harina y aceitepash ama tucurichun ayudarca. Shinami Elías, viuda huarmigu y paipa churigupash chaquishca tiempo tucuringacaman micunaguta chari usharca. Shinallata Jehová Diosca viuda huarmigumandaca shuj jatun milagrotapashmi rurarca. Cungashcapimi viuda huarmigupa churiguca irquiyashpa huañurca. Chaimi Jehová Diosca chai huahuata causachingapaca Eliasta utilizarca. Bibliapica shuj gente causarishcataca cai viajemi primera vez parlan. Cai milagroca viuda huarmigutaca na manllashpa catichunmi ashtahuan ayudashcanga. Viuda huarmigupa ejemplomanda y Jehová Dios rurashca milagromanda yachajushpami ashtaca millón gentecunaca na manllashpa, Taita Diospi crishpa ñaupaman catita ushashca.
Bibliapi ima nijta liipai
1 Reyes 17:8-24
¿Imatata nipanguiman?
Sarepta llactamanda viuda huarmiguca ¿imashinata na manllashcataca ricuchirca?
Ashtahuan informacionda mascapai
1. Sidón llactamanda gentecunaca ¿pitata adoran carca? Chai yanga diosta adorangapaca ¿imatata ruran carca? Israelitacunapash ¿imatata rurai callarirca? (it “Sidón, sidonios” párr. 6). A
Penta Springs Limited/Alamy Stock Photo
Foto A: Más o menos 3 mil 525 huatacuna huashamanmi cai Astoret nishca huarmi diospa imagendaca rurashcanga.
2. ¿Imamandata Etbaal runa rey Acabhuan familia cashcataca nipanchi? (it “Etbaal”).
3. Fenicia llactamanda gentecunaca Astoret o Astarté nishca yanga huarmi diostami adoran carca. Chai yanga diosta adorangapaj costumbrecunamandaca ¿ima costumbrecunatata cunangaman rurashpa catin? (g93 22/11 12, 13).
4. Viuda huarmigupa churi huañujpica chai huarmiguca Eliastaca: “¿Ñuca culpable cashcata yarichingapaj y ñuca churiguta huañuchingapachu shamushcangui?” nishpami tapurca. Viuda huarmiguca ¿imamandata shina nishcanga? (1 Rey. 17:18; w14 15/2 15 párrs. 4, 5). B
Dibujo B
Imata yachajushcapi pensaripai
Viuda huarmigu Baal nishca diosta adoraj gentepurapi causajpipashmi Jehová Diosca paimanda preocuparishcata ricuchirca. Caihuanga Jehová Diosmandaca ¿imatata yachajupanchi? Territoriomanda gentecunataca ¿imashinata ricuna capanchi? (Hech. 10:35).
Culqui faltalla causajushpaca Sarepta llactamanda viuda huarmigumandaca ¿imatata yachajuita ushapanchi? C
Foto C
¿Imashinata Sarepta llactamanda viuda huarmigupa ejemplota catishpa na manllashcata ricuchita ushapangui?
Ima pasashcapi pensaripai
Cai historiaca Jehová Diosmandaca ¿imatata yachachihuan?
Cai historiaca Jehovapa voluntadhuan y Bibliapa temahuanga ¿imatata ricunata charin?
Sarepta llactamanda viuda huarmigu causarijpica ¿imatata paita tapungapaj munaiman?
Ashtahuan yachajupai
Sarepta llactamanda viuda huarmigupaca Jehová Diospa ñaupapi ali ricurinami, cosascunata charinamandaca ashtahuan yali importante carca. ¿Imashinata paipa ejemplota catita ushapanchi?
“Taita Diospa ñaupapi ali ricurishpami para siempre causaita ushapashun” (w11 15/2 13-17)
Jehová Diosca ñucanchicuna paipi crishcata ricuchingapaj imapash uchilla cosasgucunata rurajtaca ricujunmi. Chaitaca ¿imashinata yachapanchi?
“Jehová Diosca ¿quiquinba rurashcagucunataca ricujunlla?” (w03 1/5 28-31)