34 EZEQUÍAS
‘Mandaj Diosmandaca na anchurircachu’
JUDÁ llactapica ali reycunaca huaquinllami tiarca. Ezequiasca nali rey Acazpa churi cashpapash shuj alipacha reymi tucurca. Paipa taita Acazca Judá llactapica yanga dioscunata adorachunmi gentecunata animarca. Shinallata Acaz runaca chai yanga dioscunata adorangapami paipa churicunamandaca shuj churita o huaquin churicunata ninapi rupachishcanga (2 Rey. 16:2-4; 2 Crón. 28:1, 3). Paipa taita chashna nalicunata rurajta ricushpa viñanaca Ezequiaspaca shinllimi cashcanga. Shinapash paipa taitashna nalitaca na rurarcachu. Ezequías 25 huatacunata charijpimi paipa taita Acazca huañurca. Chaipimi Ezequiasca mandai callarirca. Paica na manllashpami yanga dioscunata Judá llactamanda anchuchi callarirca.
Callaripica Ezequiasca Jerusalén llactapi Jehovapa templo huasitami arreglarca. Jehovapa templo huasimanda yanga dioscunata anchuchishca jipami sacerdotecunata, levitacunata templopi cutin sirvichun churarca. Shinallata Pascua fiestata tucuicunahuan celebrangapami Israel llactamanda 10 jatun familiacunatapash invitachun huaquin mensajerocunata cacharca. Huaquinguna burlarijpipash ashtacacunami chai invitaciondaca chasquirca. Ezequiaspa ejemplota catishpami Israel y Judá llactamanda gentecunaca yanga dioscunata tucuchirca. Jehová Diosca ashtaca huatacuna huashamanmi Moisestaca shuj bronce culebrataca rurachishcarca. Israelitacunaca chai culebratapashmi adoranajurca. Chaimi Ezequiasca chai culebratapash faquishpa tucuchirca.
Ezequiasca ashtaca huatacuna huashamandallatami israelitacuna llaquicunata charina cashcataca ali yacharca. Jehová Diosca Israel llactamanda 10 jatun familiacunata contracuna tucuchinataca cutin cutinmi villarca. Ezequías mandai callarishca jipallami Asiria llactamanda soldadocunaca Israel llactata macanajuipi mishashpa ashtaca israelitacunataca paicunapa llactaman aparca. Shinapash Judá llactahuanga ¿imata pasagrijurca? ¿Chai llactapashchu tucuchi tucugrijurca? Judá llactaca ashtaca viajecunatami Israel llactata yali ashtahuan nali cosascunata rurashcarca. Chaimi Jehová Diosca ashtaca viajecunata profetacunata cachashpa Judá llactapash llaquichi tucuna cashcataca villarca. Y Jehovapa nishcacunaca siempremi pactarin.
Asiriocunaca shuj shuj llactacunata mishashpami asha asha Judá llactamanga chayarca. Asirio soldadocunataca rey Senaqueribmi ñaupaman pushajurca. Chai difícil tiempocunapillatami Ezequiasca na jambirinalla unguihuanbash carca. Shinapash nara shuj huahuatallapash charircachu. Chaimi paipa mandana derechotaca pimanbash na saqui ushana carca. Shinaca Ezequías huañujpica Davidpa miraicunaca chaipimi tucurinman carca. Shinapash Ezequiasca Jehová Diosta ayudahuai nishpa mañajpimi Jehová Diosca paitaca jambirca. Jehová Diosca 15 huatacunata más causachun saquishpami Ezequiasta ninanda juyashcata ricuchirca. Shinapash Judá llactaca peligropirami carca.
Ezequiasca Jerusalén llactata cuidangapaj munaimandami chai llactata ama llaquichichunga rey Senaqueribmanga ashtaca culquita cacharca. Senaquerib chai culquita chasquishpapash paicunata llaquichinataca pensajurcarami. Jerusalén llactata ashtahuan cuidangapaca Ezequiasca shuj jatun pircatami shayachirca. Shinallata alpa ucuta shuj canalta rurashpami shuj ladomanda yacuta aparca. Shinami asiriocuna Jerusalén llactapi gentecunata na llujshichun saquijpipash yacuta charitaca ushagrinajurca. Shinallata Ezequiasca Jerusalén llactamanda gentecunata animangapami Jehová Dios maijan reycunatapash yali ashtahuan poderta charishcata yarichirca.
Ezequiasca Jerusalenda manllachingapaj munaj nali, shinlli contrahuanmi chimbapurana tucurca
Senaqueribca Jerusalenda na mishai ushashpami ashtahuan culirai callarirca. Chaimi Ezequiasta, israelitacunata manllachingapaca rabsaqué nishca shuj importante mensajerota Jerusalenman cacharca. Rabsaqué runaca Ezequiasmanda y Jehovamandami nalicunata rimashpa burlarirca. Shinapash Ezequiasca asiriocuna manllachichun saquinapa randica, paipa llactataca Jehovapi confiachunmi animarca. Ezequías na manllarijta ricushpami Senaqueribca paita manllachingapaca imata ruranata villashpa cartacunata escribishpa cacharca. Chaimi Ezequiasca chai cartacunataca Jehová Diospa templo huasiman apashpa Jehovaman ricuchigrirca. Shina rurashpaca Jehovapa maquipi tucuita saquijushcatami ricuchirca. Chaimi Jehová Diosca profeta Isaiasta utilizashpa cashna nichun cacharca: “Senaqueribca Jerusalén llactamanga na yaicungachu. Paipa soldadocunapash shuj flechatallapash na disparangachu” nircami. Chaita uyashpaca Ezequiasca ninandami cushijushcanga.
Chai tutaca Jehová Diosca asiriocunata tucuchingapaca shuj angeltami cacharca. Chai angelca 185 mil asirio soldadocunata shuj gulpimi tucuchirca. Cayandi punlla chai soldadocuna huañushcata ricushpaca Senaqueribca ¿imashinashi sintirishcanga? Paica pingai tucushpami paipa llactamanllata cutin tigrarca. Asha tiempo jipaca Senaqueribtaca Nisroc yanga diospa templopi cajpimi paipa churicunallata huañuchirca.
Jehová Diosca shuj jatun milagrota rurashpami Senaqueribpa maquimanda Ezequiasta y paipa llactatapash salvarca. Shinallata Ezequiasca paipa unguimanda sanoyashpami jipaca shuj jari huahuaguta charirca. Shinapash shuj tiempopi orgulloso tucujpimi Jehová Diosca consejarca. Chaimi paica pandarishcata cuenta japishpa Jehovapa consejota chasquirca. Ezequiasmi shuj reycunamandaca Taita Diospa llactataca ashtahuan ali mandarca. Llaquicunata charishpapash na manllashpami Jehová Diostaca tucui shunguhuan sirvirca.
Bibliapi ima nijta liipai
2 Reyes 18:1–19:37
2 Crónicas 29:1–32:33
Isaías 38:1–39:8
¿Imatata nipanguiman?
Ezequiasca ¿imashinata na manllashcataca ricuchirca?
Ashtahuan informacionda mascapai
1. Bibliapi Ezequiasmanda parlashcacuna cierto cashcataca ¿imashinata arqueologocunapa tarishcacunaca ricuchishca? (w11 1/5 15 párrs. 1-3). A
Zev Radovan/Alamy Stock Photo
Foto A: Cai arcillahuan rurashca selloca Ezequiaspa tiempomandami can. Cai sellopica: “Caica Judá llactamanda rey Acazpa churi rey Ezequiaspami can” nijunmi.
2. Ezequías parlashca ‘alasta charij, millai culebramanda’ profeciaca ¿imashinata pactarirca? (Isa. 14:28, 29; ip-1 190, 191 párrs. 4-6).
3. Arqueologocunaca Nínive llactapica Senaquerib runapa escribishcacunatami tarirca. Chai escribishcacunapi Senaquerib ashtaca llactacunata mishashcata villashpapash shuj cosascunataca na villajurcachu. Caita yachanaca ¿imamandata importante can? (g 12/10 27 párrs. 3-5). B
© The Trustees of the British Museum. Licensed under CC BY-NC-SA 4.0. Source
Foto B: Arcillahuan rurashca prisma de Taylor nishcapica Senaquerib imashina shuj llactacunata mishashcatami parlan.
4. 2003 huatapica huaquin cientificocunaca Ezequiaspa canal nishcata pai mandajuj tiempopipacha rurashcata o na rurashcatami yachangapaj munarca. Chaita investigashpaca ¿imatata yachaj chayarca? (w09 1/5 27 párrs. 3-5).
Imata yachajushcapi pensaripai
Shuj cristianopa taitamama Jehovata na adorajpica ¿imashinata Ezequiaspa ejemploca animaita ushan? C
Foto C
Jerusalén llaquipi cajpica Ezequiaspaca ¿imata ashtahuan importante carca? (2 Rey. 19:15-19). Ezequiaspa ejemplotaca ¿ima situaciongunapita catita ushapanchi?
¿Imashinata Ezequiaspa ejemplota catishpa na manllashcata ricuchita ushapangui?
Ima pasashcapi pensaripai
Cai historiaca Jehová Diosmandaca ¿imatata yachachihuan?
Cai historiaca Jehovapa voluntadhuan y Bibliapa temahuanga ¿imatata ricunata charin?
Ezequías causarijpica ¿imatata paita tapungapaj munaiman?
Ashtahuan yachajupai
2 Reyes 19:14-36pi imacunalla pasashcata shuj videopi ricupai.
Miqueas 5:5pi parlashca profeciaca ¿imashinata Ezequiaspa tiempopica pactarirca? Cunan punllacunapipash ¿imashinata pactarijun?
“Cunanbica ¿picunata canchis michijcuna, pusaj mandajcuna can?” (w13 1/11 19-21 párrs. 9-18)