Jehovapa angelmi Ezequiastaca ayudarca

Asiria llactaca Israelmanda jatun 10 llactacunataca ñami mishashca carca. Cunanga Asiria llactata jatun mandaj Senaqueribca Judamanda ishcaijatun llactahuanmi quidangapaj munarca. Chaimi Judá llactamanda shuj shuj llactacunata mishashpa shamujurca. Ashtahuanbachaca Jerusalén llactatami mishangapaj munajurca. Shinapash Jerusalén llactata Jehová Dios cuidajushcataca Senaqueribca na yacharcachu.

Jerusalén llactata ama llaquichichunmi, Judá llactamanda rey Ezequiasca ashtaca valishca cosascunata Senaqueribman cacharca. Senaqueribca chai cosascunata chasquishpapash, paipa soldadocunataca Jerusalenda llaquichichunmi cacharca. Asirio soldadocuna asha asha quimirinajujpimi Jerusalenbi causaj gentecunaca ninanda manllanajurca. Chaita ricushpami Ezequiasca: “Imatapash na manllanachu canguichi. Asiria llactata jatun mandajtapash, paihuan shamuj ashtaca soldadocunatapash na manllanachu canguichi”. “Ñucanchita Mandaj Taita Diosmi ñucanchihuan” can nircami.

Rey Senaqueribca, rabsaqué runatami Jerusalenman cacharca. Chaiman chayashpaca burlarishpami cashna caparijurca: “Ezequiastaca, na uyanachu canguichi. Paica umashpallami, Mandaj Diosmi quishpichinga nijun”. ‘Maijan diospash, ñuca maquimanda cacharichitaca na ushangachu’ nijurcami.

Ezequiasca Jehová Diostaca ¿imatata rurasha? nishpami tapurca. Chaimi Jehová Diosca: Rabsaqué nishcataca ama manllaichu, Senaqueribca Jerusalendaca na llaquichingachu nirca. Chai jipami Senaqueribpa cartacunata Ezequiasca chasquirca. Chai cartapica: Cangunataca Jehová Diosca na salvaita ushangachu, ama yangaca macanajuichichu nirca. Chaimandami Ezequiasca Jehovata cashna mañarca: ‘Chai jatun mandajpa maquimanda ñucanchita quishpichiyari nipanimi. Can Taita Diospacha cajta yachachun chashna rurapayari’ nirca. Chaimi Jehová Diosca: ‘Cai puebloman yaicumuitaca na ushangachu. Ñucami cai pueblotaca ayudashpa quishpichisha’ nirca.

Senaqueribca Jerusalén llactata mishanataca seguromi carca. Shinapash shuj tutaca Asirio soldadocuna Jerusalén llactamanda canllapi carpa huasicunapi pacarinajujpimi Jehová Diospa shujlla angelca 185 mil asirio soldadocunata huañuchirca. Senaqueribca paipa alipacha soldadocuna huañushca cajpimi, imatapash na rurai ushashpa mishai tucushpa huasiman tigrarca. ShinamiJehová Diosca Ezequiasta, Jerusalén llactatapash cuidasha nishcata pactachirca. Quiquin Jerusalenbi cashpaca ¿Jehovapi confianguimanlla carca?