Millai ungüicuna japijpi

71 huatacunata charij, Linda shuti huarmiguca ninmi: “Doctorca pulmonman, colon nishcamanmi cáncer japishca nishpa villahuarca. Cai ratomi huañugringui nijpishnami sintirircani. Huasiman chayashpaca ‘cancerhuan cashpapash, ñaupaman catingapami imatapash rurana cani’ yarcanimi” nin.

49 huatacunata charij, Elise shuti huarmiguca ninmi: “Lado ñavipillami ninanda nanai ungüita charini. Huaquinbica yapata nanajpimi llaquilla sintirini. Tauca viajetami ñucalla sintirishpa, huañungapaj imatapash ruranshna yarihuan” nin.

Silla de ruedaspi tiajuj jarica paipa familiahuanmi parlajun

QUIQUINDA o quiquinba familiamanda pitapash shuj millai ungüitami charingui nijpica, llaqui llaquipachami sintiripashcangui. Tal vez ungüita charishca jahuapash cada rato doctorcunapaman rijuna, jambicunata randingapaj culquiguta na charina, jambicunata ufiaimanda shuj nanaicuna ricurijpimi tal vez yapata pinaripangui. Millai ungüihuan canaca yapata pinachishpami, tal vez ashtacata shaijuchipanga.

Cai llaquicunata charishpaca ¿imatata rurai ushapangui? Ashtacacunataca Taita Diosta mañana, Bibliapi cushichij textocunata liina, familiacunahuan o ali amigocunahuan yalinami cushilla sintirichun ayudashca.

HUAQUINGUNACA CAITAMI RURASHCA

58 huatacunata charij Robertoca ninmi: “Ungüita mishai ushangapaca, Taita Dios paipa ushaihuan ñaupaman catichun ayudanapimi confiana capangui. Paita mañajushpaca, imashina sintirijushcata ninallami capangui, familiamanda shinlli cati ushangapapash paipa espíritu santohuan ayudachunmi mañanalla capangui” nin.

Robertoca ninmi: “Ali shimicunata nishpa familiacuna animachunmi minishtirin. Ñucataca cada punllami ñuca familiamanda pipash saludangapaj cayamuhuan. Shuj ladocunamanda amigocunapashmi cayamuhuan. Paicunami ñaupaman catichun, alillata sintirichunbash ayudahuashca” nin.

Shuj ungushca amigota visitangapaj rigrijushpaca, Linda shuti huarmigu imata nijta uyapai: “Huañujujcunaca na siemprechu paicunapa ungüicunamanda parlajungapaj munan. Chaimandami ungüimanda parlajunapa randica shuj cosascunamandarapash parlana capangui” nin.

Millai ungüita charishpapash Taita Dios fuerzata cujpi, Bibliapa juyailla shimicuna cushichijpi, familiacuna rijsicunapash ayudajpica aguantashpa ñaupaman cati ushapanguimi.

Bibliapa cai textocunami ayudai ushapanga

Taita Diosman quimiripai

[Jehová] ‘Diostami mascajurcani. Paimi, ñuca mañajujta uyahuarca. Ñuca tucui imatalla manllajushcamandapash cacharichihuarcami. Imagutapash na charij cai runagu caparijujpica, uyahuarcami’ (Salmo 34:4, 6).

Lindaca ninmi: “Taita Diosta jambihuai nishpaca na mañanichu, cai ungüita aguantashpa catingapaj fuerzata carahuai nishpami rogani” nin.

Aguantashpa catingapaj Bibliata liipai

“Pipash na: ‘Ñucaca huañujunimi’ ninajungachu” (Isaías 33:24).

Shamuj punllacunapi Taita Dios imata ruragrijushcapi yuyapai. Chaimi aguantashpa catichun ayudanga.

Familiapa, ali amigocunapa ayudata mascapai

‘Ali cumbaguca paipaj cumbataca, tucui causaipimi juyajun. Llaqui punllacuna japijpipash, huauquitashnami llaquinga’ (Proverbios 17:17).

Elise shuti huarmiguca: “Quiquinba amigocuna ayudachun saquipai” ninmi. “Sololla sintirijushpapash, Taita Diosca na juyahuanllu yajushpapash, shujcunamandaca ama caruyapaichu” ninbashmi.