Ashtahuan aliguta villachishunchi: Ali villaigucuna folletohuan Bibliata imashina yachachinata ricuchishunchi
¿Imamandata minishtirishca can? Ashtaca gentecunaca Bibliata gratismi yachachinajunchi nijpica imata nijujtaca na intindinllu. Huaquingunaca yanmi, escuelaman richun o carumanda imapash cursota cungapami shina nijun nishpa. Chaimandami Bibliata gratismi yachachinajunchi nishpalla quedanapa randica, Bibliamanda imashina yachajunata ricuchina canchi. Bibliata yachajuna jahualla, ali cashcata ricuchingapaca pungupi shayajushpallatami huaquin minutocunapilla ricuchi ushanchi.
Caita rurapashunchi:
Bibliamanda yachachi callaringapaj ayudahuai nishpa Jehová Diosta mañashunchi (Filip. 2:13).
Villachijushpaca shuj viajegullapash Ali villaigucuna folletohuan Bibliamanda imashina yachachinata o Bibliamandaca ¿imashinata yachachinchi? videota ricuchishunchi.