Predicación publicapica ¿imashinata villachina capanchi?

Apashpa rinalla cajongunapi o mesacunapi publicaciongunata ricushpami ali shungu ashtaca gentecunaca Jehovata rijsi ushashca (Juan 6:44). Chaimandami ancianocunataca animanajushcanchi, paicunapa congregacionba territoriopi ashtaca gentecuna yalinajuj pushtucunapi predicación pública nishcata rurachun. Apashpa rinalla cajonguna, mesacuna cashcamandaca permisocunata llujchinaca huaquinbica na minishtirinllu. ¿Picunata predicación publicapi participaita ushan? Limpio, aliguta mudarij, aliguta pensarishpa parlaj, cushilla parlaj publicadorcunami participai ushan. Cunanga predicación publicapi imata rurana ali cashcata, shinallata imata rurana nali cashcata ricupashun. Caipi sugerenciacunami predicación publicapi ashtahuan aliguta villachichun ayudanga.

¿Imatata rurana can?

Yalinajuj gentecunataca cushilla, aligumanmi saludana can. Pipash publicaciongunata ricunman quedajpica nita ushanchimi: “Munashpaca maijangutapash japipailla” nishpa.
Maipi ali cana cashcata ricushpa shayaripangui. Huaquin publicadorcunaca cuenta japishcami, apashpa rinalla cajongunamanda, mesacunamanda ashaguta ladolla shayarina ali cashcata. Ashaguta ladolla shayarina nali cajpica publicaciongunamanda caru carulla shayarishpami ali canman. Shinami gentecuna quimirijta ricushpaca ashaguta quimirishpa nita ushan: “Quiquinga cai tapuipi pensaripashcanguichu” nishpa.
Usharijpica Biblia ima nijta ricuchingapaj esforzaripangui.
Gentecunamanga “Enseña” librohuan o shuj publicaciongunahuanmi Bibliata yachachinchi. Chai publicaciongunata apajpica, Bibliata imashina yachajunata villapangui. Shinallata, quiquinba celularpi o tabletpi ¿Imamandata Bibliata yachajuna capanchi? nishca videota ricuchipangui.
Pipash ashtahuan yachangapaj munajpica shutita, maipi causajta, telefonota mañapangui. Congregacionba territoriopi na causajpica Persona que mostró interés (S-43) nishca hojaguta jundachishpami congregacionbi secretarioman uchalla cuna capangui.

¿Imatata na rurana can?

Culiralla parlana, publicacionda apai nishpa atichijuna, o apashpa rinalla cajonda, mesata yapata cuidajunaca nalichu can.
Predicación publicapica publicaciongunata gentecunaman saquingapallami can nishpa pensanaca nalichu can. Predicación publicaca Bibliata yachajungapaj munaj gentecunata taringapami can. Chaimandami gentecunahuan parlangapaj esforzarina capanchi.
Apashpa rinalla cajón ñaupajpi, mesa ñaupajpi shayajuna, o cumbahuan yapata parlajunapash nalichu can. Telefonopi parlanapacha minishtirijpica carulla rishpami parlana can.
Ali villaicunata nalicachij gentecuna rimai callarijpica na randi rimashpa bullayajunachu canchi. Ashtahuan plitushpa catingapaj munajujpica apashpa rinalla cajonda o mesataca shuj ladoman apashpami ali canman.