Ali villachij publicadorcunamanda yachajushunchi
Ali villachij publicadorcunaca ninan valishcami can. Huaquingunaca ashtaca huatacunatami Jehovata sirvinajushca. Cutin shujcunaca chairallami alipacha villachinata yachajushca. Tucuicunallatami cai tucuri punllacunapi congregacionda Jesús ñaupaman pushajushcatapash, villachichun, yachachichun Jesús ayudajushcatapash cuenta japishca (Mat. 28:19, 20). Ashtaca huatacunata villachijuimandacarin Jehovapa ‘ninan ushai’ ayudajpimi paicunaca llaquicunatapash aguantai ushashca (2 Cor. 4:7). Imata yachajushcatapash cushijushpami shujcunaman yachachin. Ñucanchipashmi paicunapa experienciataca aprovechana canchi (Sal. 71:18). ¿Imashinata aprovechashun?
Villachijushpa. Ali villachingapaca ali villachij huauquicunapa ayudatami mushujcunaca minishtin. Ali villachij huauquicuna imashina villachijta ricushpallatami ashtacata yachajui ushanchi (La Atalaya 15 de febrero 2015 revistapi “Cómo mantener el entusiasmo en la predicación” temapi “Ayude a los nuevos” nishcapi párrafo 3ta ricupangui). Ali villachij huauquicunahuan villachinaca ¿imashinata quiquindaca ayudashca?
Ali villachij huauquihuan cumba tucushpa villachinaca alipachami can. Chai huauqui ungushca cajpica, Bibliata yachajujtami huaquinbica chai huauquipa huasiman apashpa yachachinalla can. Chai jipaca huauquitaca tapunallami capangui, “alichu caparca, imapita mejorana capani” nishpa.
Tiempota llujchina. Ali villachij publicadorcunata ali rijsingapaj esforzaripangui. Ali rijsingapaca Familiahuan Adorana Tutaman invitashpa tapupai: “¿Imashinata Bibliata yachajui callariparcangui? ¿Jehová Diosca imashinata bendiciashca? Quiquin Testigo tucujpica ¿imashinata congregacionga carca? ¿Ima ali experienciacunatata charipashcangui?” nishpa. Ali villachij publicador ungushca cajpica paipa huasiman rishpami Familiahuan Adorana Tutataca chaipi ruraita ushapangui.
Shinallata, paicunataca intindinami canchi. Ashtaca huatacunata villachinajushpapash huaquingunaca shuj cosascunata rurangapaj cutin shujcunaca shuj cosascunata rurangapami ali can (Rom. 12:6-8). Huaquingunacarin ña mayorllacuna caimandaca na ashtaca tiempota ayudai ushangachu. Shinapash paicunapa experienciata ricushpa, Jehovata ali sirvinajushcata ricushpaca ashtacatami paicunamandaca yachajui ushanchi.