Estudianapash, culquita charinapash ¿jipa punllacunapi ali causaita charichun ayudanllu?

Ashtaca gentecunaca estudiashcacuna y culquita charij gentecunami jipa punllacunapipash tranquilo causaita ushan ninmi. Shinallata universidadpi estudiashcacunami ali trabajotapash tarita ushan, familiapipash, comunidadpipash tranquilo ali causaita ushan nin. Ashtahuanbash estudiashpallami culquitapash ashtahuan ganaita ushashpa cushilla causaita usharin ninmi.

GENTECUNACA ESTUDIANAMI ALI CAUSAITA CARAN NINMI

China llactamanda Zhang Chen shuti jariguca cashnami nin: “Ñucaca universidadta estudiashpa shuj titulota llujchishpallami, shuj ali trabajota tarishpa ashtaca culquita ganaita ushasha yarcanimi. Shinallata ali causaitapash chari ushasha yarcanimi”.

Jipa punllacunapi ali causaita charingapaj munashpami, ashtaca gentecunaca shuj alipacha rijsishca universidadpi estudiangapaj viajana cajpipash viajan. Shinapash cunanbica, COVID-19 pandemia tiashcamandapachami shuj llactacunaman viajanaca ashtahuan difícil tucushca. 2012 huatapica la Organización para la Cooperación y el Desarrollo Económicos nishcaca cashnami nirca: “Shuj llactacunapi estudiangapaj llujshishca estudiantecunamandaca 52% de estudiantecunami Asia llactamanda can”.

Ashtaca taitamamacunaca paicunapa huahuacuna shuj llactapi universidadta estudiachunmi ashtaca sacrificiocunata ruran. Taiwán llactamanda Qixiang shuti jariguca “ñuca taitacunaca na ashtaca culquita charishpapash, paicunapa 4 churicunataca Estados Unidospi estudiachunmi cacharca” nin. Huahuacunata shina estudiachun cachashcamandami ashtaca familiacunaca ninanda dibi tucushca.

¿CIERTOPACHACHU ESTUDIANACA ALI CAUSAIGUTA CARAMUN?

Ñacutin tutapica chai jovencitacunamandaca, shujca shaijushcami computadora ñaupapi tiajun. — Estudiocunapilla y ashtaca culquita charinapilla pensaj gentecunaca imata ruranatapash na atinashpami causan.

Ciertomi estudianaca causaipica ayudaita ushan. Shinapash na siemprechu ñucanchi munashcashnaca ayudaita ushanllu. Por ejemplo, ashtacacunami ashtaca huatacunata estudiashpa, ashtacata dibi tucushpapash paicuna munashcashna trabajotaca na tari ushashca. Rachel Mui shuti huarmiguca “universidadta estudiashca gentecunapaca trabajota tarinaca cunanbica ashtahuan dificilmi ricurishca” nircami. Taiwán llactamanda Jianjie shuti jariguca universidadta estudiashcamandami ashtaca titulocunata charin. Paica cashnami nin: “Ashtaca gentecunaca estudiashpa, ninanda prepararishpapash shuj cosascunatara rurashpami trabajan”.

Huaquingunallami paicuna estudiashca carrerapica trabajota tarin. Shinapash paicuna causangapaj munashcashnaca na causanllu. Tailandia llactamanda Niran shuti shuj jarica Europa llactapimi universidadta estudianataca tucuchirca. Jipamanga paipa llactaman tigrashpa, pai estudiashca carrerapimi shuj trabajota tarirca. Paica cashnami nin: “Estudiashcamandami shuj ali trabajota tari usharcani, chaipica ashtacatami ganan carcani. Pero shinapash, ashtahuan culquita ganangapaca ashtahuan horascunatami trabajana tucurcani. Shinapash jipamanga ñuca trabajashca compañiapica huaquin empleadocunata despedishpami, ñucatapash despedihuarca. Chaimi trabajo illaj quidarcani. Chaimi pipash trabajota seguroca na chari ushashcata cuenta japircani”.

Ashtaca culquita charij gentecunapashmi familia ucupica imapash problemacunata charin o paicunapa saludhuanmi na ali causan. O shinallata paicuna charishca cosascunamandapashmi ninanda preocuparishpa causan. Japón llactamanda Katsutoshi shuti jarigupash cashnami nin: “Ñucaca ashtaca culquitami charircani, shinapash cushillaca na causanllu carcani. Porque ashtacacunami ñucataca envidiashpa, ñucatapash imatapash rurashpa causan carca”. Vietnam llactapi causaj Lam shuti huarmiguca cashnami nin: “Ñucaca ashtaca gentecuna shuj ali trabajota charingapaj y shinallata culquiguta charishpa tranquilo causangapaj ninanda esforzarijtami ricushcani. Shinapash shina ninanda esforzarijpipash jipamanga shuj unguicunahuan causajta, huaquingunacarin ansiedad y depresionhuan causajta y na tranquilo ali causajtami ricushcani”.

ESTUDIANAPASH, CULQUITA CHARINAPASH ALI CAUSAITA CHARICHUNGA NA AYUDANLLU

Ciertomi imagutapash estudianaca ali can. Shinapash jipaman shuj ali causaiguta charingapaca, imagutapash estudianallaca na minishtirinllu. Chaipaca ima ashtahuan minishtirijta Bibliagupi ricupashun.

NA SIEMPRECHU UNIVERSIDADCUNAPI ESTUDIANACA ALI CAUSAITACA CARAN

“Calpashpa mishanaca, na alipacha calpajcunapajlla cajta ricurcani [...]. Charij tucunapash, na aliguta yarishpa causajcunapajllachu. Cushijushpa chasquinapash, na juyaillaguta rimaj runacunapajllachu. Ashtahuangarin ima punlla tucuicuna ima tucuna cashpapash, shina tucunllami” (ECLESIASTÉS 9:11).

Huaquin alipacha prepararishca gentecunapashmi, huaquinbica ali causaitaca na chari ushashca. Por ejemplo, huaquinbica llactapillata na ashtaca oportunidad tiashcamanda o denoca llacta económicamente nali cashcamanda o na cashpaca paicunashna na igual cashcamandami, paicuna alipacha preparado cashpapash trabajopaca na ashtaca oportunidadta charishca.

NA YASHCAPIMI COSASCUNACA TUCURINLLA

“Ama charij tucunatalla ninanda munashpa puringuichu. Chai munaita saquishpa, aligutapacha yarishpa puringui. ¿Charij tucunaca yangallata cajpitachu, chaita ricuriajlla causagringui? Chaicunaca, alas viñajpi jatun anga jatarishpa, jahuata rinshna ñapash chingangallami” (PROVERBIOS 23:4, 5).

Culquita charinaca ratopallami can. Porque por ejemplo, huaquinbica bancocunapi imapash pasajpimi, bancopi ahorrashca culquigutapash ñapash perdita usharin. O denoca imapash llaquicuna tiajpi, talvez terremotocuna, incendiocuna o imapash tiajpimi gentecunaca incluso huasi illaj quidashpa, tucuita ratopi perdita ushan.

ASHTACA CULQUITA CHARINAPASHMI LLAQUIMAN APAITA USHAN

“Ashtahuangarin ashtacata charij runataca, chai charishcacunallatami na puñuchin” (ECLESIASTÉS 5:12).

Hong Kong llactamanda Franklin shuti runaguhuan ima pasashcata ricupashunchi. Paica universidadpi estudiashcamandami ashtaca titulocunata charin. Shinallata ashtaca culquita ganaj ali trabajotami charin carca. Ashtahuangarin paitaca paipa trabajopica gerente cachunmi nombrarca. Paica cashnami nin: “Ñucaca yapata estresado caimandami ñuca saludhuanbash nali tucurcani. Ashtahuangarin puñuitapash na puñushpami yalin carcani. Chaimi imashpata shinapacha causana cashcani yashpa pensarin carcani”.

“Ama charij tucunatalla ninanda munashpa puringuichu” (PROVERBIOS 23:4)

Franklin runagushnallatami ashtaca gentecunaca universidadta estudiana y ashtaca culquita charinaca ali causaiguta na carai ushashcata cuenta japishca. Cutin shujcunaca, shujcunata ayudashpa, ali gente cashpami jipa punllacunapica ali causaiguta charita usharinga yanmi. Shinapash ¿chaita ruranacha jipa punllacunapi ali causaiguta charichun ayudanga? Caitaca cati temapimi ricupashun.