Jacobpa profeciacunamandaca ¿imatata yachajupanchi? (parte 1)

1, 2. Jacob ña huañugrijushpaca ¿imata y imamandata chaitaca rurarca? (Callari paginapa dibujotapash ricupangui).

JEHOVÁ DIOSTA ali sirvij Jacob runaguca paipa familiahuanmi Canaán llactamanda Egipto llactapi causangapaj rishcarca. Chai punllamandaca ñami 17 huatacuna yalishcarca (Gén. 47:28). Jacobca paipa juyashca churi Joseta y paipa chaishuj churicunata cutin tandanajushca cajta ricushpaca ninandami cushijushcanga. Shinapash Jacobca ñallami huañugrijurca. Chaimandami shuj importante villaita ningapaj paipa churicunataca cayarca (Gén. 49:28).

² Chai tiempopica, ña huañugrijushpami taitacunaca paipa churicunata consejangapaj tandachin carca (Is. 38:1). Huaquinbica maijan churi familiata ñaupaman pushanata villangapami tandachin carca.

3. Génesis 49:​1, 2​mandaca ¿imatata yachajupanchi?

³ (Génesis 49:​1, 2​ta liipangui). Shinapash Jacob rurashca reunionga diferentemi carca. Paica profetami carca. Chaimi Jehová Diosca Jacobta utilizashpa shamuj punllacunapi Jacobpa churicunahuan y paicunapa familiacunahuan ima pasanata villarca.

4. Cai temapica ¿imacunatallata yachajupashun? (“Jacobpa familia” nishca recuadrotapash ricupangui).

⁴ Cai temapica Rubenman, Simeonman, Leviman y Judaman Jacob imacunatalla nishcatami yachajupashun. Cutin cati temapica chaishuj 8 churicunaman Jacob imacunatalla nishcatami yachajupashun. Jacobca paipa churicunata y paicunapa familiacunata ima pasanatami villarca. Tiempohuanga Jacobpa churicunapa familiacunami Israel llacta tucurca. Israel llactapi imacunalla pasashcata ricushpami Jacobpa profeciacuna imashina pactarishcata yachajupashun. Shinallata Jehová Diospa ñaupapi ali ricuringapami Jacobpa profeciacunamanda imacunatalla yachajui ushashcatapash ricupashun.

RUBÉN

5. Rubenga ¿imacunatallashi japisha yashcanga?

⁵ Primeroca Rubenhuanmi Jacobca parlarca. Paitaca “canga ñuca rucu churimi cangui” nircami (Gén. 49:3). Rubenga Jacobpa rucu churi caimandami paipa taitapa herenciataca dobletami japisha yashcanga. Shinallata paipa taita huañujpica, ñucami familiataca ñaupaman pushasha yashcangami. Ashtahuanbash ñucapa jipaca ñuca familiamanda punda churimi familiataca ñaupaman pushanga yashcangami.

6. Rubenga ¿imamandata punda churicuna japina derechotaca chingachirca? (Génesis 49:​3, 4).

⁶ Shinapash Rubenga punda churicuna japina derechotami chingachirca (1 Crón. 5:1). ¿Imamandata chai derechotaca chingachirca? Rubenga Raquel huañushca jipami paipa taita Jacobpa chaishuj huarmi Bilhá shutihuan relaciones sexualesta charirca. Chaimandami Rubenga punda churi japina derechotaca chingachirca. Bilhaca Raquelpa sirvientami carca. Cutin Raquelca Jacobpa juyashca huarmimi carca (Gén. 35:​19, 22). Pero ¿imamandashi Rubenga Bilhahuan relaciones sexualesta charishcanga? Rubenga Leapa churimi carca. Leaca Jacobpa chaishuj huarmimi carca. Rubenga Bilhata Jacob millanayachishpa paipa mamata ashtahuan juyachunmi, Bilhahuanga relaciones sexualesta charishcanga. O Bilhata munashpa ricujuimandami Rubenga Bilhahuanga relaciones sexualesta charishcanga. Ima razonmanda Bilhahuan relaciones sexualesta charishca cajpipash Jehovapa y Jacobpa ñaupapica Rubenga nalipachami ricurirca (Génesis 49:​3, 4​ta liipangui).

7. Jacobpa profeciaca ¿imashinata Rubenbipash y paipa familiapipash pactarirca? (“Jacob ña huañugrijushpa villashca profeciacuna” nishca recuadrotapash ricupangui).

⁷ Jacobca Rubendaca “canga na primero tucunguichu” nircami. Chai shimicunaca ¿imashinata pactarirca? Bibliapica Rubenba familiamanda pipash rey, sacerdote o profeta tucushcataca na nijunllu. Shinapash Jacobca Rubenmanbashmi herenciata curca. Chaimi Rubenba familiapash Israel llactapa shuj jatun familia tucurca (Jos. 12:6). Rubenga huaquin viajecunatami ali persona cashcata ricuchirca. Shinallata huainayana juchapipash ñana urmashcachu yarin (Gén. 37:​20-22; 42:37).

8. Rubenba ejemplomandaca ¿imatata yachajupanchi?

⁸ ¿Imatata yachajupanchi? Nali munaicunamanda controlarinata y huainayana juchapi ama urmangapaj decidido canatami yachajupanchi. Imapash tentación ricurijpica, cai tentacionbi urmashpaca imashinata Jehová Diostapash, ñuca familiatapash y shujcunatapash llaquichisha nishpami uchalla pensarina capanchi. Shinallata ‘imata tarpushpapash chaitallata cozechanataca’ na cunganachu capanchi (Gál. 6:7). Rubenda ima pasashcata ricushpami, Jehová Diosca ninanda llaquij Taita Dios cashcata ricupanchi. Nalita rurashpaca llaquicunatami charishun. Shinapash arripintirishpa alita rurangapaj esforzarijpica, Jehová Diosca perdonangami y bendiciangami.

SIMEÓN Y LEVÍ

9. ¿Imamandata Jacobca Simeonda y Levitaca rimarca? (Génesis 49:​5-7).

⁹ (Génesis 49:​5-7​ta liipangui). Rubenhuan parlashca jipaca, Simeonhuan y Levihuanmi Jacobca parlarca. Paicunapa nali ruraicunamandami Jacobca rimarca. Simeón y Levica ¿imatata rurarca? Shuj punllaca Canaán llactamanda Siquem shuti runami Jacobpa ushi Dinataca violarca. Chaimi Jacobpa tucuilla churicunaca ninanda culirarca. Pero Simeón y Levica na controlarircachu. Chaimi Siquemda y chai llactamanda jaricunatapash circuncisionda rurajpica, na imatapash rurashunllu nishpa llullarca. Shina nijpimi Siquembash, chai llactamanda jaricunapash circuncisionda rurarca. Circuncisionda rurashcamanda nara ali tucujpillatami Simeón y Levica “cada uno shuj espadata japishpa chai llactaman rirca. Paicunaca pipash na yachajtami tucuilla jaricunata huañuchishpa saquirca” (Gén. 34:​25-29).

10. Simeonman y Leviman nishca profeciacunaca ¿imashinata pactarirca? (“Jacob ña huañugrijushpa villashca profeciacuna” nishca recuadrotapash ricupangui).

¹⁰ Jacobca paipa ishcai churicuna jatun nali ruraicunata rurashcamandaca ninandami culirarca. Chaimi paicunapa herenciataca na shuj pushtupillachu japinga, sino caiman chaimanmi Israel llactapica japinga nirca. Chai profeciaca 200 yali huatacuna jipami pactarirca. Chai tiempopimi israelitacunaca Jehová Dios carasha nishca alpacunaman chayarca. Simeonba jatun familiaca Judapa jatun familiapa alpacunapimi herenciataca caiman chaiman japirca (Jos. 19:1). Cutin Levipa jatun familiaca, Israel llactapimi 48 llactacunata caiman chaiman japirca (Jos. 21:41).

11. Simeonba y Levipa jatun familiacunaca ¿ima ali cosascunatallata rurarca?

¹¹ Simeonba y Levipa jatun familiacunaca na Simeonshna y Levishna pandarircachu. Levipa jatun familiaca israelitacuna Jehová Diosta aliguta adorachunmi ayudarca. Por ejemplo, Jehovapa Leyta Sinaí urcupi Moisés chasquingapaj rijpica, ashtaca israelitacunaca orohuan rurashca shuj shicutami adorai callarirca. Pero levitacunaca Moisespa lado tucushpami shicuta adoranajuj gentecunataca tucuillata huañuchishpa saquirca (Éx. 32:​26-29). Jehová Diosca Levipa jatun familiatami sacerdotecuna cachun agllarca (Éx. 40:​12-15; Núm. 3:​11, 12). Cutin Simeonba jatun familiaca, Jehová Dios carasha nishca alpacunata japingapami, Judapa jatun familiahuan tandanajushpa cananeo gentecunahuanga macanajurca. Shinami paicunaca Jehová Diospa voluntadta pactachirca (Juec. 1:​3, 17).

12. Simeonba y Levipa ejemplomandaca ¿imatata yachajupanchi?

¹² ¿Imatata yachajupanchi? Culira mishachunga na saquina cashcatami yachajupanchi. Ñucanchita o ñucanchi amigocunata o familiata pipash llaquichijpi culiranaca normalmi can (Sal. 4:4). Pero Jehová Diosca ñucanchita llaquichishcacunata imatapash nishpa o rurashpa llaquichichunga na munanllu (Sant. 1:20). Huauquipanicuna o Jehovata na sirvij gentecuna llaquichijpica, Bibliapa consejocunata pactachingapami esforzarina capanchi. Shinami shujcunata imatapash nishpa o rurashpaca na llaquichishun (Rom. 12:​17, 19; 1 Ped. 3:9). Shinallata quiquinba taitamama imapash nalita rurajpica, na quiquinbashchu paicunapa nali ejemplota catina capangui. Jehová Diospa ñaupapica nunca na ali ricurishachu yashpaca na pensanachu capangui. Alita rurangapaj esforzarijpica Jehová Diosca bendiciangami.

JUDÁ

13. Judaca ¿imamandashi preocupado cashcanga?

¹³ Cunanga Judapa turnomi carca. Judaca paipash nalicunata rurashca caimandami, huauquicunaman paipa taita imacunatalla nijta uyashpaca preocupado cashcanga. Por ejemplo, Judapash paipa huauquicunahuan tandanajushpami, Siquem runapa llactaman rishpa chaipi tiashca cosascunata apashpa rirca (Gén. 34:27). Shinallata chaishuj huauquicunahuan tandanajushpami Josetaca esclavotashna jaturca. Chai jipaca paipa taitamanbashmi llullarca (Gén. 37:​31-33). Jipaca prostituta huarmi can yashpami paipa jachunhuanllata relaciones sexualesta charirca (Gén. 38:​15-18).

14. a) Jacobca ¿imatata Judamanga nirca? b) Judaca ¿ima ali cosascunatata rurarca? (Génesis 49:​8, 9).

¹⁴ Shinapash Jehová Dios yuyachijpimi Jacobca ali cosascunatalla Judamanga nirca (Génesis 49:​8, 9​ta liipangui). Judaca paipa taitamanda ninanda preocuparishcatami ricuchirca. Shinallata paipa último huauqui Benjaminmanda preocuparishpami, paita ama imapash pasachun cuidajurca (Gén. 44:​18, 30-34).

15. Judaman nishca profeciaca ¿imashinata pactarirca?

¹⁵ Jacobca Judami paipa huauquicunataca ñaupaman pushanga nircami. Shinapash chai profeciaca 200 huatacuna jipami pactarirca. ¿Imashinata pactarirca? Israelitacuna Egiptomanda llujshishpa Jehová Dios carasha nishca alpacunaman chayangapaj desiertota rinajujpica, Judapa jatun familiami tucui jatun familiacunataca ñaupaman pushajurca (Núm. 10:14). Shinallata Jehová Dios carasha nishca alpacunaman yaicungapaca, primeroca Judapa jatun familiami cananeocunahuanga macanajurca (Juec. 1:​1, 2). Y Judapa jatun familiamandaca Davidmi primer rey tucurca. Pero Judaman Jacob nishca profeciaca shuj cumplimientotapashmi charirca.

16. Génesis 49:10​pi profeciaca ¿imashinata pactarirca? (“Jacob ña huañugrijushpa villashca profeciacuna” nishca recuadrotapash ricupangui).

¹⁶ Jacobca, tucuilla gentecunata mandangapaca Judapa jatun familiamandami shuj gobernanteca llujshinga nircami. Y chai gobernanteca para siempremi mandanga nircami (Génesis 49:10​ta liipangui). Chai gobernanteca Jesusmi can. Paitami Jacobca Siló nirca. Jesusmanda parlashpami shuj angelca “Jehová Diosmi paimanga punda taita Davidpa mandashpa tiajunata cunga” nirca (Luc. 1:​32, 33). Apocalipsis 5:5​pica Jesusca ‘Judapa jatun familiamanda Leonmi’ can ninmi.

17. ¿Imashinata Jehová Diospa ejemplota catita ushapanchi?

¹⁷ ¿Imatata yachajupanchi? Judaca jatun nali ruraicunatami rurarca. Shinapash Jehová Diosca paitaca bendiciarcami. Chaimi Judapa huauquicunaca ¿imamandashi Jehová Diosca Judata bendiciashcanga? nishpa pensarishcanga. Judapa huauquicuna imatapacha pensashcataca na cabal yachapanchichu. Shinapash Jehová Diosca Judá ali shunguta charijta ricushpami paitaca bendiciarca. ¿Imashinata Jehová Diospa ejemplota catita ushapanchi? Jehovapa ejemplota catingapaca huauquipanicunapa ali cualidadcunatami ricuna capanchi. Por ejemplo, shuj huauqui o shuj pani shuj asignacionda chasquijpica, imamandashi paira chai asignacionda chasquijun nishpami pensanchiman. Shinapash chashna pensanapa randica, chai huauquipa o panipa ali cualidadcunata Jehová Dios ricushcatami pensarina capanchi.

18. ¿Imamandata pacienciata charina capanchi?

¹⁸ Judamandaca pacienciata charina cashcatapashmi yachajupanchi. Jehová Diosca siempremi paipa promesacunata pactachin. Shinapash ñucanchi munashca ratopi ñucanchi munashcashnaca na pactachinllu. Por ejemplo, israelitacunata ñaupaman pushangapaca Judapa jatun familiaca huaquin tiempotami shuyana carca. Shinapash Judapa jatun familiaca Jehová Dios agllashca Moisesta, Josueta y rey Saultami apoyarca. Moisesca Levipa jatun familiamandami carca. Josueca Efrainba jatun familiamandami carca. Cutin rey Saulca Benjaminba jatun familiamandami carca. Ñucanchipashmi cunanbica Jehová Dios churashca ñaupaman pushaj huauquicunataca apoyana capanchi (Heb. 6:12).

19. Paipa chuscu churicunaman Jacob imata nishcamandaca ¿imatata Jehová Diosmandaca yachajupanchi?

¹⁹ Ña huañugrijushpa Jacob paipa chuscu churicunaman imata nishcamandaca ¿imatata yachajupanchi? Jehová Diosca ‘gentecunashna na ricuj’ cashcatami yachajupanchi (1 Sam 16:7). Shinallata Jehová Diosca ashtaca pacienciata charijta y perdonaj cashcatami yachajupanchi. Jehová Diosca ñucanchicuna nalita rurachunga na munanllu. Shinapash tucuita perfecto rurachun na shuyaj cashcatami yachajupanchi. Jatun pecadocunata rurashpapash arripintirishpa alita rurangapaj esforzarijpica Jehová Dios bendicianatapashmi yachajupanchi. Cati temapica chaishuj churicunaman Jacob imata nishcatami yachajupashun.