Braille shimimi ciego gentegucunapa causaitaca cambiashca

1 de Junio de 1912 huatapi llujshishca The Watch Tower (La Torre del Vigía) publicacionbica cashnami nirca: “Cai revistata ashtaca liijcunaca ciego gentegucunatami rijsinga. Cai revistapica ciego gentegucunapami publicaciongunaca gratis tian”. Shinallata caitapashmi nirca: “Cai publicaciongunata ciego gentegucuna liita ushachunga puntocunahuan rurashca publicaciongunatami impriminchi”. “Ashtaca ciego gentegucunaca shamuj punllapi ali causaigu tianata yachashpami ninanda cushijun”.

Inglés braillepi modelo na tiajpipash, Testigo de Jehovacunaca ciego gentegucunapami publicaciongunataca puntocunapi rurashpa imprimin carcanchi. Cunan punllacunapica 50 yali shimicunapimi ciego gentegucunapa publicaciongunataca braille shimipi imprimishpa catinchi. Braille shimipica ¿imashinata ruran?

Braille shimipi publicaciongunataca ¿imashinata ruran?

Primeroca letracunatarami escribin. Chaipa jipami braille shimimanga yalichin. Patterson, Nueva York llactapi, Servicios de Procesamiento de Textopi sirvij huauqui Michael Millenga cashnami nin: “Pundaca, braille shimipi escribingapaca shuj empresacunapa programacunatami utilizan carcanchi. Shinapash tucui shimicunapi escribingapaca na tiarcachu. Cunanga casi tucui shimicunapi brailleman escribingapaca Watchtower Translation System programatami utilizanchi. Cai programashnaca maijan programapash na tianllu”.

Braille shimipi publicaciongunaca letratallaca na charinllu. Dibujocunamanda imata ningapaj munashca letracunatapashmi charin. Por ejemplo, Cushilla causapashunchi callari hojapa yuyaicunataca braille shimipica cashnami escribishca: “Shuj jarica urcucuna, lomacuna tiaj shuj juyailla sisa pamba ñangutami purishpa rijun” nishpa. Siervo ministerial, precursor Jamshed ciego huauquiguca cashnami nin: “Dibujocunamanda, imata ningapaj munashca yuyaicunata escribishcaca ñucapaca ninan valishcami can”.

Braille shimipi escribishca jipami sucursalcunaman imprimichun cachan. Tauca viajecunata puntocunata rurangapaj papelcunata utilizajpi, chai papelcuna ama dañarichunmi shinlli papelcunata utilizanchi. Chaipa jipaca publicaciongunata cuadernocunatashna rurangapami, primeroca hojacunata aliguta alichinchi, jipaca hojacunatami anillanchi. Shinallata chai jipaca congregaciongunaman cachana publicaciongunahuan igualmi cachanchi. Na cashpaca correopi ciego gentegucunaman gratis cachaita ushanguichi nijpimi cachanchi. Ciego huauquipanigucuna tandanajuicunapa publicaciongunata ña minishtinajujpica sucursalmanda huauquicunaca uchallami cachan.

Chashna publicaciongunata rurangapaca ashtaca tiempo, ashtaca culquimi minishtirin. Wallkill, Nueva York llactapica, ishcai Bibliacunata braille shimipi ruranaca 50 mil normal Bibliacunata ruranshnallatami paran. Inglés shimipi braille Bibliaca 25 volumengunatami charin. Braille shimipi Bibliata rurangapaj materialcunaca normal Bibliata rurangapaj materialcunatapash yali ninan valishcami can.a Shuj Bibliapa 25 volumengunata forrangapaca, 150 dolarcunami valin.

Braille shimipi publicaciongunata rurashpa ayudaj huauquipanicunaca ¿imashinata sintirin? Sudáfrica llactapa sucursalpi sirvij panigu Nadiaca cashnami nin: “Ciego huauquipanicunapa causaica na facilchu can. Chaimandami braille shimipi publicaciongunata rurashpa ayudanaca, shuj jatun privilegio can. Jehová Dios paicunata juyajtaca segurami cani”.

Braille shimipi liinata yachajupai

Shuj ciegogu braille shimita na liita ushashpaca ¿imatata ruraita ushan? Huaquin huatacuna huashamanga, Aprenda a leer braille nishca folletomi llujshirca. Chai folletoca letracunapi, shinallata braille shimipipashmi imprimishca carca. Chai folletotaca ciegopash, ñavi ricujujpashmi liita ushanalla carca. Chai folletopica shuj reglapash, escribingapaj shuj punzonbashmi shamun carca. Braille shimita yachajujcunami reglata, punzondaca utilizan carca. Cai ejerciciocunata ruranami braille shimipi letracunata yachajuchun, shinallata dedocunahuan letracunata rijsi ushachunbash ayudan. Braille shimipi publicaciongunata charinami ali cashca.

Braille shimipi publicaciongunaca ¿imashinata ñavi na ricujuj, ñavi na ali ricujuj huauquipanicunataca ayudaita ushan?

Haití llactamanda Ernst huauquiguta ima pasashcata ricupashun. Tandanajuicunaman rishpapash braille shimipi publicaciongunataca nimata na charircachu. Chaimi tandanajuicunapi comentangapaj munashpaca de memoria yachajun carca. Chai huauquica cashnami nin: “Cunanga comentangapaca maquita alzanillami”. Shinallata “huauquipanicunahuan tandanajushca cashcashnami sintirini. Tucuicunallatami igual chaitallata yachajunchi” ninmi.

Austria llactamanda Jan anciano huauquica ñavihuanga na aliguta ricuita ushanllu. Shinapash Villajun revistata, Bibliamanda yachachingapaj chaupi semana tandanajuitapashmi pushan. Jan huauquica cashnami nin: “Braille shimipi ñucanchi publicaciongunaca alipachami can. Por ejemplo, cada hojacunami numerocunahuan can. Notacunatapash facilmi tarita usharin. Shinallata dibujomanda imata ningapaj munashca yuyaicunapash facilmi intindirin”.

Corea del Sur llactapimi Seon-ok precursora paniguca causan. Paica ñavi na ricujuj, sordagumi can. Pundaca tandanajuicuna nara callarijpillatami paipa maquita japishpa señasta rurashpa intindichichun minishtirca. Cutin cunanga braille shimipi publicaciongunataca paillatami liita ushan. Paica cashnami nin: “Puntocuna faltajpi, puntocunapa lineacunapash chueco cajpi, shinallata papelpash tela tela cajpimi, shuj publicaciongunata liinaca shinlli can”. “Shinapash testigo de Jehovacunapa braille shimipi rurashca publicaciongunapica puntocunapash ali, shinallata hojacunapash raculla cajpimi fácil liita usharinlla. Pundaca pipash ayudachunmi minishtin carcani pero cunanga ñuca sololla liinillami. Tandanajuicunapa prepararinataca ninandami gushtani. Braille shimipi tucuilla publicaciongunatami ñucaca liini. Braille shimipi publicaciongunata charinaca alipachami cashca”.

Shuj publicaciongunapi nishcashnallatami, braille publicaciongunapipash: “Cashna publicaciongunahuanmi mundo enteropi gentecunaman Bibliamanda gratis yachachinchi. Cashna publicaciongunata rurachunga gentecunallatami paicunapa munai culquita cushpa ayudan. Na jatunachu can” ninmi. Donate.jw.org paginapi quiquinguna contribuciongunata cushpa ayudashcamandami ñavi na ricujuj, ñavi na ali ricuita ushacunapash espiritual micunagutaca charita ushashca. Quiquinguna contribuciongunata cushpa ayudashcamandaca ninandami agradicinchi.