Jehová Diosca paipa sirvijcunataca salvangami

“Shinaca Jehová Diosca, paita tucui shunguhuan sirvij gentecuna pruebacunapi cajpica salvanmi.” (2 PED. 2:9)

¿IMATATA NIPANGUIMAN?

Jehová Dios paipa voluntadta pai nishca tiempopi pactachinataca ¿imamandata seguro caita ushanchi?

¿Imamandata paipa sirvijcunata salvangapaj Jehová Dios paipa poderta utilizanataca seguro caita ushapanchi?

Jipa punllacunapi imacunalla pasanata Jehová Dios yachashcataca ¿imamandata seguro caita ushapanchi?

1. Jehovapa ‘jatun punllapica’ ¿imacunallata pasanga?

SATANASPA cai nali mundotaca, Jehová Diosca na yashcapimi tucuchinga (1 Tes. 5:​2, 3). Jehovapa ‘jatun punlla’ chayamujpica mundo enteromi manllarishpa turbaringa (Sof. 1:​14-​17). Chai tiempopica llaquicunaca ashtahuanmi miranga. Chaimandami Bibliapica chai tiempomanda parlashpaca cashna nin: “Chashna llaqui tiempoca, cai mundota rurashca punllacunamandapacha cunangamanbash nunca nara tiashcachu” (Mateo 24:21, 22​ta liipangui).

2, 3. a) Jehovata sirvijcunahuanga, Ninan Manllanai Llaqui Punllacunapica ¿imata pasanga? b) Aguantachunga ¿imata ayudanga?

² Ninan Manllanai Llaqui Punllacuna tucurinallapimi Magog llactamanda Gogca, Jehovata sirvijcunataca ninanda atacanga. Chaipaca “ninan shinlli, ashtacapacha soldadocunami”, Jehovata sirvijcunataca fuyu quilpanshna ninanda llaquichinga (Eze. 38:​2, 14-​16). Chai tiempopica cai alpapi organizaciongunaca Jehovata sirvijcunataca na ayudangachu. Chaipica solo Jehovallami salvaita ushanga. Entonces shina atacajta ricushpaca ¿imatashi rurashun?

³ Chaipaca, Ninan Manllanai Llaqui Punllacunapi Jehová Dios salvanataca ¿ciertopachachu crini? nishpami pensarina capanchi. Chaimanda parlashpami apóstol Pedroca cashna nirca: “Shinaca Jehová Diosca, paita tucui shunguhuan sirvij gentecuna pruebacunapi cajpica salvanmi. Pero nali gentecunataca, juicio punllapi tucuchi tucuchunmi alichishcalla o huacaichishcalla charijun” (2 Ped. 2:9). Punda tiempocunapi Jehová Dios paipa sirvijcunata imashina salvashcata yuyarinami, shamuj punllacunapi llaquicunata aguantachun ayudanga. Shinaca 3 ejemplocunata ricupashunchi. Chai ejemplocunaca Jehová Dios paipa sirvijcunata salvangapaj poderta charishcata seguro cachunmi ayudanga.

NINAN MANLLANAI TAMIAMANDAMI SALVARIRCA

4. ¿Imatata Jehová Diosca ña decidishcalla carca?

⁴ Ninan Manllanai Tamiapi ima pasashcata yaripashunchi. Jehová Diosca paipa munai pactarichunmi imahora tamianataca ña decidishcalla carca. Ninan Manllanai Tamia nara chayamujpillatami arcata rurana carca y animalcunapash ña yaicuchishcalla cana carca. Jehová Diosca imahora tamianata decidingapaca arcata tucuchichunga na shuyarcachu. Más bien Génesis libropi nishcashnaca, arcata rurachun Noeta nara mandashpallatami Jehová Diosca imahora tamianataca ña decidishcalla carca. Chaitaca ¿imashinata yachapanchi?

5. Génesis 6:3​pi shimicunaca ¿imatata ricuchijurca? Chai shimicunataca ¿ima huatapita villarca?

⁵ Jehová Diosca jahua cielopillatami Génesis 6:3​pi shimicunataca nirca. Paica cashnami nirca: “Ñucaca na para siemprechu gentecunataca aguantajushalla. Porque paicunaca pecadorcunami can. Chaimandami paicunaca solo 120 añostalla causanga”. Cai shimicunahuanga ¿gentecuna mashna huatacunata causanatachu nijurca? Na, na chaitaca nijurcachu. Chaipa randica tucuilla nali gentecunata imahora tucuchinatami villajurca.a Jesús cai alpaman nara shamujpillata 2370​pimi alpa entero manllanaita tamiarca. Shinaca 2490 huatapimi Jehová Diosca chai shimicunataca villashcanga. Chai tiempopaca Noeca 480 añostami charirca (Gén. 7:6). Y 20 huatacuna jipa 2470 huatapimi Noepa primer churi nacirca (Gén. 5:​32). Ninan Manllanai Tamia chayamuchunga 100 huatacunami faltajurca. Shinapash gentecuna ama tucurichun Noé imata ruragrijushcataca, Jehová Diosca nara paimanga villashcarcachu. Shinaca ¿imahorashi Jehová Diosca chaitaca villarca?

6. Noeca ¿imahorata arcata rurana mandatotaca chasquirca?

⁶ Imashinami ricupanchi, Jehová Dios imata ruragrijushcataca Noeca tauca huatacuna jipami yachaj chayarca. ¿Imamandata shina nipanchi? Porque Bibliapi nishcashnaca, Noeta arcata rurachun Jehová Dios mandajuj horasca, Noepa churicunaca ña cazadocunami carca. Jehová Diosca Noetaca cashnami nirca: “Ñucaca canhuanmi shuj tratota rurajuni. Arcamanga canba churicunahuan, canba huarmihuan y canba jachungunahuanbashmi yaicuna cangui” (Gén. 6:​9-​18). Shinaca Noeca, Ninan Manllanai Tamiapa más o menos 40 o 50 años faltajpimi arcata rurana mandatotaca chasquirca.

7. a) Feta charishcataca ¿imashinata Noepash, paipa familiapash ricuchirca? b) Ninan Manllanai Tamia imahorapacha chayamunataca ¿imahorata Jehová Diosca Noemanga villarca?

⁷ Noepash paipa familiapash arcata ruranajushpaca, Jehovapa voluntadca imashinashi pactaringa y Ninan Manllanai Tamiapash imahorashi chayamunga nishpami tapurinajushcanga. Chaicunata na yachashpapash arcataca tucuchingacamanmi rurashpa catirca. Chaimi Bibliapica cashna nin: ‘Noeca Taita Dios tucui imata mandashcatami rurarca. Taita Dios nishcashnami rurarca’ (Gén. 6:​22). Ninan Manllanai Tamia imahora chayamunataca, tamiangapaj 7 punllacunalla faltajpimi Jehová Diosca chaira villarca. Y Noeca paipa familiandi arcaman yaicungapaj y animalcunatapash arcaman yaicuchingapaca 7 punllacunatami charirca. Shinami ‘Noé 600 añosta charijpi y segundo quillapa punlla número 17​paca’ tucui listo carca. Chai punllami, “jahua cielopi tiashca tucuilla yacucunaca talirimurca” (Gén. 7:​1-5, 11).

8. Ninan Manllanai Tamiapi ima pasashcata yachajunaca ¿imashinata ayudan?

⁸ Ninan Manllanai Tamiapi ima pasashcata yachajunaca Jehová Dios tiempota alipacha controlai ushashcata y paipa sirvijcunata salvai ushashcatapash seguro cachunmi ayudan. Cai mundo tucurichunga ña ashalagullami faltan. Y Jehová Diospa shimicuna pai nishca tiempopipacha pactarinataca seguropachami caita ushapanchi. Pai nishca punllapi y horaspimi pactachinga (Mat. 24:36; Habacuc 2:3​ta liipangui).

ISRAELITACUNACA MAR ROJOPIMI SALVAI TUCURCA

9, 10. Faraonda umachingapaca ¿imatata Jehová Diosca rurarca?

⁹ Chaishuj parrafocunapica, Jehová Dios paipa voluntadtaca pai agllashca tiempopi pactachijtami yachajupashcanchi. Cai cati ejemplopashmi, Jehová Dios paipa sirvijcunata salvai ushashcata seguro cachun ayudanga. Jehová Diosca paipa ninan poderhuanmi paipa voluntadtaca tucuillata pactachinga. Jehová Diosca paipa sirvijcunata imashina salvanataca alimi yachan. Chaimi huaquinbica paipa sirvijcunatallata utilizashpa paipa contracunataca mishashca. Y Egiptomanda israelitacunata salvangapaca Jehová Diosca shinami rurarca.

¹⁰ Más o menos 3 millón israelitacunami Egiptomandaca llujshishcanga. Moisés israelitacunahuan maita rinajujta ricushpami, chingashcami purinajun nishpa Faraonga pensarca (Éxodo 14:​1-4​ta liipangui). Chaimi Faraonga israelitacunaca Mar Rojotaca na yali ushangachu, chaipimi paicunataca japishun nishpa paipa soldadocunandi catiria rirca. Shinami Faraonga Jehovapa trampapi urmarca (Éx. 14:​5-​10). Shinapash israelitacunataca nima na pasagrijurcachu. Porque Jehová Diosmi paicunataca ayudagrijurca.

11, 12. a) Jehová Diosca ¿imashinata israelitacunataca ayudarca? b) Egipciocunahuanga ¿imata pasarca? Y chaimandaca ¿imatata yachajupanchi?

¹¹ Israelitacunata ñaupashpa rijuj “fuyu columnaca” paicunapa huashamanmi yalirca. Shinami Faraonba soldadocunaca yana yanapi quidashpa israelitacunataca ñana atacaita usharca. Cutin israelitacunataca chai columnaca tutapi punchayachishpami ayudarca (Éxodo 14:19, 20​ta liipangui). Chai jipaca Jehová Diosca shuj shinlli huairata cachamushpami Mar Rojotaca chaupirca. Mar yacu chaupirichunga ‘tuta enteromi shinllita huairashcanga’. Shinami israelitacunaca “chaquishca alpata yalirca”. Faraonba soldadocunahuan ricujpica israelitacunaca alimandami rinajurca. Shinapash Faraonba soldadocunaca israelitacunataca na japita usharcachu. Porque Jehová Diosmi israelitacunapa lado carca. “Chaimi egipciocunaca ninanda manllarishpa imata ruranatapash na atinanajurca”. Shinallata carretacunapa ruedacunatapash Taita Dios “llujchishcamandami paicunaca carretacunata manejaitapash na ushanajurca” (Éx. 14:21-​25).

¹² Mar Rojota yalishca jipaca, Jehová Diosca Moisestaca cashna nishpami mandarca: “Egipciocunapa, paicunapa guerra carretacunapa y caballocunapi tiarishca soldadocunapa jahuapi mar yacu shitarimuchunga, mar yacuman señalashpa canba maquipi vara caspitaca alzai”. “Egipciocunaca escaparingapami munarca. Pero Jehová Diosca mar yacu chaupimanmi egipciocunataca shitarca”. Egipciocunaca ni maiman na escaparita usharcachu. “Paicunamandaca ni shuj na salvarircachu” (Éx. 14:26-​28).Shinami Jehová Diosca ima peligropi cajpipash, paipa sirvijcunata salvangapaj poderta charishcata ricuchirca.

JERUSALENHUAN IGUAL TUCUCHI TUCUNAMANDAMI SALVARIRCA

13. Jesusca ¿ima instrucciongunatata curca? Cristianocunaca ¿imatashi tapurishcanga?

¹³ Jehová Diosca jipa punllacunapi ima pasanata ali yachaimandaca, paipa voluntadtaca seguromi pactachinga. Chaitami cai cati ejemplopica ricugripanchi. Primer siglopica romano soldadocunami Jerusalenda atacagrinajurca. Chaimandami Jehová Diosca, Jerusalenbi y Judeapi cristianocuna imashina salvarinata yachachunga, Jesusta utilizashpa huaquin instrucciongunata curca. Porque chai llactaca huata 70​pimi tucuchi tucugrijurca. Jesusca cristianocunataca cashnami nirca: “Shinaca profeta Daniel nishca shinami, tucuita tucuchij millanai llactataca Taita Diospa pushtupi shayajujta ricunguichi. [...] Shinaca, Judea llactapi cajcunaca urcucunapi pacajungapami calpana can” (Mat. 24:15, 16). Shinapash chai profecía pactarijushcataca ¿imashinata Jesuspa catijcunaca cuenta japina carca?

14. Jesuspa shimicunaca ¿imashinata pactarijurca?

¹⁴ Huata 66​pi Cestio Galo dirigijpimi romano soldadocunaca Jerusalenman chayamurca. Paicunaca judiocunapa huelgacunata jarcangapami shamunajurca. Chaita ricushpami celotecunaca templopi pacajugrirca. Chaimi romano soldadocunaca pircacunata urmachingapaj munarca. Shina pasajujta ricushpami pendiente causanajushca cristianocunaca, Jesuspa shimicuna pactarijujta cuenta japirca. ‘Tucuita tucuchij millanai llactaca’ paicunapa idolocunahuan shamushca romano soldadocunami carca. Cutin ‘Taita Diospa pushtuca’ templopa pircacunami carca. Shina shamunajujta ricushpami Jesuspa catijcunaca ‘urcucunapi pacajugrina’ cashcata intindirca. Shinapash romano soldadocuna muyundi llactapi shayanajujpica ¿imashinata llujshita ushana carca? Huaquin cosascunami cambiagrijurca.

15, 16. a) Jesusca ¿ima instrucciongunatata curca? ¿Imamandata cristianocunaca chai instrucciongunataca catinapacha carca? b) Salvaringapaca ¿imatata rurana capanchi?

¹⁵ Na yashcapimi Cestio Galoca paipa soldadocunandi Jerusalenmanda rirca. Y celotecunapash paicunata atacangapami catiria rirca. Romanocunapash, celotecunapash illajpimi Jesusta catijcunata escapana oportunidadta charirca. Shinapash paicunaca Jesús nishcashnami tucuita saquishpa ligero calpashpa rina carca (Mateo 24:17, 18​ta liipangui). ¿Imamandata ligero llujshina carca? Porque asha punllacuna jipallami, celotecuna cutin tigramushpa Jerusalenbi y Judeapi causajcunataca huelgacunapi apoyachun obligai callarirca. Chaimandami chai llactapi causaica ashtahuan ashtahuan empeorajurca. Y chai llactamanda llujshinapash ashtahuan dificilmi carca. Huata 70​pi romanocuna tigramujpicarin ni pi ñana llujshita usharcachu (Luc. 19:43). Na ligero llujshishcacunaca na salvarircachu. Shinapash Jesuspa instrucciongunata cazushca cristianocunaca, urcucunaman pacajugrishpami salvarirca. Shinami paicunaca Jehová Dios paipa sirvijcunata salvai ushashcata ricurca. Caimandaca ¿imatata yachajupanchi?

¹⁶ Ninan Manllanai Llaqui Punllacuna tiempopica huaquin profeciacunami asha asha pactaringa. Chaimi chai tiempopica Bibliata y paipa organizacionda utilizashpa Jehová Dios cushca instrucciongunata catina tucushun. Por ejemplo, Jesusca urcucunapi pacajugrichi nishpami mandarca. Chai mandatotaca Ninan Manllanai Llaqui Punllacuna tiempopipashmi cazuna tucushun. Pero maimanbacha pacajugrina cashcataca na yachanchichu.b Shinapash Jehová Diosca huaquin instrucciongunata imashina pactachinataca minishtirishca tiempopimi intindichinga. Chaitaca seguromi caita ushapanchi. Chai tiempopica cazushpallami salvarita ushapashun. Chaimandami cashna tapurina capanchi: “Jehová Dios cushca instrucciongunamandaca ¿imatata pensani? Chai instrucciongunataca ¿jaicatachu cazuni?”​(Sant. 3:​17).

JIPA PUNLLACUNATA AMA MANLLACHUNMI JEHOVÁ DIOSCA AYUDAJUN

17. Habacucpa profeciamandaca ¿imatata yachajupanchi?

¹⁷ Párrafo 2​pica Magog llactamanda Gog Jehovapa sirvijcunata atacanatami parlaparcanchi. Chaimanda parlashpami profeta Habacucca cashna nirca: “Chaita uyashpami, vijsa ucucaman manllarircani. Rimajta uyashpaca, ñuca shimipashmi chujchurca. Ñuca tullucunapash ismujunshna tucushpami, ñuca shungupica chujchujurcani. Gentecunata llaquichingapaj, paicunapaj soldadocunahuan vichai shamujpipash, ñucaca chai ninan llaqui punllapica, casilla tiajushallami” (Hab. 3:​16). Profeta Habacucca Jehovapa sirvijcunata ima pasanata uyashcandimi, yapata manllarishpami shimicunapash chujchushpa fuerza illanshna quidarca. Habacuc imashina sintirishcata ricushpami, Gog atacajuj horas imashina canata cuenta japipanchi. Shinapash profeta Habacuc cuentami Jehová Dios paipa punllapi ñucanchita salvanata confiana capanchi​(Hab. 3:​18, 19).

18. a) Shamuj punllacunapi ima pasanataca ¿imamandata na manllana canchi? b) Cati temapica ¿imatata yachajupashun?

¹⁸ Cai quimsa ejemplocunapica Jehová Dios paipa sirvijcunata ciertopacha salvai ushashcatami ricupashcanchi. Jehová Diospa voluntad pactarichunga nima na jarcaita ushangachu. Shinapash Jehová Dios tucuita imashina mishajta ricungapaca, ultimocamanmi paitalla cazushpa causana canchi. Pero cunanbillata paita cazushpa causachunga ¿imashinata Jehová Diosca ayudajun? Chaitaca cati temapimi ricupashun.

[Notas]

[Foto]

¿Faraonba soldadocunaca israelitacunataca llaquichita ushanachu carca?