YAĆHACHICUY 18
¿Imanuypam yaćhaśhun mayancuna rasunpa cristianucuna caśhanta?
Llapan yupay nunacunam nipäcun: Cristianum cayä, masqui chayta nilpis jucta-juctam yaćhachipäcun manam Jesús yaćhachiśhannüchu cawsapäcun. Cayćhumi yaćhaśhun, ¿mayancuna rasunpa cristianucuna caśhanta?
1. ¿Imanuymi canman rasunpa cristianuca?
Rasunpa cristianucunaca Jesuspa atinincunam (liguicuy Hechos 11:26). ¿Imanuypam licachin paypa atinincuna caśhanta? Jesús nila: “Amcuna willacuynïćhu masïsu tacyapäcul’a rasunpa [atinïcunam] cayalcanqui” (Juan 8:31). Cay yaćhachimanchic rasunpa cristianucunaca Jesuspa mandaśhantam cäsuculcan. Chaymi rasunpa cristianucunaca Jesusnümi Bibliapi yaćhachipäcun (liguicuy Lucas 24:26).
2. ¿Imanuypam licachipäcun cuyayta rasunpa cristianucunaca?
Jesús mandala atinincunacta caytam: “Ya’a cuyapäcuśhacnuy quiquiqui pulapis cuyanaculcay” (Juan 15:12). ¿Imanuypam licachila Jesús atinincunacta cuyaśhanta imactapis lulaśhanwan? Pay tiempunchacula atinincunapä, callpanchananpä, yanapananpä ñatac paycunapïmi wañula (1 Juan 3:16). Rasunpa cristianucunaca licachipäcun limaśhancunawan, lulaśhancunawan cuyanacuśhanta, paycuna Jesusnümi lulapäcun.
3. ¿Ima puydi trabajuctam lulapäcun rasunpa cristianucunaca?
Jesusmi mandala atinincunacta, “Diospa gubirnunpi willacü lipäcuy” (Lucas 9:1). Punta cristianucunaca manam utunacuśhallanćhuchu willaculcala, sinu’a callecunaćhupis, plazacunaćhupis, wasin-wasinpis willaculcalam (liguicuy Hechos 5:42; 17:17). Chaynümi canan tiempućhu rasunpa cristianucunapis Diospi willacuyalcan mayćhu calpis. Nunamasincunacta cuyaśhanpïmi, tiempunchacun ñatac callpanchacun Bibliapi yaćhachinanpä (Marcos 12:31).
MASTA YAĆHAYCUŚHUN
Yaćhaśhun imanuy nuna caśhanta rasunpa cristianucunaca, ñatac ima lulaśhancunacta.
4. Rasunpa cristianucunaca Bibliata nishantam cäsucuyalcan
Punta cristianucunaca Bibliaca nishantam cäsupäcula.
Manam llapanchu cristianum cä nïcunaca, Bibliata entindipäcun nï cäsuculcanchu Bibliapa nishanta. Licaśhun VIDEUCTA ñatac limaśhun caypi:
¿Imanuycunapmi achca iglesiacuna calupächila nunacunata Diospi?
Jesús yaćhachila Bibliapimi. Liguiśhun Juan 18:37 ñatac limaśhun caypi:
Jesús nishannü, ¿imanuypam yaćhaśhun mayancuna rasunpa cristianucuna caśhanta?
5. Rasunpa cristianucunaca willacuyalcan Bibliapimi
Punta cristianucunaca willaculcalam.
Jesús manalapis cieluta lil, mandala atinincunacta enterun allpaćhu willaculcananpä. Liguiśhun Mateo 28:19, 20 ñatac Hechos 1:8, ñatac limaśhun caypi:
¿Imaycamam ñatac maycamam Diospi willacunan cala?
6. Rasunpa cristianucunaca willacuśhannümi cawsapäcun
Tom śhutiyü nunaca rasuncäta taliśhanta nin. Licaśhun VIDEUCTA ñatac limaśhun caypi:
¿Imapïmi Tom manaña mayannin iglesiacunapipis yaćhayta munalachu?
¿Imapïmi Tom seguruña cayan rasuncäta taliśhampi?
Rasunpa cristianucunaca yaćhachiśhannümi cawsapäcun. Liguiśhun Mateo 7:21 ñatac limaśhun caypi:
¿Imam mas puydin Jesuspä: nishallanchicchun o Diospa munaśhanta lulashanchicchun?
7. Rasunpa cristianucunaca quiquinpulam cuyanaculcan
Punta cristianucunaca quiquinpulam cuyanaculcala.
Rasunpa cristianucunaca hermanuncunapï hasta vidantapis wañuypa patanmanmi ćhulaycula. Licaśhun VIDEUCTA ñatac limaśhun caypi:
¿Imapïmi Lloyd śhutiyü hermanunchic Johanssunta mana wañuchinanpä cuidaycula?
Pay lulaśhanwan, ¿licachilachun rasunpa cristiano caśhanta?
Liguiśhun Juan 13:34, 35 ñatac limaśhun caypi:
¿Rasunpa cristianucunaca ćhïnipäcunchun juc colorniyü nunacunacta o juc malcayü nunacunacta?
¿Rasunpa cristianucunaca lipäcunchun guerraman?
WAQUINCUNA NIPÄCUN: “Religiosucunaca envidioso camam chaymi mana imactapis yaćhayta munanchu”.
¿Ima textuctam liguinquiman mayancuna rasunpa cristianucuna caśhanta yaćhachinayquipä?
IMACTAM YAĆHALUNCHIC
Rasunpa cristianucunaca Bibliapa nishantam cäsuculcan, nunamasincunacta cuyaypïmi yanapaycalin ñatac Bibliapi willaculcan.
Yalpaśhun
¿Rasunpa cristianucunaca Bibliaca nishantanüchun lulapäcun?
¿Imanuy nunam capäcun rasunpa cristianucunaca?
¿Imactam lulapäcun nunamasinta cuyaypï?
MASTA YAĆHANAYQUIPÄ
Mayancunam callpanchacuyalcan Jesuspa yaćhachiśhanmannü cawsapäcunanpä, licay videucta.
Juc monjam Jehovapa testigunman muyula, cayta yaćhanayquipä liguicuy.
“Contestaron todas mis preguntas con la Biblia” (La Atalaya, 1 de abril de 2014)
Rasunpa cristianucunaca hermanuncunacta cuyaypïmi yanapapäcun, licay videucta.
Ayudamos a nuestros hermanos cuando se produce un desastre (fragmento) (3:57)
¿Imanuy nunam capäcula punta cristianucunaca, ñatac imanuy nunam capäcun canan tiempo cristianucunaca? Cayta yaćhanayquipä liguicuy.
“¿Qué identifica a los cristianos verdaderos?” (La Atalaya, 1 de marzo de 2012)