Quipa punzhacunapi causaica ¿ima shinashi canga?

BIBLIAPICA CAITAMI NIN

“Diosca... tucui huiquitami ñahuicunamantaca pichanga. Huañuipish, llaquilla canapish, huacaicunapish, nanaicunapish ña mana tiyangachu. Ñaupaman ima tiyashcapish cunanca ña mana tiyangachu.” (Apocalipsis 21:3, 4, Biblia en Quichua Cañar.)

CAI JAHUA YACHACUNACA ¿IMAMANTATAC ALLI CAN?

Tucuicuna alli trabajota charishpa cushicushun (Isaías 65:21-23).

Ungushpa, llaquilla canapish ña mana tiyangachu (Isaías 25:8; 33:24).

Unai unaicaman tucuicunahuan cushillami causashun (Salmo 37:11, 29).

BIBLIAPI NISHCATACA ¿CRINACHU CANCHIC?

Ari. Caipica ishcai yuyaicunamanta ricushun:

• Diosllami cai nishcacunata pactachi pudin. Bibliapica Diosllatami “tucui imatapish ruhuac” nin, paimanca imapish mana atinchu (Apocalipsis 15:3). Shinaca, Dios cai allpata allichisha nishcataca, pactachingatacmi. Chaimantami, pai pactachina cashcataca tucui shunguhuan crinchic. Bibliapica, “Diosmanca imapish ruhuaipacllami” can ninmi (Mateo 19:26).

• Diosmi cai nishcacunata pactachinata munan. Por ejemplo, Jehová Diosca tucui huañushcacunata causachinatami munan nishpami, Bibliapica yachachin (Job 14:14, 15).

  Shinallatac, Jesusca ungushcacunata jambirca nishpapish yachachinmi. ¿Imamantashi chashna ruhuarca? Pai munashcamantami chashna ruhuarca (Marcos 1:40, 41). Jesusca paipac ruhuashcacunahuanmi ricuchirca, paipac Taitapac munaipish chashnallatac cashcata (Juan 5:19).

  Cai jahua yachacushpami, Jehová Diospish, Jesuspish ñucanchicman quipa punzhacunapi alli causaita cusha nishcataca tucui shunguhuan crinchic (Salmo 72:12-14; 145:16; 2 Pedro 3:9).