¿Pitac cai pachataca mandacun?

BIBLIAPICA CAITAMI NIN

“Cai pachapaclla causaccunataca diablo mandacushcatami yachanchic.” (1 Juan 5:19, Biblia en Quichua Cañar.)

“Diospac Churica diablo imata ruhuacushcata chingachingapacmi shamurca.” (1 Juan 3:8, Biblia en Quichua Cañar.)

CAI JAHUA YACHACUNACA ¿IMAMANTATAC ALLI CAN?

Llaquicuna imamanta tiyai callarishcatami entendishun (Apocalipsis 12:12).

Cai pacha allichirichunmi shuyanchic (1 Juan 2:17).

BIBLIAPI NISHCATACA ¿CRINACHU CANCHIC?

Ari. Caipica quimsa yuyaicunamanta ricushun:

• Diablo mandanaca tucuringami. Jehová Diosca, cai pachata mandac millai diablotaca tucuchisha nishcami. Paica “diablotaca” chingachingatacmi. Shinallatac, tucui mana alli ruhuashcacunatapish allichingami (Hebreos 2:14).

• Diosmi Jesustaca mandachun acllashca. Millai diablo mana allita ruhuashpa mandac cashca cacpipish, Jesusca tucui allita ruhuashpami mandanga. Jesús mandana jahua Dios rimashpaca: “Imata mana chariccunatapish, huacchacunatapish llaquishpami...paicunapac causaitaca llaquimantapish quishpichinga” ninmi (Salmo 72:13, 14).

• Diosca mana llullanchu. Bibliapica ninmi, “Diosca mana aichayuc runa shina llullacchu” (Números 23:19). Chaimantami, Jehová Dios imata ruhuasha nishcapica seguro canchic (Isaías 55:10, 11). Paica “cai pachata mandactaca llucchishpa shitashca canga” nishcami (Juan 12:31).