Quiquinmanca Bibliaca ¿imatac can?

BIBLIAPICA CAITAMI NIN

“Dios quillcachishcaca tucuimi Diosllatac yuyaita cushpa quillcachishca.” (2 Timoteo 3:16, Biblia en Quichua Cañar.)

CAI JAHUA YACHACUNACA ¿IMAMANTATAC ALLI CAN?

Ñucanchic causaipi ima tapurishcacunataca Bibliami cutichinga (Proverbios 2:1-5).

Punzhanta alli causangapacca Bibliami yachachinga (Salmo 119:105).

Quipaman alli causai tiyanatami yachashun (Romanos 15:4).

BIBLIAPI NISHCATACA ¿CRINACHU CANCHIC?

Ari. Caipica quimsa yuyaicunatami ricushun:

• Shuc yuyaillamantami parlan. Bibliataca 40 runacunami 1600 huatacunapi quillcashca. Paicunapuraca mana ricsinacurcacunachu, shina cacpipish Bibliapica shuc yuyaillami tiyan.

• Imata mana pacanchu. Historiata quillcaccunaca maijan mana alli ruhuashcacunataca pacancunami. Shinapish Bibliata quillcaccunaca paicunallatac pandarishcatapish o paicunapac llactacuna mana allita ruhuashcatapish mana pacashpami claritota quillcashcacuna (2 Crónicas 36:15, 16; Salmo 51:1-4).

• Bibliapi huillashcacunaca pactashpami caticun. Bibliapica Babilonia pueblo ima shina tucurinataca 200 huatacuna siricpiracmi huillarca (Isaías 13:17-22). Chaipica mana ima shina tucurinallatachu huillan, ashtahuancarin pi tucuchina cashcatami huillan (Isaías 45:1-3).

  Bibliapi huillashcacunaca tucuimi pactashpa catin. Caita yachashpaca Bibliata Dios quillcachishca cashcataca ¿manchu crina canchic? (2 Pedro 1:21).