¿Familia ucupi cushilla causangapacca imashi minishtirin?

BIBLIAPICA CAITAMI NIN

“Maijanpish Dios rimashcata uyashpa cazuccunami, yallita cushicun” (Lucas 11:28, Biblia en Quichua Cañar.)

CAI JAHUA YACHACUNACA ¿IMAMANTATAC ALLI CAN?

Cuyai tiyanga (Efesios 5:28, 29).

Respeto tiyanga (Efesios 5:33).

Cushilla causashun (Marcos 10:6-9).

BIBLIAPI NISHCATACA ¿CRINACHU CANCHIC?

Ari. Caipica ishcai yuyaicunamanta ricushun:

• Diosmi familiataca callarichirca. Bibliapica ninmi, Jehová Diosmi punta runa Adanta, Evatapish ruhuashpa familiata callarichirca (Génesis 2:18-24). Caica ricuchinmi, Dios creashcamanta, familiaca tiyai callarishcata. ¿Imamantatac caita yachanaca alli can?

  Shuc alli, mishquilla micuita micucushcapi yuyai. Cashna mishquilla llucshichunca, imatatac churarcangui nishpaca, ¿pimantac tapunguiman? ¿Manchu chai micunata ruhuacman tapunguiman?

  Shinallatacmi, cambac familia alli, cushilla causachunca, familiata callarichic Jehová Diosmanmi tapuna cangui.

• Diosca tucuicunatami achcata cuyan. Cambac familiahuan, Jehová Diospac consejocunata Bibliapi mashcanami, alli canman. Bibliapica, “paica cancunata cuidacunmi” ninmi (1 Pedro 5:6, 7). Jehová Diosca ñucanchic alli causachunmi munan. Chaimantami, paipac consejocunaca siempremi ayudan. (Proverbios 3:5, 6; Isaías 48:17, 18).