HĀPĪ 1
He koa tuꞌu haīpoīpo mo hahine ki te ꞌAtua
“Te kope aŋa era i te taŋata i te haꞌamata, he aŋa i te tane e i te vahine.” (Mateo 19:4)
A Iehohaa te ꞌAtua, i haka haīpoīpo te taŋata e i te viꞌe raꞌe. Te Puka o te ꞌAtua e kī rō ꞌā ꞌaꞌana i aŋa te viꞌe raꞌe e he vaꞌai ki te taŋata. He koa riva-riva a Atamu e he kī: “I te meꞌe mau e kī era, he ivi o toꞌoku ivi e he kiko o toꞌoku kiko” (Génesis 2:22, 23). Ko te haŋa iŋa ꞌā Iehoha mo koa te nuꞌu haīpoīpo.
E haīpoīpo ena te taŋata, peaha he manaꞌu he meꞌe riva nō te meꞌe ka piri ena. E te parautīꞌa nā e tano rō te mahana he ture, he tātāke no atu te rahi o te rāua haŋa ki a rāua ꞌā (1 Corintios 7:28). I ruŋa i te puka iti-iti nei a koe ka ravaꞌa ena i te roŋo o te Puka o te ꞌAtua, e mo haka tere koe hai ŋā roŋo nei, he haꞌūꞌū atu mo koa tuꞌu haīpoīpo e takoꞌa tuꞌu huaꞌai (Salmo 19:8-11).
1 E HAKA TERE KOE A TE HURU E KĪ ATU ENA E IEHOHA
TE MEꞌE KĪ E TE PUKA O TE ꞌATUA: Te kenu he puꞌoko o te huaꞌai (Efesios 5:23).
Mo ai ko koe te kenu, te meꞌe haŋa a Iehoha e hapaꞌo riva-riva taꞌa viꞌe hai here (1 Pedro 3:7). A Īa i aŋa ai te viꞌe, mo hokorua i taꞌana kenu mo aŋa i te taꞌatoꞌa meꞌe, e ko haŋa ꞌā Iehoha mo moꞌa koe i a īa e mo here hai mahatu (Génesis 2:18). E here koe ki a īa ki te roa era mo tapa tahi taꞌana meꞌe haŋa, raꞌe ki te meꞌe haŋa era e koe (Efesios 5:25-29).
Mo ai ko koe te viꞌe, te meꞌe haŋa a Iehoha e moꞌa rahi i taꞌa kenu ꞌe e haꞌūꞌū mo haka tere riva-riva a te huru haŋa era e te ꞌAtua (1 Corintios 11:3; Efesios 5:33). E haꞌūꞌū koe ki a īa i taꞌana meꞌe haŋa mo aŋa, e ka aŋa peira hai koa (Colosenses 3:18). Mo aŋa koe peira he haŋa rahi atu taꞌa kenu e takoꞌa e Iehoha (1 Pedro 3:1-6).
TAꞌA MEꞌE MO AŊA:
E ꞌui ki taꞌa kenu o ki taꞌa viꞌe he aha taꞌa meꞌe tano mo aŋa mo riro he kenu e he viꞌe hopeꞌa o te riva. Ka haka roŋo riva-riva te meꞌe ka kī atu era e ka uꞌi te raveꞌa mo haka tere peira
ꞌIna ko manaꞌu pe nei ē i te mahana nō e tahi ka ravaꞌa ena nei meꞌe, oīra e haka ꞌuhu koe hai here mo koa kōrua
2 ETAPA HAI MAHATU TE MEꞌE ŊAROꞌA I ROTO I A ĪA
TE MEꞌE KĪ E TE PUKA O TE ꞌATUA: He meꞌe nui-nui mo tapa i te meꞌe haŋa o te viꞌe e i te meꞌe haŋa o te kenu (Filipenses 2:3, 4). Te meꞌe haŋa a Iehoha mo taꞌana nunaꞌa, e moꞌa ꞌe e here ki te taŋata taꞌatoꞌa, oīra e hapaꞌo riva-riva taꞌa kenu e taꞌa viꞌe (2 Timoteo 2:24). Takoꞌa e manaꞌu riva-riva taꞌa meꞌe e kī ena, te Puka o te ꞌAtua e kī rō ꞌā: “Te kope e taꞌe haka topa ena i te manaꞌu raꞌe ki te vānaŋa, e haka mamāe rō ꞌā pahe hoe ꞌoꞌoka, e te meꞌe kī e te kope maramarama he haka ora i a koe” (Proverbios 12:18). Mo te varūa maitai o Iehoha e haꞌūꞌū atu mo vānaŋa koe hai here e hai riva (Gálatas 5:22, 23; Colosenses 4:6).
TAꞌA MEꞌE MO AŊA:
Raꞌe ki te vānaŋa i te meꞌe nui-nui ki taꞌa viꞌe o ki taꞌa kenu, ka nonoꞌi ki te ꞌAtua mo vaꞌai atu i te haumarū e takoꞌa mo ꞌite koe mo haka roŋo riva-riva
E manaꞌu riva-riva taꞌa meꞌe ka kī ena e pe hē ka kī ena
3 INA KO REHU HOKORUA KŌRUA
TE MEꞌE KĪ E TE PUKA O TE ꞌATUA: E haīpoīpo ena te taŋata e te viꞌe, he tuꞌu he riro e tahi nō hakari (Mateo 19:5). No atu nei meꞌe, e ai rō ꞌā te hora e manaꞌu kē rō ꞌā kōrua, oīra e uꞌi te raveꞌa mo manaꞌu ko tū manaꞌu ꞌā e mo ŋaroꞌa ko tū meꞌe ꞌā (Filipenses 2:2). He ꞌoti mau ꞌā te raveꞌa nei mo titīka te kōrua aŋa. ¿Pe hē ana ravaꞌa? Te Puka o te ꞌAtua e kī rō ꞌā: “Hai ꞌui ki te rua, te meꞌe haŋa ꞌaꞌau mo aŋa, ka riva ena” (Proverbios 20:18). E haka tere kōrua hai roŋo o te Puka o te ꞌAtua, ana haŋa mo aŋa e tahi meꞌe (Proverbios 8:32, 33).
TAꞌA MEꞌE MO AŊA:
Mo vānaŋa kōrua ꞌina ko vānaŋa a ruŋa ꞌā, ka vānaŋa o ruŋa i te meꞌe haka mamāe, tipa-tipa, taꞌa meꞌe haŋa e taꞌa meꞌe taꞌe haŋa ena
Raꞌe ki te aŋa koe e tahi meꞌe, e ꞌui ki taꞌa kenu o ki taꞌa viꞌe
a Te Puka o te ꞌAtua e kī rō ꞌā te ꞌīŋoa o te ꞌAtua ko Iehoha.