HĀPĪ 2
ꞌIna ko hape ki taꞌa kenu o ki taꞌa viꞌe
“Te meꞌe haka piri e te ꞌAtua ꞌina ko haꞌataꞌa e tahi taŋata.” (Marcos 10:9)
Ko haŋa ꞌā Iehoha mo taꞌe hape koe ki tuꞌu hokorua ki te hora hopeꞌa (Malaquías 2:16). He meꞌe nui-nui te meꞌe nei i roto i te haīpoīpo, o te ai mo hape koe, e ko moꞌa, e ko tapa, e ko haka roŋo haka ꞌou atu tuꞌu hokorua o te ai paꞌi ko hape ꞌā koe ki a īa. Oīra mo haŋa kōrua mo nui-nui mo oho te kōrua here i roto i a kōrua, ꞌina ko aŋa i te meꞌe taꞌe tano nei.
I aŋanirā ko haꞌataꞌa ko oho ꞌā te nuꞌu haīpoīpo. Oīra mo hapaꞌo tuꞌu haīpoīpo, e maꞌu te haŋa i roto i tuꞌu mahatu mo aŋa i te ŋā meꞌe nei e rua.
1 E TAPA RIVA-RIVA KOE I TAꞌA VIꞌE O TAꞌA KENU RAꞌE KI TE TAHI
TE MEꞌE KĪ E TE PUKA O TE ꞌATUA: “E tapa riva-riva kōrua i te meꞌe hopeꞌa o te nui-nui” (Filipenses 1:10). Taꞌa viꞌe o taꞌa kenu e riro he meꞌe nui-nui maꞌau e peira koe ana uꞌi.
Ko haŋa ꞌā Iehoha mo uꞌi e koe ki taꞌa viꞌe nō e mo koa hokorua kōrua (Eclesiastés 9:9). Ko kī ꞌā e Iehoha ꞌina ko haka rē te hapaꞌo te oho i taꞌa kenu i taꞌa viꞌe, te meꞌe haŋa ꞌaꞌana he haka koa koe i tuꞌu hokorua (1 Corintios 10:24). E haka ꞌite ki taꞌa kenu o ki taꞌa viꞌe pe nei ē, he meꞌe nui-nui a īa moꞌou e takoꞌa e tapa rō ꞌā koe i a īa.
TAꞌA MEꞌE MO AŊA:
Paurō te mahana ana haꞌataꞌa te hora mo vānaŋa, mo koa, mo here ki tuꞌu hokorua
E manaꞌu hokorua kōrua, taꞌe ko koe nō
2 E HAPAꞌO TUꞌU MAHATU
TE MEꞌE KĪ E TE PUKA O TE ꞌATUA: “Taꞌatoꞌa taŋata e uꞌi e oho ena ki te viꞌe e tahi, hai pohe taꞌe tano, ko taiꞌata ꞌā i roto i toꞌona mahatu” (Mateo 5:28). Mo manaꞌu mo oho e tahi o kōrua i te manaꞌu rake-rake, taiꞌata e hano-hano, mo meꞌe peira ko hape ꞌā ki toꞌona hokorua.
Kī ꞌā Iehoha e “hapaꞌo tuꞌu mahatu” (Proverbios 4:23; Jeremías 17:9). Mo tuꞌu ki te roa nei, e uꞌi riva-riva taꞌa meꞌe e uꞌi ena (Mateo 5:29, 30). E aŋa koe pē Job i tapura ai hai toꞌona mata mo taꞌe uꞌi hai pohe ki te rua viꞌe (Job 31:1). Oīra ꞌina ko mataꞌitaꞌi te pornografía. E takoꞌa e uꞌi o pohe rō ki te rua, mo ai taꞌe he kenu o he viꞌe ꞌaꞌau.
TAꞌA MEꞌE MO AŊA:
Ka haka tikeꞌa riva-riva ki te tahi te rahi o tuꞌu haŋa ki tuꞌu hokorua
E moꞌa ꞌe e tapa te meꞌe manaꞌu, te meꞌe ŋaroꞌa o tuꞌu hokorua. Oīra mo uꞌi atu e tahi kope hai pohe, ka haka tapa rō ai koe o te ai e ko tano ki te manaꞌu o tuꞌu hokorua