HĀPĪ 5
Pe hē ana taꞌe ture māua ko te huaꞌai o toꞌoku hokorua
E haka tere kōrua pahe taŋata riva, haumarū, ꞌina ko haka nui-nui i a kōrua e ꞌina ko tipa-tipa. (Colosenses 3:12)
E haīpoīpo ena kōrua, i rā hora he riro kōrua he huaꞌai haka ꞌou e tahi, e te taŋata ata nui-nui moꞌou o te ꞌao taꞌatoꞌa i te hora nei, he viꞌe o he kenu ꞌaꞌau. No atu tuꞌu haīpoīpo, e ko haka rē koe te haŋa e te moꞌa te oho i tuꞌu matuꞌa. Peaha, e ai rō te nuꞌu o roto o toꞌona huaꞌai he manaꞌu ko haka tapa ꞌā koe i taꞌa viꞌe o taꞌa kenu mai muri i a rāua, oīra e aŋa rahi era mo uꞌi atu pahe nuꞌu haīpoīpo. Te roŋo o te Puka o te ꞌAtua he riva mo haꞌūꞌū atu mo taꞌe riri koe mo rāua e peira ꞌā mo haka hio-hio mo oho tuꞌu haīpoīpo.
1 ꞌINA KO REHU MO TAPA TAKOꞌA I TE KŌRUA HUAꞌAI
TE MEꞌE KĪ E TE PUKA O TE ꞌATUA: “E moꞌa koe i tuꞌu matuꞌa tane e i tuꞌu matuꞌa vahine” (Efesios 6:2). No atu tuꞌu matahiti, e moꞌa ꞌe e haŋa ki tuꞌu matuꞌa paurō te mahana. ꞌIna ko rehu mo haꞌataꞌa te hora e te mahana mo vari mo uꞌi i te kōrua matuꞌa. Te here ꞌina he mākota, oīra ꞌina koe ko riri e ꞌina koe ko mākota o ruŋa i te huru hahine o tuꞌu hokorua ki toꞌona huaꞌai (1 Corintios 13:4; Gálatas 5:26).
TAꞌA MEꞌE MO AŊA:
ꞌIna ko haka nui-nui te vānaŋa ana kī: “ꞌina e tahi mahana o tuꞌu huaꞌai mo kī ko tano ꞌā taꞌaku meꞌe aŋa” o mo kī “tuꞌu matuꞌa vahine ꞌina he tikeꞌa te meꞌe riva o ruŋa i taꞌaku meꞌe aŋa”
Ka manaꞌu iti-iti koe o ruŋa i te meꞌe manaꞌu, ŋaroꞌa e tuꞌu hokorua
2 MO TANO E HAKA HIO-HIO KOE
TE MEꞌE KĪ E TE PUKA O TE ꞌATUA: “Te taŋata he haka rē i toꞌona matuꞌa tane e i toꞌona matuꞌa vahine, e he piri ki taꞌana viꞌe haīpoīpo, e he riro ararua e tahi nō hakari” (Génesis 2:24). No atu tuꞌu haīpoīpo, ko te manaꞌu haŋa ꞌā tuꞌu matuꞌa mo hapaꞌo mo oho i a koe, e he haŋa mo kī atu pe hē ana haka tere tuꞌu haīpoīpo a te huru manaꞌu era o rāua.
I a kōrua te raveꞌa mo kī, ki roa hē rāua e riva ena mo haꞌūꞌū atu i te kōrua haīpoīpo, e hai here ana kī. E kī koe taꞌa meꞌe haŋa era mo kī hai here e hai moꞌa (Proverbios 15:1). Te haumarū, te taꞌe tipa-tipa rahi, te taꞌe haka nui-nui i a koe, he haꞌūꞌū atu mo piri e mo hio-hio mo oho te kōrua here rāua ko te kōrua huaꞌai, e mo haka ꞌuhu mo oho hai here i roto i a kōrua (Efesios 4:2).
TAꞌA MEꞌE MO AŊA:
Mo ai e tipa-tipa rō ꞌā koe o te ai te kōrua huaꞌai e hahaꞌo rō ꞌā te rāua vae i roto i te kōrua haīpoīpo, ka vānaŋa koīa ko tuꞌu hokorua o ruŋa i te meꞌe nei i te hora era hoko tahi nō kōrua
Hokorua kōrua ana uꞌi he aha te meꞌe mo aŋa mo piri atu te ꞌati