HĀPĪ 3
Pe hē ana riva-riva kōrua mo ai ko ture ꞌā
“E rahi te kōrua here i roto i a kōrua ꞌā, o te ai te here e haka rehu tahi rō ꞌā i te hara.” (1 Pedro 4:8)
E haīpoīpo ena te viꞌe rāua ko te taŋata he tuꞌu te mahana, he ture, he tātāke, he moto o te ai taꞌe ko tū huru manaꞌu ꞌā rāua, e taꞌe ko tū matuꞌa ꞌā i hāpī te rāua haka tere haŋa. Takoꞌa he tātāke rāua o ruŋa i te meꞌe kī e te nuꞌu o haho e takoꞌa o ruŋa i te meꞌe ꞌina kai manaꞌu hīa e rāua.
Koite he manaꞌu kōrua mo taꞌe tapa nei ŋā meꞌe, te tano mau e kī ena e te Puka o te ꞌAtua, e uꞌi te raveꞌa mo vānaŋa mo riva-riva o kōrua (Mateo 5:23, 24). Mo haka tere kōrua hai roŋo o te Puka o te ꞌAtua he ravaꞌa i te raveꞌa riva-riva mo haka titīka te kōrua ture.
1 KA VĀNAŊA O RUŊA I TE KŌRUA TĀTĀKE
TE MEꞌE KĪ E TE PUKA O TE ꞌATUA: “E ai rō ꞌā [...] te hora mo vānaŋa” (Eclesiastés 3:1, 7). Ka haka tapa te hora mo vānaŋa o ruŋa i te kōrua tātāke. Ka kī ki tuꞌu hokorua te parautīꞌa o ruŋa i te meꞌe manaꞌu e meꞌe ŋaroꞌa i roto i a koe o ruŋa i te kōrua ture. Hai parautīꞌa nō koe ana vānaŋa (Efesios 4:25). Mo ai e riri nō ꞌā koe, e haka ꞌuhu mo taꞌe moto. Mo pahono hai haumarū, e ko moto vave kōrua o ruŋa i te meꞌe iti-iti e tahi (Proverbios 15:4; 26:20).
Mo ai kai tano tuꞌu manaꞌu ki te manaꞌu o taꞌa viꞌe o taꞌa kenu, ꞌina koe ko riri, e aŋa e oho i te meꞌe riva ki a īa e takoꞌa e here e moꞌa paurō te mahana (Colosenses 4:6). E uꞌi te raveꞌa mo haka titīka rō ai te kōrua ture, e ꞌina ko haka rē te vānaŋa te oho ki a kōrua (Efesios 4:26).
TAꞌA MEꞌE MO AŊA:
E uꞌi te hora tano mo vānaŋa o ruŋa i te kōrua ture
Mo ai e vānaŋa ꞌā taꞌa viꞌe o taꞌa kenu ka haka roŋo e ꞌina ko haka mou. Nā e tano rō tuꞌu hora mo vānaŋa
2 E HAKA ROŊO, ꞌAI KA TAPA RIVA-RIVA RŌ
TE MEꞌE KĪ E TE PUKA O TE ꞌATUA: “Ka here i roto i a kōrua ꞌā. E i te hora era mo haka tikeꞌa i te moꞌa, mo kōrua e haka tikeꞌa raꞌe” (Romanos 12:10). Te meꞌe hopeꞌa o te nui-nui e ꞌite koe mo haka roŋo riva-riva. Takoꞌa e aŋi-aŋi riva-riva te haꞌauraꞌa o te vānaŋa o taꞌa viꞌe o taꞌa kenu e peira ꞌā e ŋaroꞌa koe i te meꞌe e ŋaroꞌa ena e tuꞌu hokorua ꞌe e uꞌi koe i a īa raꞌe ki a koe (1 Pedro 3:8; Santiago 1:19). ꞌIna ko haka tuꞌu pahe meꞌe era e haka roŋo ꞌā koe ki tuꞌu hokorua, i te hora e vānaŋa atu era e īa. Mo ai e riva rō koe mo haka rē taꞌa meꞌe e aŋa mai ena, ꞌai ka tapa riva-riva rō i tuꞌu hokorua, ka aŋa peira, mo ai ꞌina, ka ꞌui ana ai e riva rō mo vānaŋa i te rua hora. Mo uꞌi koe i taꞌa viꞌe o taꞌa kenu pahe hokorua ꞌoꞌou e taꞌe pahe kope no atu e tahi, e ko haka viku hōrou koe (Eclesiastés 7:9).
TAꞌA MEꞌE MO AŊA:
E haka roŋo koe ki taꞌa viꞌe o ki taꞌa kenu e ꞌina ko eta-eta, no atu te taꞌe tano te meꞌe kī atu era
E aŋi-aŋi riva-riva te haꞌauraꞌa o taꞌana vānaŋa. E uꞌi te huru o toꞌona ꞌariŋa ana vānaŋa atu, pe hē te huru e tuhi atu era e pe hē te huru o toꞌona reꞌo e vānaŋa atu era
3 E HAKA ꞌUHU E OHO
TE MEꞌE KĪ E TE PUKA O TE ꞌATUA: “Mo haka kē koe mo aŋa, he ravaꞌa tahi taꞌa meꞌe haŋa e mo noho mo vānaŋa nō, he veve koe” (Proverbios 14:23). Taꞌe hai vānaŋa nō ana haka titīka te kōrua ture, e aŋa kōrua rā ŋā meꞌe vānaŋa era mo riva-riva iho kōrua. Peaha e aŋa rahi rō mo aŋa i te ŋā meꞌe nei. No atu rā meꞌe he taoꞌa e tahi mo aŋa kōrua peira (Proverbios 10:4). Mo haka piri kōrua ana aŋa, he ravaꞌa kōrua i te hauhaꞌa riva (Eclesiastés 4:9).
TAꞌA MEꞌE MO AŊA:
Ka manaꞌu he aha te meꞌe mo aŋa e koe e tuꞌu hokorua mo riva-riva te kōrua ture
E uꞌi te mahana mo uꞌi ana ai ko titīka ko oho ꞌā te kōrua ture