Ou pé gard out joi mèm si ou viéi

1-2. Koman Jéova i oi son bann sèrvitèr ajé ? (Psom 92:12-14 ; agard osi lo zimaj ).

LA PA tout domoun i réaji parèy kan zot i viéi. Par égzanp, majine in kou : ou rapèl kan ou la vu out promié chevé blan ? Riskab ou la ésèy rach ali avan in moun i oi. Mé ou la konpri k’ou pé tir out chevé blan tank ou vé, sa va pa anpèch aou viéi.

² Koman nout Papa dann sièl i oi son bann sèrvitèr ké la viéi ? (Prov. 16:31). Li di ké banna lé kom bann joli piédboi (lir Psom 92:12-14). Akoz ti légzanp-la i pas bien ? Souvandéfoi, sé bann vié piédboi ké lé pli joli, parské sé zot néna in bonpé fèy èk in bonpé flèr. Inn an parmi bann pli joli piédboi sé lo pié sériz Japon. Néna détroi i dépas juska 1 000 zané é zot lé vréman tro joli. Kom so bann joli piédboi ké lé la dépi lontan, bann sèrvitèr Jéova ké lé ajé lé présié pou li. Jéova i gard pa lo chevé blan mé li aprésié surtou bann joli kalité son bann sèrvitèr. É sa, parské zot i sèrv ali dépi in bonpé d’zané é zot la rès fidèl kinport sak zot la viv.

3. Done in légzanp k’i fé mont ké Jéova i utiliz bann sèrvitèr ajé pou fé bann zafèr inkroiyab.

³ Nou néna toujour la valèr pou Jéova mèm si nou viéia. An vré, Jéova la souvan utiliz bann sèrvitèr ajé pou fé bann zafèr inkroiyab. Par égzanp, Sara té fine ariv in sèrtin laj kan Jéova la di k’èl té sa vni lo momon in gran nasion é in lansèt lo Mési (Jén. 17:15-19). Moiz té fine vni vié kan Jéova la done ali la mision gid Israèl pou fé sort azot dann péi Léjip (Égz. 7:6, 7). É Jéova la pous lapot Jan ékrir sink liv la Bib dan son vié jour.

4. Dapré Provèrb 15:15, kosa i pé èd sak lé ajé tienbo dann malizé ? (agard osi lo zimaj).

⁴ Firmézur lo tan i pas, sak lé ajé néna plizanpli problèm. Pou fé ri la bouch, in sèr la di : « Viéi, sa pa pou domoun fèb ! » Mé Jéova i pé èd anou trouv la joib komsa nou va gingn aprésié la vi mèm dann malizé (lir Provèrb 15:15). Dann sujé-la, nou va aprann kosa bann frèr é sèr ajé i pé fé pou gard zot joi. Nou va oir osi koman bann frèr é sèr dan zot lasanblé i pé èd azot. Pou komansé, alon oir akoz lé difisil gard nout joi kan nou lé ajé.

POUKOSA I PÉ ÈT DIFISIL GARD LA JOI KAN OU VIÉI

5. Kosa i pé dékouraj bann moun ajé ?

⁵ Kosa i pouré dékouraj aou ? Pétèt ou lé dékourajé parské ou gingn pu fé kom avan. Oubien ou rogrèt out jèntan kan ou lavé in bon santé (Ékl. 7:10). Par égzanp, in sèr i apèl Ruby i di : « Lé difisil mèt mon linj su moin parské mi gingn pu tro boujé kom avan akoz mon bann doulèr. In ti zafèr sinp kom lèv mon pié pou mèt in chosèt lé difisil. Mon min i dor é néna lartrit, é mèm bann ti travay sinp lé dur pou moin. » É Harold, ké té travay Bétèl avan, i di : « I énèrv amoin, parské mi gingn pu fé bann zafèr mi té èm fé avan. Moin té fé in bonpé lèspor. Mi té èm joué in lèspor i apèl bèzbol. Détroi té i di : “Lans la boul pou Harold komsa li va fé gingn anou lo match.” Mé astèr, mi pans pa mi gingn ankor lans in boul. »

6. a) Kosa ankor i pouré dékouraj bann moun ajé ? b) Koman bann moun ajé i pé konèt si zot i doi arèt kondui ou non ? (agard lo sujé « Èské mi doi arèt kondui ? » dann Tour d’Gard-la).

⁶ Pétèt ou lé dékourajé parské astèr néna d’zafèr ou gingn pu fé ou tousèl. Sa lé ankor plis vré si ou la bézoin in moun pou èd aou, oubien si ou doi abit la kaz inn out zanfan. Oubien pétèt out moral lé atèr parské out santé lé pu bon, out zié lé pu tro sa, é dukou ou gingn pu sort kom ou vé oubien kondui. Vréman, lé pa gayar ! Mé lé pa parské nou gingn pu pran soin d’nou, viv tousèl, oubien kondui ké nou na pu la valèr pou Jéova é pou lé zot. Nou pé èt sur ké Jéova i konpran sak nou rosan. Sak lé inportan pou Jéova sé sak nou néna dan nout kèr : lamour é la rokonésans pou li é pou bann frèr é sèr (1 Sam. 16:7).

7. Kosa i pé èd sak lé tris parské zot i pans zot sra pu la pou oir la fin monn-la ?

⁷ Riskab ou lé tris parské ou pans ou sra pu la pou oir la fin monn-la. Si ou pans komsa, kosa i pé èd aou ? Oubli pa, Jéova i koné poukosa li atand avan détrui mové monn-la (Izai 30:18). Poukosa li atand ? Si li atand, sé parské li èspèr ké néna ankor bann milion domoun ké va aprann konèt ali é désid sèrv ali (2 Pièr 3:9). Donk si ou lé dékourajé, ésèy majine lo kantité domoun k’i pé konèt Jéova é èt sové avan la fin i ariv. Pétèt ké an parmi nora domoun out famiy ?

8. Kèl léfé bann doulèr èk la maladi i pé aoir su in moun ajé ?

⁸ Kinport nout laj, kan nou san pa nou bien, nou riskab di oubien fé bann zafèr ké nou va rogrèté (Ékl. 7:7 ; Jak 3:2). Par égzanp, kan Job, in bonom fidèl, té i souf li la di « bann kozman lété pa sèrié » (Job 6:1-3). Défoi akoz la maladi ou bann médikaman, bann moun ajé i di ou i fé bann zafèr ké zot i dévré pa. Parkont, nou dévré pa mèt la fot su nout laj é nout santé pou èt mové ou fé lo difisil. É si nou rand anou kont ké nou la di in zafèr ké té pa janti, nou dévré pa amuzé pou alé oir lo moun é domand ali pardon (Mat. 5:23, 24).

KOMAN GARD LA JOI

9. Akoz ou dévré aksèp lèd lé zot ? (agard osi bann zimaj).

⁹ Aksèp lèd lé zot (Gal. 6:2). Dann promié débu, pétèt ou va trouv sa difisil. In sèr i apèl Gretl i di : « Nadfoi lé difisil pou moin aksèp lèd lé zot parské mi néna linprésion déranj azot. Té falé amoin lo tan pou moin chanj mon fason pansé é admèt ké mavé bézoin lèd. » Rapèl aou, domoun sra kontan si ou lès azot èd aou (Akt 20:35). É lé sur, ou sra kontan oir koman zot i èm aou é i vé pran soin d’ou.

10. Akoz i fo pa ou oubli di mèrsi ? (agard osi lo zimaj).

¹⁰ Di mèrsi (Kol. 3:15 ; 1 Tés. 5:18). Nou lé rokonésan pou sak lé zot i fé pou nou, mé nadfoi nou oubli di azot. Mé, si nou néna in ti sourir tranch papay é si nou di mèrsi, nout bann kamarad va konpran ké zot néna la valèr pou nou é zot va santi azot aprésié. Leah, in sèr k’i pran soin bann sèrvitèr ajé dann Bétèl, i rakont : « In sèr mi okip i lès amoin toultan bann ti mo pou di mèrsi. Sé pa bann gran mésaj mé lé tro minion ! Mi èm tro bann ti mo-la, parské sa i done amoin la joi konèt k’èl i aprésié mon lèd. »

11. Koman ou pé èd lé zot ? (agard osi lo zimaj).

¹¹ Fé out posib pou èd lé zot. Kan ou utiliz out tan é out lénèrji pou èd lé zot, sa va èd aou pa rès kalé su out bann problèm. In provèrb afrikin i di ké sak lé ajé lé kom in bibliotèk ranpli èk bann liv plin la sajès. Mé i gingn pa aprann rien, ansanm bann liv i rès su létajèr ! Lé parèy, bann jèn i poura pa aprann bann loson inportan ansanm ou si ou koz pa, é si ou partaj pa out lèspèryans ansanm zot. Donk poz banna kèstion é pran lo tan ékout azot. Aprésa ou pé di azot koman Jéova la èd aou dan out vi é koman obéi Jéova i pé rand azot éré. Lé sur, ou va trouv la joi kan ou va soutien é ankouraj out bann jèn kamarad (Ps. 71:18).

12. Dapré Izai 46:4, kosa Jéova i promèt fé pou bann moun ajé ? (agard osi lo zimaj).

¹² Pri Jéova pou gingn la fors. Mèm si ou san out kor i done pa oubien out tèt lé fatigé, oubli pa Jéova lé puisan, li lé ‘jamé fatigé, jamé li pèrd la fors’ (Izai 40:28). Donk li gingn done aou la fors ou la bézoin (Izai 40:29-31). An vré, Jéova i promèt ké li va èd aou (lir Izai 46:4). É kan li di in nafèr la, li fé vréman (Joz. 23:14 ; Izai 55:10, 11). Kan ou pri, Jéova va done aou lèd ou la bézoin. Gras sa, ou va konpran ké li èm aou for mèm é sa va done aou in gran joi.

13. Dapré 2 Korintien 4:16-18, kosa nou dévré rapèl anou ? (agard osi lo zimaj).

¹³ Rapèl aou ké out situasion lé jus pou in tan. Si nou rapèl anou ké bann malizé nou viv lé pou in tan, nou va gingn tienbo. Kom nou koné, la Bib i promèt anou ké biento nora pu la viéyès èk la maladi (Job 33:25 ; Izai 33:24). Donk ou pé trouv la joi parské ou koné ké out pli méyèr vi lé dovan ou, é pa dèrièr ou (lir 2 Korintien 4:16-18). Mé kosa lé zot i pé fé pou èdé ?

KOSA LÉ ZOT I PÉ FÉ

14. Poukosa lé inportan rand vizit é téléfone bann moun ajé ?

¹⁴ Kontinié rand vizit é téléfone bann frèr é sèr ajé (Ébré 13:16). Nadfoi, bann moun ajé i pé èt tris parské zot i san azot tousèl. Camille, in frèr i gingn pa sort son kaz i èsplik : « Dépi lo matin jusko soir mi lé oblijé rès dan la kaz. Nadfoi, mi san amoin kom in lion dann in kaj, mi lé strèsé é an kolèr parské mi gingn pa sort mon kaz é moin na poin gran choz pou fé. » Kan nou sa oir bann moun ajé, nou fé mont ké nou èm azot é ké zot i kont pou nou. La fine ariv nout tout, di ké nou té sa rand vizit ou téléfone in frèr ou in sèr ajé dan nout lasanblé, mé o final nou la pa fé. Nout tout nou lé bien okipé. Donk, kosa va èd anou fé ‘bann zafèr pli inportan’, kom alé oir bann gramoun dan nout lasanblé ? (Fil. 1:10). Sak va èd aou pétèt, sé not dan out kalandriyé in moman pou anvoy in ti mésaj oubien apèl in gramoun dan lasanblé. Di pa sé rienk kan ou nora in tan ou va alé oir azot, mé kal in jour pou sa.

15. Kosa bann jèn èk bann gramoun i pé fé ansanm ?

¹⁵ Si ou lé jèn, pétèt ou domand aou kèl diskusion ou pé aoir èk in moun ajé oubien kèl zaktivité ou pé fé sanm li. Kas pa la tèt, fo jus ou lé in bon dalon (Prov. 17:17). Avan ou apré bann rénion, pran lo tan alé koz èk bann gramoun dan lasanblé. Pétèt ou pouré domand azot kèl vèrsé zot i préfèr, oubien rakont in ti zistoir i fé ri ké la arivé dan zot jèntan. Ou pé osi invit azot gard Télé JW ansanm ou. Néna ankor plin zafèr ou pé fé. Par égzanp, ou pé èd azot mèt zot téléfone ou zot tablèt a jour oubien télécharj bann dèrnié publikasion. In sèr i apèl Carol i di : « Propoz bann moun ajé fé bann zafèr ké ou èm. Mèm si moin la fine ariv in bon laj, moin la toujour anvi aprésié la vi. Mi èm fé magazin, manj rèstoran é alé bat karé déor. » In not sèr i apèl Maira, i rakont : « Inn an parmi mon bann kamarad néna 90 zan. Néna 57 an diférans ant nout dé. Mé sa i pas mèm pa dan mon tèt, parské nou sa gard fim é toultan nou ri ansanm. É kan nou néna problèm, nou sa rod konsèy ansanm inn é lot. »

16. Akoz lé bien akonpagn bann moun ajé doktèr ?

¹⁶ Akonpagn azot dan zot randévou doktèr. Kan ou amèn bann moun ajé doktèr, asur aou ké sak i travay laba i trèt azot bien é i done azot lèd zot la bézoin (Izai 1:17). Pou èd lo moun ajé, pétèt ou pé pran bann not su sak lo doktèr lé antrinn di. Ruth, in sèr ajé i di : « Souvandéfoi, kan mi sa tousèl doktèr, lo doktèr i pran pa moin o sèrié. I ariv banna i di amoin : ‘Ou lé pa malad ou la, sa lé dan out tèt sa’. Mé kan néna in moun i vien sanm moin, la fason lo doktèr i trèt amoin i chanj. Mi romèrsi in bonpé mon bann frèr é sèr k’i pran lo tan pou vni èk moin. »

17. Kosa ou pé fé èk bann frèr é sèr ajé pou èd azot prèché ?

¹⁷ Pran lo tan prèch èk zot. Lé difisil pou détroi frèr é sèr ajé alé prèch kaz an kaz. Èsk’ou pé par égzanp invit in sèr ajé pou fé prézantoir ansanm ou ? Ou pé mèm ramèn in chèz pou èl asiz koté prézantoir. Ou sinon ou pé propoz in frèr ajé vni fé in létud ansanm ou, pétèt mèm amèn lo létudian son kaz ? Bann zansien i pé mèt an plas bann randévou prédikasion la kaz bann frèr é sèr ajé, komsa lé pli fasil pou zot alé prèché. I vo vréman lo kou fé tout nout posib pou done lonèr bann gramoun dan lasanblé (Prov. 3:27 ; Rom. 12:10).

18. Kosa nou sa oir dann sujé i vien apré ?

¹⁸ Dan lartik-la nou la vu ké Jéova i èm nout bann frèr é sèr ajé é zot néna in bonpé la valèr pou li. É lé parèy pou nou osi dan lasanblé ! Viéi lé difisil, mé gras lèd Jéova ou va gingn gard out joi (Ps. 37:25). Lé vréman ankourajan konèt ké out pli méyèr vi lé dovan ou, é pa dèrièr ou ! Kosa nou pé di su sak i pran soin in moun ajé dan zot famiy, in marmay ou sinon in kamarad ké lé malad ? Koman zot i pé fé pou gard zot joi ? Nou va koz ladsi dann sujé i vien apré.