Èské mi doi arèt kondui ?

Èské sé sak ou viv ? Si sé lo ka, kosa i pé èd aou konèt si ou doi kontinié kondui ?

Dan désèrtin péi, bann kondiktèr ké la fine dépas in sèrtin laj i doi alé doktèr pou gingn lotorizasion kontinié kondui. Bann krétien dan bann péi-la, i suiv bann loi èk bann désizion ké bann zotorité lo péi la pran (Rom. 13:1). Mé k’inport ousa ou abit, ou pé trouv bann konsèy pou èd aou oir si out fason kondui lé san danjé.

ANALIZ OUT FASON KONDUI

In lasosiasion amérikin pou bann gramoun i konsèy ké banna i poz azot bann kèstion i vien apré :

• Èské mi néna difikulté pou oir bann pano oubien èské mi oi pa klèr la nuit ?

• Èské lé difisil pou moin tourn mon tèt pou gard dann rétrovizèr é bann zang-mor ?

• Èské moin lé tro lan, par égzanp kan mi doi tir mon pié su laksélèratèr pou pèz su lo frin ?

• Èské mi kondui si tèlman dousman ké mi fé lantrak su la rout ?

• Sé dèrnié tan, ma mank fé plizièr laksidan ? Oubien sinon èské mon loto lé kas kasé afors bat partou ?

• Èské la polis la fine arèt amoin akoz mon fason kondui ?

• Èské ma fine gingn somèy dési volan ?

• Èské mi pran médikaman k’i anpèch amoin bien kondui ?

• Èské mon famiy oubien mon bann kamarad la pèr kan mi pran volan ?

Si ou la répond oui pou inn ou dé an parmi bann kèstion-la, pétèt i sré tan fé détroi chanjman. Par égzanp, ou pé désid kondui moin, surtou kan i ariv la nuit. Réfléchi su out fason kondui asé souvan. Ou pé domand in moun out famiy oubien in kamarad di aou kosa li pans dési out fason kondui. Pétèt ou pé désid pran détroi loson pou aprann kondui plis an sékurité. Astèr, si ou la répond oui pou plizièr bann kèstion-la, i sré pétèt tan pou ou arèt konduia.

KOMAN LA BIB I PÉ ÈD AOU PRAN IN BON DÉSIZION ?

Riskab lé dur pou ou, rokonèt ké ou kondui pu osi bien k’avan. É jus lidé arèt kondui, i pé tèlman fatig ou tèt k’ou la pa anvi koz ladsi. Donk, koman la Bib i pé èd aou èt onèt èk ou mèm é pran in bon désizion ? Alon oir dé zafèr va èd aou.

Rokonèt nout bann limit (Prov. 11:2). Firmézur nou viéi nou pran la pant : nou antand pu bien, nout vu i bès, nout miks i fébli é nout kor i réaji pu kom avan. Par égzanp, néna bonpé i arèt fé désèrtin lèspor kan zot i viéi parské zot i koné zot i pé blès azot fasilman. Lé parèy kan nou kondui. In moun k’i rokoné son limit, va arèt kondui pou son prop sékurité (Prov. 22:3). É si otour d’nou domoun i inkièt pou nou, nou va fé mont nou rokoné nout limit si nou ékout azot (agard 2 Samuèl 21:15-17).

Tansion pangar nou tué in moun (Dét. 22:8). Si in moun i fé pa atansion kan li kondui, li riskab blès in moun oubien tué ali. In moun i kontinié kondui alork li lé pu kapab, i pé mèt son vi èk sak lé zot an danjé. É si li lé rèsponsab in laksidan vréman grav, li sra koupab d’aoir fé koul lo san.

Si ou doi arèt kondui, sa i vé pa dir k’ou vo pu rien é ké lé zot i rèspèk pu ou. Jéova i èm aou pou out bann joli kalité, sétadir kan ou rokoné out limit, kan ou aksèp konsèy é kan ou fé atansion la sékurité lé zot. É li promèt ké li va soutien aou é konsol aou (Izai 46:4). Li va jamé larg aou. Donk domand ali la sajès mèt an pratik bann prinsip la Bib. Sa va èd aou pou désid si ou va arèt kondui ou pa.