Lo liv Job i pé èd aou kan ou doi done in konsèy

1-2. Kosa té pa fasil pou bann troi kamarad Job èk Éliou ?

KAN Job la pèrd tout, nouvèl-la la fane partou dan lo péi. Kan son bann troi kamarad, Élifaz, Bildad é Zofar la aprann sa, zot la voyaj juska Ouz pou konsol ali. Zot té loin majiné sak zot té sa oir

² Ésèy majiné. La anlèv Job tout sak li lavé. La tué oubien la vol tout son bann bèf, chamo, bourik èk mouton. La tué tout son bann zanfan é la masak la plipar son bann sèrvitèr. É la kaz ousa son bann zanfan lé mor lé dégrèné. É kom si té pa asé, Job la tonb bien malad : tout son kor lé ranpli èk bann bobo lo pu k’i fé mal. Kan Élifaz, Bildad é Zofar la arivé, dépi dé loin, zot la vu Job dépité antrinn asiz dan la sann. Koman zot la réaji ? Pandan sèt jour, zot la pa di inn ti mo mésié-la ké té pou soufèr (Job 2:12, 13). In moman doné, in jènjan k’i apèl Éliou la vni oir Job é li la asiz koté li é son bann troi kamarad. O final, Job la komans kozé. Li la rogrèt lo jour li lé né é li té vé mor (Job 3:1-3, 11). Lé klèr, la Job la bézoin lèd la ! Sak bann bonom-la i sa di é koman zot sa di sa, va fé mont si zot sé vréman bann bon kamarad k’i fé in kont ansanm Job.

3. Kosa nou sa oir dann sujé-la ?

³ Jéova la pous Moiz pou ékri sak bann troi kamarad Job èk Éliou la di é la fé. Not bien ké sé Jéova la pous Éliou di sak li la di. Mé pou Élifaz, sé pétèt in mové lèspri la pous ali pou di détroi zafèr (Job 4:12-16 ; 33:24, 25). I étone pa nou ké dan lo liv Job nou trouv tan bann bon konsèy, ké bann pir konsèy k’i égzis. Nou sa oir koman lo liv Job i pé èd anou kan nou la bézoin done in konsèy in kamarad. An promié, nou va oir lo mové légzanp bann troi kamarad Job. Aprésa nou va koz su lo bon légzanp Éliou. Chak foi, nou va aprann koman sa la pétèt èd bann Zisraélit é koman sa i pé èd anou jordi.

KOMAN LO BANN TROI KAMARAD JOB LA KONSÈY ALI

4. Poukosa bann troi kamarad Job la pa gingn konsol ali ? (agard osi lo zimaj).

⁴ La Bib i di ké bann troi kamarad Job la vni konsol ali akoz tout bann mové zafèr lavé ariv ali (Job 2:11). Sèlman zot la pa èd ali dutou. Poukosa ? Néna omoin troi rézon. An promié, zot la juj Job tro vit. Par égzanp, zot té pans ké Bondié té pou puni Job pou son bann péchéa (Job 4:7 ; 11:14). An dézièm, la plipar bann konsèy banna la done Job navé lèr saj mé an vré lété méchan, té èd pa li é té achèv ali ankor plis (Job 13:12). Par dé foi, Bildad la di Job ké li té koz tro (Job 8:2 ; 18:2). É Zofar la konpar Job èk in moun bèt (Job 11:12). An troizièm, mèm si zot la pa kriyé, zot té akuz ali, zot té koz an foutan é zot té tourn ali an bourik (Job 15:7-11). O final, olèrk konsol ali é rand son foi pli for, sak té intérès bann bonom-la sété fé mont ké Job lavé tor.

5. Bann troi kamarad Job la konsèy ali. Kèl rézulta sa la doné ?

⁵ Apré trouv drol ké kan banna té fine kozé son moral té ankor plis atèr ! (Job 19:2). Nou pé konpran ké Job lavé bézoin défand son réputasion. Akoz sa mèm, Job té gingn pu bien réfléchi é li té koz ninport koman (Job 6:3, 26). Lo fason pansé bann kamarad Job, té pa parèy lo fason pansé Jéova é zot navé okin pitié pou Job. Sé pou sa, Satan la profité pou ansèrv azot komsa zot té dékouraj Job (Job 2:4, 6). Koman zistoir-la, la pétèt èd bann Zisraélit é koman li pé èd anou jordi ?

6. Koman lo mové légzanp bann troi kamarad Job la pétèt èd bann zansien Israèl ?

⁶ Koman so zistoir la pétèt èd bann Zisraélit ? Kan Jéova la done bann Zisraélit bann loi, li la choizi bann zansien pou juj son pèp é pou èd banna suiv son bann loi (Dét. 1:15-18 ; 27:1). Alon oir sak lo bann zansien Israèl la pétèt aprann su lo bann troi kamarad Job. Bann zansien-la té doi bien ékouté avan done bann konsèy oubien avan juj lo pèp (2 Kron. 19:6). Falé zot té poz kèstion olèrk pans ké zot té koné tout zafèr (Dét. 19:18). Zot té doi pa koz dur kan té vien oir azot pou domand lèd. Akoz ? Parské riskab si bann juj-la té fé mont zot lé agasé, sa noré dékouraj bann Zisraélit rouv zot kèr (Égz. 22:22-24).

7. a) An plis bann zansien Israèl, kisa té pé done bann konsèy ? b) Koman lo mové légzanp bann troi kamarad Job la pétèt èd tout bann Zisraélit ? (Provèrb 27:9).

⁷ Lé sur, na poin rienk bann zansien Israèl navé lo droi done konsèy. An vré, tout bann Zisraélit — kisoi jèn, vié, mésié oubien madam — té pé done in konsèy. Par égzanp, banna té pé fé sa pou èd in kamarad kos plis koté Jéova oubien ropran ali si li la fé in nafèr lé pa bon (Ps. 141:5). Sé sa in vré kamarad ! (lir Provèrb 27:9). Lo mové légzanp bann troi kamarad Job la pétèt èd tout bann Zisraélit pou oir sak té fo pa di é sak té fo pa fé kan i done konsèy.

8. Kèl troi zafèr nou doi fé kan nou done in konsèy ? (agard osi bann zimaj).

⁸ Koman so zistoir i pé èd anou ? Kan nout bann frèr é sèr i souf, nou vé fé tout nout posib pou èd azot. Parkont kan nou fé sa, nou doi évit fé kom bann troi kamarad Job. An promié, i fo pa nou juj tro vit, mé i fo nou ésèy bien konpran la situasion avan done in konsèy. An dézièm, nou doi baz nout bann konsèy rienk su la vérité néna dan la Parol Bondié olèrk done nout prop lavi, kom Élifaz la fé in bonpé foi èk Job (Job 4:8 ; 5:3, 27). An troizièm, nou doi pa kritiké oubien koz dur. Élifaz èk son bann kamarad la di désèrtin zafèr té pa fo. Mèm lapot Pol la ropran détroi ti kozé Élifaz (agard Job 5:13 èk 1 Korintien 3:19). Malgré sa, la plipar sak zot la di té fé mal oir Bondié é la blès Job. Donk Jéova la jujé ké sak zot la di té mantèr (Job 42:7, 8). In bon konsèy va jamé fé pas Jéova pou in mové Bondié oubien fé kroir ké nou mérit pa son lamour. Astèr, alon koz su sak nou pé aprann su légzanp Éliou.

KOMAN ÉLIOU LA KONSÈY JOB

9. Di poukosa Job lavé toujour bézoin lèd kan son bann kamarad la arèt kozé, é koman Jéova la èd ali ?

⁹ Job èk son bann kamarad té pou fé in sobatkoz dépi in bon bou d’tan. Zot la tèlman kozé ké sak zot la di i rant dann 28 chapit la Bib. É na in bonpé zafèr zot la di té i mont ké zot lété kontrayé é an kolèr. Lanbians té doi èt cho ! Lé normal Job té toujour dékourajé ! Li lavé toujour bézoin i konsol ali é i korij son fason pansé. Koman Jéova la èd Job ? Li la utiliz Éliou pou konsèy ali. Akoz Éliou la pa koz avan ? Li la di : « Amoin moin lé jèn é azot zot lé pli vié. Sé par rèspé pou zot ké ma la pa koz toutsuit » (Job 32:6, 7). Éliou té koné ké souvan bann gramoun na plis la sajès parské zot na plis lèspèryans dan la vi. Mé li la atand èk pasians ké banna té fine kozé pou anfin rouv son bouch. Li la di : « Lé pa laj tousèl i rand saj, é pa rienk bann gramoun i konpran sak lé jus » (Job 32:9). Kosa Éliou la di aprésa é koman li la di sa ?

10. Kosa Éliou la fé avan konsèy Job ? (Job 33:6, 7).

¹⁰ Avan done konsèy Job, Éliou la fé ansort ké lanbians té pli gayar pou kozé. Koman li la fé sa ? Dabor, li la métriz ali. Nou koné sa parské la Bib i di k’o débu li té an kolèr (Job 32:2-5). Sé pou sa li la jamé été méchan ansanm Job. O kontrèr, Éliou la fé tout pou rasur ali. Par égzanp, li la di Job : « Agard ! Moin lé kom ou dovan lo vré Bondié » (lir Job 33:6, 7). Aprésa, Éliou la fé konpran Job ké li lavé bien ékout ali. Sé pou sa, li la gingn rodi plizièr zafèr inportan ké Job lavé di (Job 32:11 ; 33:8-11). É li la rofé parèy chak foi li la done konsèy Job (Job 34:5, 6, 9 ; 35:1-4).

11. Koman Éliou la konsèy Job ? (Job 33:1).

¹¹ Kan Éliou la done son konsèy, li la pa rabès Job. O kontrèr, li la fé mont rèspé pou so bonom fidèl. Par égzanp, li la apèl Job par son prénon, alork andiré lé zot lavé pa fé sa (lir Job 33:1). Riskab Éliou la rapèl ali ké li té anvi d’kozé pandan lo sobatkoz ant Job é son bann kamarad. Sé pou sa, li la lès Job lo tan répond kan li té pou konsèy ali (Job 32:4 ; 33:32). Éliou la osi mèt Job an gard su désèrtin fason pansé li lavé. Èk jantiyès li la rapèl Job ké Jéova lé saj, for, jus é ké son lamour i fini jamé (Job 36:18, 21-26 ; 37:23, 24). Bann bon konsèy Éliou la èd Job aoir lo bon mantalité pou èt paré ékout sak son Kréatèr lavé pou di ali (Job 38:1-3). Koman légzanp Éliou la pétèt èd bann Zisraélit é koman li pé èd anou jordi ?

12. Koman Jéova la ansèrv bann profèt pou èd son pèp, é koman légzanp Éliou la pétèt èd banna ?

¹² Koman légzanp Éliou la pétèt èd bann Zisraélit ? Jéova la souvan ansèrv bann profèt pou fé konèt son volonté bann Zisraélit. Par égzanp, dann tan bann juj, Jéova la utiliz Débora pou gid son pèp, é li la utiliz osi Samuèl dépi tan jèn, pou done lo pèp bann zinstruksion (Juj 4:4-7 ; 5:7 ; 1 Sam. 3:19, 20). Dann tan bann roi, Jéova la kontinié ansèrv bann profèt pou èd bann Zisraélit ador ali kom k’i fo. É kan banna té dézobéi ali, li té anvoy bann profèt pou armèt azot droit (2 Sam. 12:1-4 ; Akt 3:24). Légzanp Éliou ké nou trouv dan lo liv Job, la pétèt èd bann sèrvitèr fidèl pou konpran kosa falé di é koman falé di sa kan zot té doi done in konsèy.

13. Koman bann krétien jordi i pé ankouraj zot bann dalon dan la foi ?

¹³ Koman légzanp Éliou i pé èd anou ? Anou bann krétien, nou fé konèt la volonté Jéova ké nou trouv dan son Parol la Bib. Nou fé sa kan nou prèch é kan nou choizi bien nout bann mo pou ankouraj é pou konsol nout bann dalon dan la foi (1 Kor. 14:3). É surtou, bann zansien i doi vréman fé atansion « koz in fason k’i konsol » èk bann frèr é sèr, mèm avèk sak i koz anlèr ou sak lé strèsé (1 Tés. 5:14 ; Job 6:3).

14-15. Èsplik koman in zansien i pé fé kom Éliou kan li doi done in konsèy.

¹⁴ Majine in zansien i aprann k’in sèr dan son lasanblé la pou déprimé. Avèk in not zansien zot i sa rand vizit lo ti sèr pou ankouraj aèl. Pandan lo vizit, lo ti sèr i di ké mèm si èl i kontinié prèché é alé la sal, èl na pu tro la joi. Kosa bann zansien i sa fé ?

¹⁵ Pou komansé, zot va ésèy mié konpran poukosa lo ti sèr i souf. Pou fé sa, zot va ékout èk pasians. Èsk’èl i pans k’èl i mérit pa lamour Bondié ? Oubien « bann traka la vi » la pou fatig son moral ? (Luk 21:34). Apré, bann zansien va ésèy félisit lo ti sèr pou bann bon zafèr èl i fé déja. É lé vré, èl i sa toujour la sal é èl i kontinié prèché mèm si son moral lé atèr. É anfin, inn foi ké bann zansien va konpran son situasion é poukosa èl i san aèl komsa, zot va gingn ansèrv la Bib pou èd aèl èt sur ké Jéova i èm aèl (Gal. 2:20).

KONTINIÉ TIR BANN GAYAR TI LOSON DAN LO LIV JOB

16. Koman nou pé kontinié tir bann gayar ti loson dan lo liv Job ?

¹⁶ Nou aprann bann gayar zafèr dan lo liv Job ! Dan lo sujé avan, nou la vu poukosa Bondié i lès anou pas dan malizé é koman li èd anou tienbo. É dann sujé-la, nou la vu ké nout tout nou pé done bann bon konsèy si nou suiv lo bon légzanp Éliou é pa sak bann troi kamarad Job. Pétèt prochin kou, avan done in konsèy, ou va trouv util alé gard bann joli ti loson ké néna dan lo liv Job. É si i fé in bout d’tan ou la pa lir gayar ti liv-la, pétèt ou pé désid rolir ali ankor in foi é aprésié son zistoir. Ou va oir ké li lé toujour util jordi, kom li lété dann tan la ékri ali.