Lo liv Job i pé èd aou kan ou pas dann tangaj la vi

1-2. Poukosa i vo lo kou lir lo liv Job ?

ÈSKÉ ou la lir lo liv Job na poin tro lontan ? Mèm si li la été ékri néna apépré 3 500 zan, in paké domoun i pans ké li fé toujour parti bann pli méyèr liv k’i égzis. Domoun i di ké sak la ékri liv-la, lé gabié parské li la ansèrv bann joli ti mo fasil pou konpran é k’i touch lo kèr. Mèm si sé Moiz la ékri gayar liv-la, an vré sé Jéova la di ali kosa falé ékri (2 Tim. 3:16).

² Lo liv Job sé in parti inportan dan la Bib. Akoz sa ? Déja inn, sa i èd anou konpran ké bann zanj èk bann zumin i doi choizi si zot va défand la réputasion Jéova. Zot va fé so choi-la parské zot i èm ali é zot i vé défand son non. In not zafèr ankor liv-la i amont anou, sé bann joli kalité Jéova néna kom son lamour, son sajès, son justis èk son gran fors. Par égzanp, dan lo liv Job i di in bonpé d’foi ké Jéova sé lo pli puisan Bondié k’i égzis. Lo liv Job i répond osi in bonpé kèstion inportan su la vi, é an parmi néna inn ké bonpé i poz azot : Akoz Bondié i lès domoun soufèr ?

3. Kosa nou pé aprann ankor gras lo liv Job ?

³ Lir lo liv Job lé kom mont anlèr in piton. Kan ou la fine ariv lao ou oi bien tout sak lé otour d’ou. Lé parèy, kan nou va lir lo liv Job, nou va “mont anlèr” pou aoir lo mèm fason oir Jéova su nout bann malizé. Dann sujé-la, nou sa oir koman bann Zisraélit la pétèt tir loson su sak Job la viv, é koman anou osi liv-la i pé èd anou jordi. An plis, nou sa aprann ansèrv lo zistoir Job pou èd lé zot.

BONDIÉ LA LÈS JOB PAS DANN MALIZÉ

4. Kèl gran diférans navé ant Job é bann Zisraélit ?

⁴ Job té viv dann in landroi k’i apèl Ouz, dan tan bann Zisraélit té zèsklav dann péi Léjip. Pétèt Ouz té vèr Lès lo péi Bondié la promèt, kèkpar koté lo nor Larabi. Tandik bann Zisraélit laba Léjip té ador bann fo bondié, Job tankali, li té rès fidèl Jéova (Joz. 24:14 ; Ézék. 20:8). Jéova la di dési Job : « Na poin pèrsone kom li su la tèr »a (Job 1:8). Job té roul su lor sa oui ! É dan Lès, té li lo moun lo plis rèspèkté (Job 1:3). Surman Satan té pa bon kan li té oi Job, in bonom konu é rèspèkté, rès fidèl Jéova !

5. Akoz Jéova la lès Job pas dann malizé ? (Job 1:20-22 ; 2:9, 10).

⁵ Satan té prétan ké Job té sa arèt sèrv Jéova si li té gingn kou d’kongn (Job 1:7-11 ; 2:2-5). Jéova té èm vréman Job. Mé li la lès Satan fé mont si sak li lavé di su Job té vré ou pa (Job 1:12-19 ; 2:6-8). Satan la fé pèrd Job tout son bann zanimo, li la tué son dis marmay é li la fé mont in maladi su li. Maladi-la té done ali bann gro klou dépi la tèt juska son doi d’pié é sa té fé mal ali. Mèm si Satan navé poin d’pitié pou Job é la fé souf ali in ta, Job la rès fidèl Jéova (lir Job 1:20-22 ; 2:9, 10). Mé apré, Jéova la géri Job, la rand ali ankor plis rich, la done ali ankor dis marmay é li la rogingn in bon réputasion. An plis ké sa, Jéova la rékonpans Job é la pèrmèt ali viv ankor 140 an. Sa i vé dir li la gingn oir lo bann ti zanfan son bann ti zanfan ! (Job 42:10-13, 16). Koman zistoir-la, la èd bann sèrvitèr Jéova dann tan avan ? É koman li pé èd anou jordi ?

6. Koman lo zistoir Job la pétèt èd bann Zisraélit ? (agard osi lo zimaj).

⁶ Koman lo zistoir Job, la pétèt èd bann Zisraélit ? La vi bann Zisraélit dann péi Léjip té pa fasil. Par égzanp, Jozué èk Kalèb té bann zèsklav dépi tan jèn. É mèm si té pa zot fot, zot la pas 40 an dann dézèr. Si bann Zisraélit la konèt lo zistoir Job, lé sur sa la èd azot, é parèy pou tout sak la lèv apré. Lé posib zot la konpri ké sé Satan lotèr bann soufrans é pa Bondié. Pétèt zot la konpri poukosa Bondié i lès domoun soufèr. É osi, ké li èm tout sak i rès ali fidèl mèm kan lé difisil é li rékonpans azot.

7-8. Koman lo liv Job i pé èd sak i souf ? Done in légzanp.

⁷ Koman lo zistoir Job i pé èd anou ? Lé bien maléré, jordi na in bonpé domoun na pu la foi an Bondié parské zot i konpran pa poukosa sé toultan bann bon moun i gingn lo kou. Agard sak la ariv Hazelb k’i sort Rouanda. Kan èl té marmay èl té kroi Bondié. Mé in jour son vi la gaté. Son bann paran la divorsé, é son ti pèr té maltrèt aèl. Aprésa, in boug la viol aèl. Kan Hazel la tourn aèl vèr son rolijion pou èt konsolé, na poin rien la soulaj son kèr. Pli tar, Hazel la ékri Bondié in lèt. La ddan èl la di : « Bondié, moin la pri aou, ma ésèy fé sak lé bien, mé o final ou la fé souf amoin. Astèr, mi larg aou é mi sa fé tout sak i rand amoin éré ». Nout kèr i fé mal pou domoun, kom Hazel, parské banna i fini par kroir bann mansonj su Bondié é ké sé li lotèr bann soufrans !

⁸ Sèlman, anou, nou la aprann dan lo liv Job ké sé pa Bondié lotèr bann soufrans, sé Satan ! Nou la aprann osi ké kan domoun i souf, fo pa nou pans sé parské zot la rodé. La Bib i di anou ké ‘bann tan difisil é bann zafèr ké nou atand pa’ i pé tonb su ninport kisa ninport kan (Ékl. 9:11 ; Job 4:1, 8). É nou la aprann ké si nou rès fidèl Jéova dann tangaj la vi, nou done Jéova lokazion fé mont ké Satan lé in mantèr (Job 2:3 ; Prov. 27:11). Nou lé rokonésan ké nou la aprann tousa-la dan la Bib parské astèr nou koné vréman poukosa anou é sak nou èm i souf. Plitar, Hazel la étudié èk bann témoin Jéova é èl la konpri ké té pa Bondié té fé souf aèl. Èl la di : « Ma la rokomans pri Bondié èk tout mon kèr. Ma èsplik Jéova ké kan mavé di ali mi té larg ali té pa pou d’vré. Tout fason mi té koné pa li. Astèr mi koné Jéova i èm amoin. Anfin moin lé vréman éré ». Nou vé di mèrsi Bondié parské nou koné poukosa li pèrmèt bann soufrans ! Astèr alon oir koman légzanp Job i pé èd chakèn d’nou kan nou pas dann malizé.

KOMAN LO ZISTOIR JOB I ÈD ANOU TIENBO

9. Kan ou majine sak Job la pas dédan, kosa ou oi ? (Jak 5:11).

⁹ Majine sak Job la pas dédan. Li lé asiz dan la sann, son kor lé ranpli èk bann gro bouton lo pu, li lé pliyé an dé èk la doulèr. Son po lé pliché partou é la fine ariv noir èk la maladi. Li la fine ariv bien mèg. Job navé pu la fors pou fé gran choz. Li té asiz é li té grat son bann bobo èk bann morso larjil kasé. Souvan li té souplingn akoz son bann doulèr. Mé Job té pa jus antrinn batay pou viv, li té pou tienbo ! (lir Jak 5:11). Kosa la èd Job tienbo ?

10. Kosa i amont ké Job té gingn koz èk Jéova kom li té vé ? Èsplik.

¹⁰ Job té di Jéova tout sak li té rosan (Job 10:1, 2 ; 16:20). Par égzanp, dann chapit 3 Job i di koman li té tris par rapor tout bann malèr la ariv ali. Li té pans ké té akoz Jéova té ariv ali tout bann problèm-la. Apré, troi kamarad Job té arèt pa zigil ali é di ali ké Bondié té pou puni ali akoz son bann péché. Mé Job té arèt pa di ké li té in moun fidèl, é souvan li té koz dirèk èk Jéova. Lo fason kozé Job i fé mont ké pandan in tan li té kalkul li té pli jus ké Bondié (Job 10:1-3 ; 32:1, 2 ; 35:1, 2). Mé li la rokonèt ké té ariv ali aoir bann kozman anlèr, kan li té pou défand ali (Job 6:3, 26). Dann chapit 31, nou lir ké Job té vé Bondié té répond ali é ké Bondié té di li té inosan (Job 31:35). Lé sur, Job noré pa du insisté pou ké Jéova i di ali akoz li té pou soufèr.

11. Koman Jéova la répond Job ?

¹¹ Nou konpran ké la fason Job té koz èk Jéova té fé mont ké li navé in gran lamitié ansanm li. Té fé mont osi, ké li té vréman sur ké Bondié noré rokonèt ké li té fidèl é jus. Jéova la fé in tanpèt é li la répond Job. Mé li la pa rant dann détay, li la pa di Job akoz li té souf. Jéova la pa puni Job non pli parské li la di sak li té rosan oubien parské li té ostine pou di li lé inosan. Olèrk sa, Jéova la ropran Job kom in papa i fé èk son garson. É sé komsa mèm té falé fé. O final, san lorgèy, Job la aksèp ké li té koné pa gran choz é li la domand pardon pou son bann kozman inutil (Job 31:6 ; 40:4, 5; 42:1-6). Koman zistoir-la, la èd bann sèrvitèr Jéova dann tan avan ? É koman li pé èd anou jordi ?

12. Koman lo zistoir Job la pétèt èd bann Zisraélit ?

¹² Koman lo zistoir Job, la pétèt èd bann Zisraélit ? Bann Zisraélit la pétèt tir bann loson su sak la ariv Job. Alon gard légzanp Moiz. Té pa fasil pou li gid lo pèp Israèl parské souvan zot té désoi ali é an plis banna té dézobéi Jéova. D’in koté navé bann Zisraélit ké té arèt pa mèt la fot su Jéova kan té difisil, mé d’in not koté navé Moiz ké té kour koté Jéova kan té difisil (Égz. 16:6-8 ; Nonm 11:10-14 ; 14:1-4, 11 ; 16:41, 49 ; 17:5). Kom Job, Moiz té doi tienbo osi kan Jéova la ropran ali. Par égzanp li la koz anlèr, kan bann Zisraélit té pou kanpé laba Kadèch, jus avan rant dan lo péi Bondié la promèt. Lèr la, Moiz la pa done la gloir Jéova (Ps. 106:32, 33). Sé pou sa, Jéova la pa lès Moiz rant dan lo péi li lavé promèt (Dét. 32:50-52). Sa té doi èt dur pou Moiz ; pourtan san mèt ali su la otèr, li la aksèp la désizion Jéova. Lé posib lo zistoir Job la èd osi tout bann Zisraélit fidèl ké la viv apré Moiz. Gras lo zistoir Job, zot té pé aprann ké zot té pé di Jéova tout sak zot té rosan, é ké zot té doi évit rod azot bann zèskuz. É zot té pé aprann osi ké zot té doi pa fé lo fièr kan Jéova i ropran azot.

13. Koman lo zistoir Job i pé èd anou ténir ansanm ? (Ébré 10:36).

¹³ Koman lo zistoir Job i pé èd anou ? Anou osi, bann sèrvitèr Jéova, i fo nou ténir ansanm (lir Ébré 10:36). Par égzanp, détroi an parmi nou la pèrd in moun nou èm, néna i batay kont bann problèm dan la tèt, dan lo kor, dan la famiy ou dot gro problèm ankor. É nadfoi, i pé èt ankor pli dur pou nou tienbo, parské lé zot i rajout in ta plis in paké akoz sak zot i di ou sak zot i fé (Prov. 12:18). Mé sak lo liv Job i aprann anou, sé ké nou pé dévid nout kèr ansanm Jéova, é nou lé sur li va antand anou (1 Jan 5:14). Li sra pa an kolèr èk nou si nou di ali tout sak nou rosan, mèm si nadfoi nou riskab koz anlèr kom Job. O kontrèr, Bondié va done anou la fors èk la sajès pou nou tienbo (2 Kron. 16:9 ; Jak 1:5). Li pé èd anou osi chanj nout fason pansé kom li la fé èk Job. Li pé ansèrv la Bib, bann publikasion, in zansien ou in kamarad pou konsèy anou. É kom Job i fo nou tienbo kan i ropran anou (Ébré 12:5-7). Kan Job la ékout Jéova, sa la fé ali du bien, parèy pou nou si nou fé pa lo fièr é ké nou aksèp bann konsèy, sa va fé anou du bien osi (2 Kor. 13:11). Nou la aprann bann gayar zafèr èk Job ! Astèr alon oir koman nou pé ansèrv lo liv Job pou èd lé zot.

ANSÈRV LO LIV JOB POU ÈD LÉ ZOT

14. Dann prédikasion, koman nou pé èsplik domoun akoz nou souf jordi ?

¹⁴ Èské in moun dann téritoir la fine domand aou akoz nou souf jordi ? Kosa ou la répond ali ? Pétèt ou la èsplik ali sak la Bib i di su sak la èspas dann jardin Lédèn. Pétèt ou la komans koz su Satan, in mové lèspri, ké la mont in bob pou Adan èk Èv, é sa la amèn azot dévir zot do sanm Jéova (Jén. 3:1-6). É aprésa pétèt ou la di ké dépi zot la dézobéi Bondié, tout domoun i souf é i mor dési la Tèr (Rom. 5:12). Pou fini, somanké ou la di ké Bondié i lès lo tan pou fé mont tout domoun Satan lé in mantèr. Li lès lo tan osi pou ké domoun i antand gayar nouvèl-la : nora pu d’soufrans é zot va gingn viv pou toultan (Rév. 21:3, 4). Lé bien si nou la èsplik komsa, é i pé done bann bon rézulta.

15. Koman nou pouré ansèrv lo liv Job pou èsplik poukosa domoun i souf ? (agard osi bann zimaj).

¹⁵ Alon ansèrv lo liv Job pou gingn èsplik in not fason poukosa domoun i souf. Dabor inn, ou pé félisit lo moun parské li la poz in bon kèstion. Apré, ou pé di ké Job, in vré sèrvitèr Bondié ké la souf in bonpé mèm, la domand ali lo mèm zafèr. An plis ké sa, li té kalkul té Bondié lotèr son bann soufrans (Job 7:17-21). Pétèt lo moun ou la pou koz avèk, sra étoné antand ké na lontan d’sa na domoun té poz azot lo mèm kèstion. Aprésa, ou pé di ké dapré lo liv Job nou koné ké sé Satan lété dérièr son bann soufrans, é pa Bondié. Satan la di ké bann zumin i sèrv Bondié par intéré, mé si zot i souf, zot va arèt sèrv ali. Ou pé di osi ké Bondié i koné ké néna domoun va rès ali fidèl é va pa sèrv ali par intéré. Bondié i vé lès bann moun-la fé mont ké Satan lé in mantèr. Pou fini, ou pé di ké Bondié la béni Job in bonpé parské li la rès fidèl. Donk nou pé èd domoun konpran ké Jéova lé pa dérièr tousa, é sé sa va konsol azot.

16. Rakont in zistoir k’i mont koman lo liv Job i pé èd in moun k’i souf.

¹⁶ Agard koman lo liv Job la èd Mario. Na in jour an 2021, in sèr té pou prèch par téléfone. Pandan son promié lapèl, èl la partaj in vèrsé la Bib ansanm Mario pou èsplik ali ké Bondié i ékout pa sèlman nout bann priyèr, mé li of anou osi in gayar lavnir èk in lèspoir. Kan èl la domand ali sak li té pans, li la répond ké li té pou ékri son famiy in lèt, pou di azot ké li té èm azot é ké li té sa suisid ali. Li la di : « Mi kroi Bondié moin, mé so matin ma té pou domand amoin si li lavé pa larg amoin ». Kan èl la rapèl ali, zot la koz su sak Job la pas dédan. Mario la désid ké li lavé bézoin lir tout lo zistoir Job. Nout sèr la anvoy ali in lien pou lir la Bib su jw.org. Kosa la arivé ? Mario la aksèp in létud la Bib é li té prèsé aprann plis su lo Bondié plin lamour ké la romark ali.

17. Poukosa ou vé di gran mèrsi Jéova parské li la fé mèt lo zistoir Job dan la Bib ? (Job 34:12).

¹⁷ Lé klèr, la Parol Bondié lé puisan parské li gingn chanj nout vi é li konsol osi sak i souf (Ébré 4:12). Nou di gran mèrsi Jéova, parské li la fé mèt lo zistoir Job dan la Bib ! (Job 19:23, 24). Lo liv Job i di ké : « Lé sur, Bondié i aji pa èk méchansté » (lir Job 34:12). Li amont anou osi poukosa Bondié i pèrmèt la soufrans é koman nou pé tienbo mèm si nou souf. É li èd anou konsol sak i pas dann tangaj la vi. Dan lo sujé i vien apré, nou va oir détroi zidé dan lo liv Job ké va èd anou kan nou doi done konsèy.