Kosa i lé la batay Armagédon ?

Kosa la Bib i di

La batay Armagédon sa i vé dir lo dèrnié gèr ant Bondié é bann gouvèrnman bann zom. Jordi, bann gouvèrnman la, é tout sak lé dèrièr zot, lé déja kont Bondié parské zot i vé pa obéi ali (Psom 2:2). La batay Armagédon va fini avèk lo bann gouvèrnman bann zom (Danièl 2:44).

I trouv lo mo « Armagédon » rienk in sèl foi dan la Bib, dann Révélasion (ou Apokalips) 16:16. Liv la Bib la, i anons ké dan in « landroi k’i apèl Armagédon an lang ébré », « bann roi su tout la tèr » sra rasanblé « pou la gèr lo gran jour Bondié lo Toupuisan » (Révélasion 16:14).

Kisa va batay kan Armagédon va arivé ? Jézu Kris èk son bann zanj va fé la gèr kont bann zènmi Bondié. Li va gingn la gèr la (Révélasion 19:11-16, 19-21). An parmi bann zènmi Bondié nora sak i vé pa obéi ali é sak i rèspèk pa li (Ézékièl 39:7).

Èské la batay Armagèdon va èspas par koté ousa bann Zisraèlit té viv ? Non, li va pa èspas dan in sèl landroi, mé su tout la tèr an antié (Jérémi 25:32-34 ; Ézékièl 39:17-20).

Armagédon, défoi i ékri« Har-Maguédôn » (an lang ébré Har Meghiddôn), i vé dir « Montagn Mégido ». Mégido té in vil té fé parti lo téritoir Israèl dann tan lontan. Listoir i rakont bann batay inportan, ké la èspas dann vil la, é an parmi néna détroi lé ékri dan la Bib (Juj 5:19, 20 ; 2 Roi 9:27 ; 23:29). Mé sèlman, Armagédon i pé pa èt in landroi koté lo vié vil Mégido. Parské na poin okin gran montagn tèrla, k’i sré asé gran pou tout domoun ké va rasanm azot pou batay kont Bondié, é mèm pa dan la plèn Jézréèl, ké lé akoté. An vré, Armagédon i vé dir ké lo bann nasion lo monn antié va rotrouv azot ansanm, pou afront in dèrnié foi lo roiyom Bondié.

Koman la batay Armagédon va èspasé ? Mèm si nou koné pa koman Bondié va ansèrv son puisans, sak nou koné sé k’li va gingn ansèrv bann mèm zarm ké dann tan avan : la grèl, tranbléman d’tèr, linondasion, dofé èk lo souf, zéklèr èk bann maladi (Job 38:22, 23 ; Ézékièl 38:19, 22 ; Abakuk 3:10, 11 ; Zakari 14:12). Kom zot i konprandra pu kosa i ariv azot, désèrtin va tué azot ant zot. Mé in moman doné zot va rand azot kont, sé Bondié li mèm lé antrinn batay kont zot (Ézékièl 38:21, 23 ; Zakari 14:13).

Èské Armagédon sé la fin lo monn ? Sa i vé pa dir, la tèr i sra détrui, parské Bondié la done la tèr domoun, pou ké banna i viv dési pou toultan (Psom 37:29 ; 96:10 ; Éklézias 1:4). Olèr détrui tout domoun, Armagédon va fé k’nora toujour d’moun su la tèr. La Bib i koz su « in gran foul » domoun k’i èm Bondié k’i va rès vivan (Révélasion 7:9, 14 ; Psom 37:34).

Nadfoi dan la Bib, i ansèrv lo mo « monn » pou koz su la tèr, mé défoi i ansèrv mo la osi pou koz su domoun k’i vé pa obéi Bondié (1 Jan 2:15-17). Donk sé pousa k’i di Armagédon i sra la « fin lo monn » parské li va fini avèk tout bann domoun k’i obéi pa Bondié (Matié 24:3, Bible en français courant).

Kansa Armagédon va arivé ? Kan li la koz su lo « gran détrès » ké va fini èk la batay Armagédon, Jézu la di : « jour la é lèr la, pèrsone i koné pa, ni bann zanj dann sièl ni lo Fis, mé sèlman lo Papa » (Matié 24:21, 36). Parkont, la Bib i amont bien ké Armagédon va komansé pandan la prézans Jézu, k’i oi pa é k’la komansé an 1914 (Matié 24:37-39).