Koman aproch a ou koté Bondieu ?

1. Èske Bondieu i ékout tout bann priyèr ?

Bondieu i invit tout bann domoun aproch koté li par la priyèr (Psom 65:2). Mé li ékout pa, é li lé pa dakor avèk tout bann priyèr. Par égzanp, kan in mesieu i maltrèt son madam, Bondieu i pe rejèt son bann priyèr (1 Pièr 3:7). Kan bann Zisraélit té arèt pa fé bann mové zafèr, Bondieu té i ékout pa zot priyèr. Parkont, si in moun la komèt in péché é ke li regrèt son fot, Bondieu i aksèpt son bann priyèr, mèm si sak li la fé lé grav. La priyèr lé vréman in gran faveur ke Bondieu i fé a nou (Lir Izai 1:15 ; 55:7).

Regard le vidéo Èske Bondieu i ékout tout bann priyèr ?

2. Koman nou doi priyé ?

Kan nou pri, nou lé antrèn ador Bondieu. Donk, sé rienk nout Kréateur Jéova ke nou doi priyé (Matieu 4:10 ; 6:9). An plus ke sa, kom nou lé pa parfé, nou doi priyé o non d’Jézu parske li lé mor pou nout bann péché (Jan 14:6). Jéova i ve pa ke nou résit bann priyèr ke lé ékri ou ke nou aprann par keur. Li ve ke nout bann priyèr i sort dan nout keur (Lir Matieu 6:7 ; Filipien 4:6, 7).

Nout Kréateur i antan a nou, mèm kan nou pri dan nout keur (1 Samuèl 1:12, 13). Li invit a nou pri a li ninport kan, par égzanp kan la journé i komans é kan i fini, kan nou manj, kan nou néna bann traka (Lir Psom 55:22 ; Matieu 15:36).

3. Pou kosa bann krétien i rasanm a zot ?

Lé pa fasil aproch koté Bondieu, parske nou viv parmi bann domoun ke i kroi pa an li. Kan Bondieu i promèt ke li va mèt la pé su la tèr, bann domoun i mok a zot de sa (2 Timoté 3:1, 4 ; 2 Pièr 3:3, 13). Alor, sa i mont ke nou la bezoin rasanm a nou avèk dot sèrviteur Bondieu pou èt ankourajé, é zot osi, zot la bezoin a nou (Lir Ébreu 10:24, 25).

Kan nou rasanm a nou avèk bann domoun ki ièm Bondieu, sa i èd a nou aproch koté li. Kan bann Témoin Jéova i fé bann rénion, sa lé bann gayar lokazion pou èt enkourajé, parske nou voi a kèl poin lé zot na la foi (Lir Romin 1:11, 12).

4. Koman ou pe aproch a ou koté Bondieu ?

Ou pe aproch a ou koté Bondieu kan ou pran le tan pou réfléchi su sak ou aprann dan son Parol. Réfléchi su tout sak Bondieu i fé, su son bann konsèy é son bann promès. Kan ou pri é kan ou réfléchi avèk sèryeu su son Parol, tipe tipe, sa va èd a ou avoir in plu gran rekonésans pou lamour é la sajès Bondieu (Lir Jozué 1:8 ; Psom 1:1-3).

Pou aproch koté Bondieu, ou doi atoupri fé a li konfians é mèt out foi an li. Mé la foi lé kom in plant ke i fo arozé avèk de lo. Ou doi toultan nouri out foi, é pousa, ou doi réfléchi su out bann kroiyans é pou kèl rézon ou néna bann kroiyans la (Lir Matieu 4:4 ; Ébreu 11:1, 6).

5. Kèl bienfé ou va ganié, si ou aproch a ou koté Bondieu ?

Jéova i fé in kont avèk sak i ièm a li. Li pe protèj a ou kont tout sak i pouré afébli out foi é fé pèrd a ou léspérans viv pou toultan (Psom 91:1, 2, 7-10). Li mèt a ou an gard kont bann fason d’viv ke lé danjereu pou out santé é out boneur. Li ansègn a ou koman avoir le pluméyeur fason d’viv (Lir Psom 73:27, 28 ; Jak 4:4, 8).