Marek M. Berezowski/Anadolu Agency via Getty Images
KONTINIÉ VÉYÉ !
Dézièm lané pou la gèr dann péi Lukrèn : Kèl lèspoir la Bib i done ?
Lo vandrédi 24 févriyé 2023, lé la dat lanivèrsèr in mové souvnans : i fé in lané la gèr la pété dann péi Lukrèn. Dapré bann zinformasion, néna apépré 300 000 solda dann péi Lukrèn èk la Rusi fine mor oubien blésé, é apépré 30 000 moun dan la populasion lé mor. Mé riskab néna plis ké sa lé mor.
Malérèzman, na lèr sra pa domin la vèy pou la gèr la fini.
“I fé prèské in lané ké larmé bann Rus la rant dann péi Lukrèn, é na poin ankor in sign i mont ké va oir lo bout dann la gèr la. Andiré ni inn ni lot lé paré pou niabou gingn batay la in foi pou fini, é tanka pou trouv in négosiasion otour in tab, kont pa dési.”—NPR (National Public Radio), 19 févriyé 2023.
Kan su la tèr bann zinosan i souf akoz bann gèr komsa, lé normal ké lo kèr in bonpé domoun i singn pou banna. Kèl lèspoir la Bib i done ? Èské la gèr i arètra pa dutou in jour ?
In gèr ké va pil tout lé zot gèr
La Bib i di néna in gèr va ni sokour domoun, mé li krazra pa la tèr. Gèr la i apèl Armagédon, é li lé « la gèr lo gran jour Bondié lo Toupuisan » (Révélasion 16:14, 16). Gras gèr la, Bondié va fé an sort ké domoun i dominera pu domoun, parské lé maléré pou di, mé sé akoz bann mové dominans la ké néna si tèlman la gèr su la tèr. Pou konèt par koman Armagédon va amèn in pé pou toultan, lir bann sujé la :