Koman lo sakrifis Jézu lé « in ranson pou in gran paké domoun » ?
Sak la Bib i di
Sé gras sakrifis Jézu ké Bondié i libèr, sétadir, li tir domoun dann péché é dan la mor. La Bib i di ké lo san Jézu la vèrsé, sé in ranson (Éfézien 1:7; 1 Pièr 1:18, 19). Sé pousa Jézu la di k’li lé vnu pou « done son vi an ranson an échanj in bonpé domoun » (Matié 20:28, Segond 21).
Poukosa lavé bézoin « in ranson pou in gran paké domoun » ?
Bondié la fé lo promié bonom, Adan, parfé, sétadir san péché. Li té gingn viv pou toultan, mé li la pèrd sa, kan li la choizi dézodéi Bondié (Jénèz 3:17-19). Kan li la gingn zanfan li la done azot lo péché, sétadir zot té gingn pu èt parfé (Romin 5:12). Sé pou sa, la Bib i di ké Adan la « vand » ali, èk son bann zanfan, kom bann zèsklav pou lo péché èk la mor (Romin 7:14). Kom zot té gingn pu èt parfé, pèrsone an parmi bann zanfan Adan té kapab rachèt sak li lavé pèrd (Psom 49:7, 8).
Bondié navé in bonpé la pitié pou bann zanfan Adan, parské navé pu okin lèspoir pou zot (Jan 3:16). Mé sèlman, kom Bondié lé jus, li té gingn pa sèlman fèrm lo zié su zot péché, sétadir pardone azot san okin rézon valab (Psom 89:14 ; Romin 3:23-26). Kom Bondié i èm tout domoun, li la trouv in bon rézon dan la loi pou pardone zot péché, mé osi pou ké zot i rodovien parfé (Romin 5:6-8). So bon rézon dan la loi, sé la ranson.
Koman la ranson la i march ?
Dapré la Bib, dan la « ranson » néna troi zafèr :
Sé in pri k’i fo pèyé. (Nonm 3:46, 47).
Sa i pèrmèt libèr domoun, ou rachèt in zafèr. (Égzod 21:30).
Li doi aoir mèm valèr ké sak i achèt avèk, é kouv tout lo bann fréa.
Alon oir koman tousa la i kol vréman avèk lo sakrifis Jézu :
Lo pri k’i fo pèyé : La Bib i di ké « la pèy lo pri » pou bann krétien (1 Korintien 6:20 ; 7:23). Lo pri la, sé lo san Jézu, é la ansèrv sa pou « achèt pou Bondié domoun tout bann tribu, é lang, é pèp, é nasion » (Révélasion 5:8, 9).
La libèrasion : Sé lo sakrifis Jézu k’i done in « libèrasion gras la ranson » pou sort dan péché. (1 Korintien 1:30 ; Kolosien 1:14 ; Ébré 9:15).
La mèm valèr : Lo sakrifis Jézu sé égzaktoman sak Adan la pèrd : in vi parfé (1 Korintien 15:21, 22, 45, 46).La Bib i di : « parèy kom la dézobéisans in sèl bonom [Adan] in bonpé lé vnu zèsklav lo péché, lé parèy osi par lobéisans in sèl bonom [Jézu Kris] in bonpé va dévnir bann domoun jus » (Romin 5:19). Vèrsé la i èsplik koman la mor in sèl bonom i pé pèy la ranson pou bonpé zésklav lo péché. An vré, lo sakrifis Jézu lé in « ranson k’i korèspond pou tout domoun » sétadir tout sak i fé sak i fo pou anprofité (1 Timoté 2:5, 6).
a Dan la Bib, lo bann mo ké la ansèrv dann promié débu, pou tradui « ranson » i vé souvan dir in pri, oubien in zafèr ké néna la valèr, k’i fo pèyé. Par égzanp, lo vèrb ébré ka·pharʹ i vé dir « kouvèr » (Jénèz 6:14). Souvandéfoi mo la i vé dir kan i kouv ou i rachèt, lo péché. (Psom 65:3) Lo mo koʹpher ali i vé dir lo pri la pèyé pou fé sa. (Égzod 21:30) Lé parèy pou lo mo grèk lutron, ké dabitid i vé dir « ranson » mé k’i vé dir osi « lo pri pou rachté » (Matié 20:28; The New Testament in Modern Speech, by R. F. Weymouth) Bann zékrivin grèk la ansèrv mo la, kan té done larjan la ranson pou in prizonié pandan la gèr oubien pou libèr in zèsklav.