Kisa i mont o sièl ?
Sak la Bib i di
Bondié i choizi in ti kantité an parmi bann krétien fidèl ké, apré zot mor, sra résusité pou alé viv dann sièl (1 Pièr 1:3, 4). In foi k’la choizi azot, pou gingn zot léritaj dann sièl, zot i doi fé atansion gard zot foi é zot manièr d’viv an akor èk bann prinsip krétien (Éfézien 5:5 ; Filipien 3:12-14).
Kosa banna va fé dann sièl ?
Zot va travay avèk Jézu kom roi é prèt pandan 1 000 zané (Révélasion 5:9, 10 ; 20:6). Zot i sra in « nouvo sièl », sétadir in gouvèrnman dann sièl, ké va gouvèrn lo « nouvo tèr », sétadir bann moun ké va viv su la tèr. Dépi dann sièl, zot va dirij bann domoun su la tèr, é zot va èd banna pou rotrouv la justis, é pou viv lo fason Bondié lavé prévu dépi promié débu (Izai 65:17 ; 2 Pièr 3:13).
Kèl kantité domoun sra résusité dann sièl ?
Dapré la Bib 144 000 moun va résusité pou viv dann sièl (Révélasion 7:4). Dan lo vizion k’i trouv dann Révélasion 14:1-3, lapot Jan la vu « Lanio dobout su la Montagn Sion, é avèk li 144 000 ». Dann vizion la, « Lanio », sé Jézu résusité (Jan 1:29 ; 1 Pièr 1:19). La « Montagn Sion », i vé dir ké Jézu é bann 144 000 k’i gouvèrn èk li, zot tout lé anlèr dann sièl (Psom 2:6 ; Ébré 12:22).
Sak « k’lé aplé é choizi », pou gouvèrn avèk Kris dan lo Roiyom, i apèl azot« ti troupo »(Révélasion 17:14 ; Luk 12:32). Sa i amont ké, par rapor tout bann brébi Jézu néna, zot lé pluto in ti kantité (Jan 10:16).
Sak domoun i pans su sak i mont o sièl
Sak domoun i pans : Tout bon moun i mont o sièl.
An vré : Bondié i promèt ké la plipar bann bon moun va viv pou toultan su la tèr (Psom 37:11, 29, 34).
Jézu la di: « Na poin okin moun la mont dann sièl » (Jan 3:13). Li la fé konpran anou ké désèrtin bon moun k’lé mor avan li, kom Abraam, Moiz, Job, é David, la pa mont o sièl (Akt 2:29, 34). Zot lèspoir sété résusit pou viv su la tèr (Job 14:13-15).
Dan la Bib, kan in moun i résusit pou viv dann sièl, i apèl sa « lo promié rézurèksion » (Révélasion 20:6). Sa i vé dir ké néna in not rézurèksion : in rézurèksion su la tèr.
La Bib i di ké kan Roiyom Bondié va gouvèrné, « nora pu la mor » (Révélasion 21:3, 4). Kom dann sièl, i mor pa, lé oblijé promès la va réaliz su la tèr.
Sak domoun i pans : Chakèn i choizi ousa li va viv, dann sièl oubien su la tèr.
An vré : Sé Bondié i désid kisa an parmi bann krétien fidèl va gingn « lo pri [...] pou alé la o », sétadir, lèspoir viv dann sièl (Filipien 3:14). Sé pa nou k’i choizi si nou la anvi viv dann sièl oubien su la tèr (Matié 20:20-23).
Sak domoun i pans : Lèspoir viv pou toultan su la tèr néna moins la valèr ké viv dann sièl, é sa lé rienk pou domoun k’i mérit pa mont o sièl.
An vré : Sak va gingn la vi pou toultan su la tèr, Bondié i apèl azot « mon pèp », « sak moin la choizi » é « sak lé béni par Jéova » (Izai 65:21-23). Zot nora lonèr réaliz projé Bondié pou tout domoun : èt parfé é viv pou toultan dann in paradi su la tèr. (Jénèz 1:28 ; Psom 115:16 ; Izai 45:18).
Sak domoun i pans : Dann Révélasion, 144 000 lé pa in chif k’i fo pran pou larjan kontan.
An vré : Dann Révélasion, néna d’chif i fo pa pran pou larjan kontan é néna dot k’i fo. Par égzanp, i koz dési « 12 non, sak bann 12 zapot Lanio » (Révélasion 21:14) Alon oir bann prèv, k’i fo pran osi lo chif 144 000 pou larjan kontan.
Révélasion 7:4 i di : « Kèl kantité domoun la sélé (oubien, sak lé sur é sèrtin gingn la vi dann sièl) : 144 000. » Dan bann vèrsé jus apré, i konpar banna èk in dézièm group : « in gran foul domoun ké na poin pèrsone té i gingn konté ». Bondié i sov osi « gran foul domoun » la (Révélasion 7:9, 10). Si té falé pa pran lo chif 144 000 pou larjan kontan, mé ké chif la lé an rapor èk in group domoun i koné pa kèl kantité néna dédan, alor lo konparézon ant dé group la i tien pu la rout.a
An plis ké sa, kan i koz su bann 144 000 , i di ké « la achèt azot an parmi bann domoun kom promié frui » (Révélasion 14:4). Bann mo “promié frui” i vé dir inn ti kantité an parmi in bonpé. Bann mo la i roprézant bien sak va gouvèrn dann sièl avèk Kris, su bann domoun su la tèr, k’i gingn pa konté. (Révélasion 5:10).
a Ala kosa lo profèsèr Robert L. Thomas la ékri su chif 144 000 k’i trouv dann Révélasion 7:4 : « Sa in chif égzak par rapor lo kantité k’i gingn pa konté dann Révélasion 7:9. Si i pran pa chif la pou larjan kontan, alor okin chif dann liv la lé égzak. » (Révélasion 1-7 : An Exegetical Commentary, paj 474).