Koman la Bib i pe èd amoin ? (1^é parti) : Fouy dan out Bib

« Ma la ésèy lir la Bib, mé té pran tèlman le tan ke sa la dékouraj amoin ! » (Briana, 15 zan).

Èske lé parèy pou ou osi ? Se lartik la i pe èd aou !

• Poukosa lé inportan lir la Bib ?

• Koman mi pe fé pou lir la Bib ?

• Kosa banna i pans

Poukosa lé inportan lir la Bib ?

Rienk kan ou majinn lir la Bib, èske sa i fatig aou ? Si ou pans komsa lé normal. Pou ou petèt, la Bib sé in bèl liv ousa néna in tralé paj avèk bann ti lékritur é ke na poin okin zimaj... Lé sur ki fé pa le poi avèk la télé oubien bann vidéo !

Mé alon pran in légzanp : Majinn in kou ou trouv in vieu kof trézor. Èske ou noré pa anvi alé gardé kosa néna dedan ?

La Bib lé kom se kof trézor la. Li néna in bonpe trézor la sajès ke va èd aou pou :

• Pran bann bon désizion ;

• Gard in bon lantant èk out bann paran ;

• Trouv bann bon dalon ;

• Jèr out strès.

Koman in vieu liv komsa i pe rann aou sèrvis zordi ? Parske « tout Lékritur lé inspiré par Bondieu » (2 Timoté 3:16). Sa i ve dir ke tout bann konsèy ke néna dan la Bib i sort koté le moun le plu saj ki égzis.

Koman mi pe fé pou lir la Bib ?

1^é lidé : Lir la Bib depui débu juska la fin. Komsa va pèrmèt aou konèt an gro kosa la Bib i di. Néna in ta fason lir la Bib. Alon voir deu zégzanp :

• Kom néna 66 liv dan la Bib, ou pe lir azot dan lord, de Jenèz juska Révélasion.

• Ou pe lir la Bib dan lord ke le bann zévènman la éspasé, sa i apèl lord kronolojik.

Sak i pe èd aou : Dan le parti 4-A le brochur Guide d’étude de la Parole de Dieu ou va trouv dan lord kronolojik bann zévènman inportan la vi Jézu kan li lété su la tèr.

2^ièm lidé : Choizi in zistoir dan la Bib ki koz su in problèm ke ou néna. Par égzanp :

• Èske ou ièmré fé aou bann kamarad ke lé fiab ? Lir le zistoir Jonatan èk David (1 Samuèl, chapit 18-20). Aprésa, pou trouv bann leson util dan sak ou la lir, ansèrv le fich réfléksion « Comment se faire des amis fidèles ? ».

• Èske ou ièmré èt plu for pou tienbo devan bann tantasion ? Lir le zistoir Jozèf é agard koman li la tienbo devan le tantasion (Jenèz, chapit 39). Aprésa pou trouv bann leson util dan sak ou la lir, ansèrv le bann fich réfléksion « Comment résister à la tentation ? Joseph — 1^re partie » èk « Accusé à tort ! Joseph — 2^e partie ».

• Èske ou ièmré konèt koman la priyèr i pe èd aou? Lir le zistoir su Néémi (Néémi, chapit 2). Aprésa pou trouv bann leson util dan sak ou la lir, ansèrv le fich réfléksion « Dieu a répondu à sa prière ».

Sak i pe èd aou : Ésèy mèt aou dan in landroi kalm pou bien profit out léktur la Bib.

3^ièm lidé : Choizi in zistoir la Bib oubien in psom, lir ali, é aprésa, réfléchi koman aplik ali dan out ka. Kan ou la finn lir, poz aou bann késtion la :

• Poukosa Jéova la mèt se linformasion la dan la Bib ?

• Kosa sa i aprann amoin su bann kalité Bondieu é su son bann fason d’fé ?

• Koman mi pe aplik sa dan mon vi ?

Sak i pe èd aou : Fiks aou in but ! Not la dat ousa ou voudré komans out program pou lir la Bib. Pousa, ou pe utiliz le program ke néna su nout sit Lintèrnèt.