Koman la Bib i pe èd amoin ? (2^ièm parti) : Fé an sort ke ou aprési out léktur la Bib

In jeun marmay ki apèl Will, i di « La Bib i pe donn lèr ke li lé pa in liv intérésan si nou koné pa koman fo fé pou lir ali ».

Èske ou ièmré konèt bann ti taktik ki va fé aprési aou out léktur la Bib ? Se lartik la va èd aou.

• Fé ke out léktur la Bib i devien vivan

• Fouy !

• Kosa banna i pans

Fé ke out léktur la Bib i devien vivan

Kan ou fé out léktur la Bib ésèy majiné koman le zistoir la éspasé. Pousa ou pe utiliz ti téknik la :

1. Choizi in zistoir la Bib ke ou ièmré mieu konèt. Ou pe pran in lépizod dan la Bib oubien in ti parti lévanjil. Ou pe choizi osi in zistoir anparmi bann léktur biblik sou form piès téat ke lé su jw.org.

2. Li le zistoir. Ou pe lir pou ou touseul, oubien lir for èk out bann kamarad ou alor èk out fami. Inn anparmi zot i pe fé la voi ki rakont le zistoir é sak i rès i pe fé lé zot pèrsonaj.

3. Ésèy inn oubien pluzieur bann ti konsèy la :

   • Fé bann désin ki rakont le zistoir. Oubien, ou pe fé in ta ti désin ki ésplik koman bann zévènman la éspasé. Rajout bann ti not anba chak désin pou dir kosa i éspas.

   • Rézum le zistoir èk bann ti plan. Par égzanp, kan ou lir le zistoir in moun fidèl, fé le lien ant son bann kalité é son bann zaksion avèk bann bénédiksion ke li la ganié.

   • Rakont le zistoir komsi ou té journalis. Ésèy mèt aou a la plas bann diféran moun ke néna dan le zistoir, é fé in « lintèrviou » bann pèrsonaj inportan é bann moun ke la vu kosa la éspasé.

   • Si in moun dan le zistoir la pran in mové désizion, majinn kosa noré éspasé si li lavé pa fé sa. Par égzanp, kan Pièr la di devan tout domoun ke li té koné pa Jézu, kosa li noré pu fé pou mieu kontrol son strès ? (Mark 14:66-72).

   • Si ou néna in galé pou ékri bann zistoir, poukosa ou ésèy pa sa : apui aou su in lévènman dan la Bib pou ékri in zistoir. É mèt dan le zistoir bann leson ke nou pe tiré (Romin 15:4).

     

Fouy !

Si dan in zistoir ou gard in pe plu pré bann ti détay ou pe trouv bann trézor. Souvandéfoi, ou pe aprann in bonpe zafèr rienk èk detroi ti mo.

Par égzanp, konpar Matieu 28:7 avèk Mark 16:7.

• Poukosa Mark la bien di ke Jézu té tard pa pou aparèt devan bann disip « é devan Pièr » ?

• In ti lindis : Mark té pa la kan tousala la éspasé ; sé petèt Pièr ke la rakont ali sa.

• Trézor : Poukosa Pièr la petèt santi ali soulajé kan li la aprann ke Jézu té ve voir ali (Mark 14:66-72) ? Koman Jézu la fémont ke li té vréman in bon kamarad pou Pièr ? Koman ou pe imit ali é èt vréman in bon kamarad pou lé zot ?

Si ou fé an sort ke bann zistoir ke néna dan la Bib i devien vivan é ke ou sa fouy in pe plus, ou sra ankor plus kontan lir la Bib !