Èske mi devré pri bann sin ?

Sak la Bib i di

Non, nou doi pa. La Bib i ésplik ke nou doi pri rienk Bondieu touseul o non Jézu. Alala kosa Jézu la aprann son bann disip : « Donk, azot pri komsa : Nout Papa ke lé dann sièl, fé ke i rann out Non sin » (Matieu 6:9, Jérusalem). Li la jamé otoriz son bann disip pri bann sin, bann zanj oubien ninport kisa apark Bondieu.

Jézu la di osi èk son bann disip : « Sé moin le Chemin, la Vérité é la Vi. Na poin pèrsonn i pe vni devan mon Papa san pas par moin » (Jan 14:6, Jérusalem). Donk, Bondieu i donn rienk Jézu touseul le droi plèd pou nou (Ébreu 7:25).

Mé si mi pri Bondieu, é anplus kesa mi pri bann sin ?

Kan Bondieu la donn lé dis komannman, li la di : « Amoin Yavé, out Bondieu, moin lé in Bondieu jalou » (Égzod 20:5, Jérusalem). Akoz i di Bondieu lé jalou ? Dan la Bible de Jérusalem, inn ti not i di bien ke li « réklam [...] in ladorasion rienk pou li touseul ». Bondieu i réklam ke tout bann manièr adoré, la priyèr konpri dan, lé rézèrvé rienk pou li touseul (Izai 48:11).

Sé afront Bondieu kan ou pri in not ke li, mèm si sé in sin ou in lanj. Kan lapot Jan la ésèy ador in lanj, toutsuit lanj la la kal son lélan é la di ali : « Tansion, fé pa sa, moin lé in sèrviteur kom ou mèm é kom out bann frèr ke i koné sak Jézu la di. Sé Bondieu ke ou doi adoré » (Révélasion [oubien Lapokalips] 19:10, Jérusalem).