LESON 17

Jézu : son pèrsonalité é son bann kalité

Vèrsion inprimé

Kan nou lir tout sak Jézu la di é la fé kan li lété su la tèr, son bann kalité i atir anou vréman vèr li é vèr son Papa, Jéova. Kosa i lé detroi kalité ke li néna ? É koman nou pe imit Jézu ?

1. Poukosa nou pe di ke Jézu i resanm vréman son Papa ?

Kan li lété dann sièl, Jézu la bien regard son Papa pandan bann miliar d’zané, é li la bokou aprann de son Papa. Sa la amèn ali pansé, resanti bann zafèr é aji égzakteman kom son Papa (lir Jan 5:19). Jézu i imit tèlman bien le pèrsonalité son Papa, ke li la di : « Sak la vu amoin la vu le Papa osi » (Jan 14:9). Plus ou va aprann su le pèrsonalité Jézu, mieu ou va konèt Jéova. Par égzanp, Jézu té vréman sansib kan domoun té souf ; sa i mont anou sak Jéova i resan pou nou.

2. Koman Jézu la montré ke li ièm Jéova ?

Jézu la di : « Pou ke le monn i koné ke mi ièm le Papa, mi fé égzakteman sak le Papa i ordonn amoin pou fé » (Jan 14:31). Kan li lété su la tèr, Jézu la mont lamour ke li lavé pou son Papa. Pousa li la obéi mèm kan lété difisil. Sé osi lamour pou son Papa ke la pous Jézu koz de son Papa é èd lé zot ni bann kamarad Bondieu (Jan 14:23).

3. Koman Jézu la montré ke li ièm domoun ?

La Bib i di ke Jézu na « in bonpe laféksion surtou pou bann zumin » (Provèrb 8:31, ti not). Son lamour té pous ali ankouraj domoun é èd azot, pa par intéré. Son bann mirak la prouvé ke li lété puisan, mé surtou ke li lété sansib kan lé zot té souf (Mark 1:40-42). Li lété bon é li té fé pa préférans. Li té rékonfort bann domoun sinsèr ke té ékout ali, é li té redonn azot léspoir. Li la aksèp soufèr é mor parske li ièm bann zumin. Mé li na surtou laféksion pou sak i obéi sak li la ansénié (lir Jan 15:13, 14).

ALON APRANN PLUS

Alon voir bann kalité Jézu, é koman nou pe imit son lamour é son jénérozité.

4. Lamour ke Jézu néna pou son Papa

Jézu i donn anou légzanp. Li mont anou koman fémont nout lamour pou Bondieu. Lir Luk 6:12, é Jan 15:10 é 17:26. Aprésa, koz su késtion la :

Koman nou pe montré ke nou ièm Jéova ?

Jézu lé antrèn priyé. — Jézu té ièm son Papa dann sièl é li té koz souvan èk li dan la priyèr.

5. Lamour ke Jézu néna pou domoun

Jézu té fé pas lé zot avan li. Mèm kan li lété fatigé, li té donn azot son tan é son fors. Lir Mark 6:30-44 é koz su bann késtion la :

Koman Jézu la montré ke li té fé in kont èk lé zot ? (gard bann vèrsé 31, 34, 41 é 42).
Kosa té pous Jézu pou fé sa ? (gard le vèrsé 34).
Parske Jézu i imit son Papa, kosa son konportman i aprann anou su Jéova ?
Koman nou pe montré ke nou imit Jézu, kan nou èd lé zot ?

Par in mirak, Jézu i nouri bann milié d’moun. Li multipli 5 pin é 2 ti poison. Bann disip i partaj le manjé èk bann mesieu, bann madam é bann zanfan.

6. Jézu lé jénéreu

Jézu lavé poin gran choz, mé li lété jénéreu, é li la ankouraj anou èt komsa osi. Lir Akt 20:35 é koz su késtion la :

Dapré Jézu, kosa i rann ereu ?

Gard le VIDÉO é koz su le késtion ki vien apré.

VIDÉO : « Néna plus kontantman kan i donn » (inn ti morso) (4:00)

Mèm si nou na poin gran choz, kèl fason nou pe doné ?

Ou té koné sa ou ?

La Bib i ésplik ki fo pri Jéova o non Jézu (lir Jan 16:23, 24). Kan nou pri se fason la, nou mont ke nou rekoné, ke sé gras Jézu ke nou pe èt kamarad Jéova.

NADFOI DOMOUN I DI : « Bondieu néna dot zafèr pou fé. Li na poin le tan èk nou. »