Koman la gèr èk bann zafrontman violan va disparèt ?

BONDIÉ VA DÉTRUI BANN GOUVÈRNMAN

Gras in gèr k’i apèl Armagédona, Bondié va détrui bann gouvèrnman (Révélasion 16:16). Pou so gèr-la, « bann roi su tout la tèr » va « rogroup azot pou la gèr lo gran jour Bondié lo Toupuisan » (Révélasion 16:14) I sra pandan Armagédon, la gèr Bondié, ké bann gèr va disparèt.

Bondié va ranplas tout gouvèrnman par son roiyom, sétadir son gouvèrnman, li va aji dopi lo sièl é li sra jamé détrui (Danièl 2:44). Bondié la choizi Jézu Kris pou èt Roi so roiyom-lab (Izai 9: 6, 7 ; Matié 28:18). Gouvèrnman-la, sé lo roiyom ké Jézu la aprann son bann disip priyé (Matié 6: 9, 10).Tout sak lé su la tèr sra uni é dirijé rienk par lo gouvèrnman Jézu.

Olèrk fé parèy sak i dirij anou jordi, Jézu va pa ansèrv son lotorité rienk pou li. Kom li lé jus é li fé pa préférans, nora poin pèrsone sra trèté d’in manièr injus akoz son bann zorijine kisoi son ras, son péi ou son kiltir (Izai 11:3, 4). Nora pu bézoin pèrsone i batay pou défand son bann droi. Akoz ? Parské Jézu va fé in kont ansanm chak moun. « Li va sov lo pov k’i kri o sokour, é osi lo ti moun é sak na poin pèrsone pou èd azot. […] Li va sov azot kont sak i abuz dési lé zot é kont la violans » (Psom 72:12-14).

Lo roiyom Bondié va détrui bann zarm (Miché 4:3). Li va détrui osi bann domoun mové k’i vé pa arèt batay é k’i anpèch domoun èt an pé (Psom 37:9, 10). Pé inport ousa bann bonom, bann madam é bann marmay i lé su la tèr, banna va santi azot an sékurité (Ézékièl 34:28).

Kan lo gouvèrnman Bondié sra an plas, tout domoun nora in vi parfé. Gouvèrnman-la, va fé disparèt tout bann problèm k’i pous domoun batay, kom la mizèr, problèm manjé é problèm lojman. Toulmoun va gingn bon manjé an kantité é va abit dan in ti kaz an nik (Psom 72:16 ; Izai 65:21-23).

Kan gouvèrnman Bondié sra an plas, tout ravaj bann gèr la fé sra réparé. Tout blésir ké domoun la subi pandan la gèr, kisoi su lo kor ou dan la tèt, sra géri. Mèm sak lé mor sra résusité su la tèr (Izai 25:8 ; 26:19 ; 35:5, 6). Bann famiy sra réuni é bann mové souvnir la gèr va fé parti ‘bann zafèr navé avan, [ké] la disparèt’ (Révélasion 21:4).

BONDIÉ VA FÉ DISPARÈT LO PÉCHÉ

Gras lo roiyom Bondié, tout domoun va pratik lo vré ladorasion zot tout ansanm é zot va ador Jéovac « lo Bondié lamour èk la pé » (2 Korintien 13:11). Zot va aprann viv an pé zot tout ansanm (Izai 2:3, 4 ; 11:9). Tout sak i mèt an pratik sak zot la aprann, lo péché nora pu okin léfé su zot (Romin 8:20, 21).

BONDIÉ VA DÉTRUI SATAN ÈK SON BANN DÉMON

Lo roiyom Bondié va détrui sak lé dèrièr bann gèr sétadir Satan èk son bann démon (Révélasion 20:1-3, 10). Kom Satan èk son bann démon sra pu la, « nora in bonpé la pé » (Psom 72:7).

Zot i pé èt sur ké Bondié va réaliz son promès fé disparèt la gèr é bann zafrontman violan. Li lé kapab fé sa é li vé fé sa.

• Bondié néna la sajès é la puisan k’i fo pou fé disparèt la gèr èk la violans (Job 9:4). Bondié i gingn fé tout (Job 42:2).

• Bondié i èm pa oir kan domoun i souf (Izai 63:9). « Li détès tout domoun k’i èm la violans » (Psom 11:5).

• Bondié i fé toujour sak li di, li gingn pa ramas mantèr (Izai 55:10, 11 ; Tit 1:2).