Pran légzanp su Jéova, mèt pa nou su la otèr

1. Jéova i pran pa li su la otèr. Akoz sa i mèt aou ?

KAN ou gard bann dirijan jordi, èské ou diré aou toutsuit ké sé bann domoun k’i pran pa zot su la otèr ? Non ! Pourtan Jéova, ali ké lé Toupuisan, li pran pa li su la otèr (Ps. 113:5-8). Nou va jamé trouv in ti tras lorgèy ché Jéova. Dann sujé-la, nou sa oir kat joli manièr ké Jéova néna, k’i fé mont ké li pran pa li su la otèr. Nou sa oir osi koman Jézu i fé parèy son Papa. Koz ladsi, va èd anou kos plis koté Jéova é fé plis zéfor pou rojèt lorgèy.

LÉ FASIL KOS KOTÉ JÉOVA

2. Kosa nou aprann su Jéova dan lo Psom 62:8 ? (agard osi lo zimaj ).

² An jénéral, lé pa fasil koz èk domoun fièr. Souvan domoun i évit bann moun-la, parské zot lé pa janti èk lé zot é zot i kroi zot lé pli méyèr k’toulmoun. Na rien aoir èk Jéova ! Kom nout Papa i fé pa lo fièr, li invit anou pou kos koté li é koz èk li su tout sak i pèz su nout kèr (lir Psom 62:8). Kom in papa plin lamour i vé konèt sak i pèz su lo kèr son marmay, Jéova i vé vréman antand sak néna dan nout kèr. An vré, li la fé mèt in paké priyèr komsa dan la Bib. Sa i fé mont bien ké Jéova la vréman anvi ké nou pri ali (Joz. 10:12-14 ; 1 Sam. 1:10-18). Mé kosa i fo nou fé si tanzantan nou pans nou mérit pa kos koté li ?

3. Poukosa ou pé èt sur ké Jéova i vé ou pri ali souvan ?

³ Nou pé pri Jéova mèm si nou pans ké nou mérit pa son lamour. Poukosa nou di sa ? Dan in légzanp Jézu la pran, li la di Jéova lé kom in papa plin lamour ké la akèy èk gran kèr son garson ké lavé fé in ta bétiz. Garson-la té pans li té mérit pa ké son papa i lès ali rovni dan la famiy. Kosa lo papa la fé kan son garson la artourné ? Jézu la di ké dèk li la vu son garson dépi dé loin, li la « kouri pou pran ali dan son bra é anbras ali » (Luk 15:17-20). Jéova lé kom papa-la. Dèk li antand anou pri ali parské nou lé tris akoz nout bann zérèr oubien akoz nout bann traka, li ékout anou bien mèm (Lam. 3: 19, 20). É kom lo papa, Jéova na pitié d’nou, li kour koté nou pou rasur anou ké li èm anou é li konsol anou (Izai 57:15). Koman Jéova i “kour koté nou” jordi ? Souvan li ansèrv bann zansien, nout famiy dan la vérité, é nout bann frèr é sèr (Jak 5:14, 15). Jéova i done anou lèd-la parské li vé nou kos koté li.

4. Poukosa nou pé di ké domoun té alèz èk Jézu ?

⁴ Jézu i fé parèy son Papa. Kom son Papa, Jézu i pran pa li su la otèr. La prèv, kan li té su la tèr, domoun té pa jéné pou alé oir ali é zot lavé pa pèr poz ali kèstion (Mark 4:10, 11). Donk kan li té domand azot zot lavi su in nafèr, zot té di ali sak zot té pans vréman (Mat. 16:13-16). É kan zot té fé bann zérèr, zot lavé pa pèr Jézu té rant èk zot ; zot té koné li té janti, pasian é ké li té konpran azot (Mat. 17:24-27). Kom Jézu la tèlman bien pran légzanp su son Papa, son bann disip la aprann konèt Jéova mié ankor (Jan 14:9). Zot la aprann ké Jéova té pa dutou kom bann chèf la rolijion ké té dur ou tro fièr pou mélanj azot èk tout domoun. O kontrèr, li té pran pa li su la otèr é li té vé domoun té kos koté li.

5. Poukosa lé pli fasil pou lé zot vni oir anou si nou mèt pa nou su la otèr ?

⁵ Koman nou pé fé parèy Jéova ? Si nou mèt pa nou su la otèr, sra pli fasil pou domoun kos koté nou. Si nou lé komsa, sa va anpèch anou ral lo kèr, fé lo fièr é fé nout gro kèr, parské bann vilin manièr-la i fé kour domoun. Mé nou sra janti, nou nora la pasians é nou va pardone lé zot. Sa, sé bann joli manièr k’i atir domoun (Kol. 3:12-14). Bann zansien i doi vréman fé atansion ké bann frèr é sèr dan lasanblé la pa pèr vni koz èk zot. Mé pou gingn koz èk zot, i fo zot lé la. Sa i vé dir, chak foi k’lé posib bann zansien i doi alé la sal olèrk suiv la sal par lintèrnèt. É tank lé posib, zot i prèch kaz an kaz èk zot bann frèr é sèr. Komsa bann frèr é sèr va mié konèt bann zansien, zot sra pa jéné pou alé oir banna kan zot nora bézoin.

JÉOVA LÉ RÉZONAB

6-7. Done bann zégzanp ousa Jéova la ékout son bann sèrvitèr é la chanj son désizion.

⁶ Bann domoun orgéyé lé pa rézonab èk lé zot. Mé Jéova lé pa komsa dutou. Mèm si li koné toujour sak lé mié pou nou, li lé paré pou ékout sak nou pans, é mèm, chanj son désizion. Gard koman li la fé èk Miriam, lo sèr Moiz. Aèl èk Aaron la koz an mal su Moiz, lo roprézantan Jéova. Donk, an vré, Miriam té pou mank rèspé Jéova. Sé pou sa Jéova té an kolèr èk Miriam é la fé mont la lèp su èl. Aprésa, Aaron la ansupli Moiz fé in nafèr pou èl, é Moiz la ansupli Jéova géri aèl. Kosa Jéova la désid fé ? In moun orgéyé noré rès su son désizion. Mé pa Jéova ! Kom na poin inn ti tras lorgèy ché li, li la ékout Moiz é li la géri Miriam (Nonm 12:1-15).

⁷ Dan son fason ékout lo roi Ézékias osi, Jéova la fé mont ké li té pa orgéyé. Li la anvoy Izai pou di lo roi li té sa mor. Ézékias la plèr ansanm Jéova pou géri ali. Bondié la ékout la priyèr Ézékias èk jantiyès é li la lès ali viv ankor 15 zan (2 Roi 20:1, 5, 6). Jéova i konpran vréman bann zumin é kom na poin inn ti tras lorgèy ché li, li lé paré pou ékout azot.

8. Kèl zégzanp i fé mont ké Jézu lé rézonab ? (Mark 3:1-6).

⁸ Jézu i fé parèy son Papa. Kan li té su la tèr, Jézu la pran soin lé zot chak foi té posib. Par égzanp, li la géri domoun pandan lo saba, malgré ké bann chèf la rolijion té pa dakor èk sa parské zot té san kèr (lir Mark 3:1-6). Antank chèf lasanblé, Jézu i kontinié èt rézonab. Par égzanp, kan in moun dan lasanblé i fé in péché grav, Jézu fé mont la pasians é li lès lo moun lo tan chanjé (Rév. 2:2-5).

9. Koman nou pé pansé é aji d’in fason rézonab ? (agard osi bann zimaj).

⁹ Koman nou pé fé parèy Jéova ? Nou doi pran légzanp su Jéova pou aprann èt rézonab dan nout fason pansé é dan nout fason aji (Jak 3:17). Par égzanp, bann paran rézonab i lès pa zot marmay fé tout sak li vé, mé surtou zot i atand pa ké zot marmay i fé bann zafèr li gingn pa fé. Sé sa mèm nou oi dan lo zistoir Jakob dann Jénèz 33:12-14. Bann paran va fé mont zot lé rézonab kom Jéova, pou sa zot va pa konpar zot marmay ant inn é lot, é zot va pa rabès zot marmay. Bann zansien osi i doi èt rézonab. Koman zot i pé fé sa ? Par égzanp, in zansien va pa insis su son prop lidé, olèrk sa, li va suiv sak lé zot zansien i vé désid fé, tank lé pa kont sak la Bib i di (1 Tim. 3:2, 3). É nout tout, nou pé ésèy konpran sak lé zot i pans ou sak zot i rosan, mèm si nou oi pa lé choz parèy (Rom. 14:1). Lé vré, nout tout dan lasanblé i doi fé zéfor pou aoir la réputasion d’èt in moun rézonab (Fil. 4:5).

JÉOVA NA LA PASIANS

10. Koman Jéova la fé mont li na la pasians ?

¹⁰ Pétèt zot la romarké ké domoun orgéyé i èm pa atand. Sé lorgèy i rand azot komsa. Jéova li, li lé pa komsa dutou, é na poin pèrsone lé pasian kom li ! Par égzanp, dann tan Noé, Jéova la désid atand 120 zané avan détrui bann méchan (Jén. 6:3). Dukou, Noé la gingn fé grandi son bann marmay é konstrui larch èk son famiy. Plitar, Jéova la ékout Abraam èk pasians kan li té arèt pa poz kèstion su Sodom é Gomor, ké té sa èt détrui. In moun orgéyé noré répond ali : « Kisa ou lé ou, pou domand amoin sa ! » Mé kom Jéova lé pa orgéyé, li té pasian sanm Abraam (Jén. 18:20-33).

11. Dapré 2 Pièr 3:9, akoz Jéova i fé mont son pasians jordi ?

¹¹ Jordi osi Jéova i fé mont son pasians. Li atand lo moman li la choizi pou fini èk monn-la. Poukosa li atand ? « Parské li vé pa pèrsone i mor, mé li vé ké tout domoun i gingn ropanti azot » (lir 2 Pièr 3:9). Èsk’i vo lo kou Jéova i atand ? Oui ! Parské néna bann milion domoun la gingn lokazion vni son kamarad é nou èspèr ké na ankor in bonpé va fé parèy. Mé sèlman, son pasians na in limit. Jéova i èm domoun, mé li pèrmèt pa tout zafèr. Li va pa lès la méchansté dur pou toultan (Abak. 2:3).

12. Kosa i pous Jézu fé mont la pasians parèy Jéova ?

¹² Jézu i fé parèy son Papa. Pandan lontan, Jézu la pran légzanp su la pasians Jéova. Li la vu Satan rakont la mansonjri dési Jéova é son bann sèrvitèr (Jén. 3:4, 5; Job 1:11 ; Rév. 12:10). Jézu la vu in bonpé domoun pas dan tout kalité soufrans. Majine koman li la anvi « détrui bann zafèr ké lo Diab i fé » ! (1 Jan 3:8). Kosa i pous Jézu atand èk pasians ké Jéova i lès ali aji ? La rézon, sé ké Jézu i rokoné ké Jéova lé pli gran k’li é ké sé lo sèl k’i désid kansa la fin i doi arivé (Akt 1:7).

13. Koman Jézu la fé mont la pasians pou son bann zapot, é poukosa ?

¹³ Kan li té su la tèr, Jézu la fé mont la pasians osi ansanm son bann zapot. Par égzanp, chak foi banna té disput pou konèt kisa té pliméyèr, Jézu la jamé lès azot tonbé. Olèrk sa, li la kontinié èt pasian ansanm zot (Luk 9:46 ; 22:24-27). Li té sur ké banna noré chanjé èk lo tan. Èsk’i ariv aou répèt souvan lo mèm zérèr ? Alor, lé sur ou doi èt vréman kontan aoir in Roi ké lé pa orgéyé é ké lé pasian !

14. Koman nou pé èt plis pasian ?

¹⁴ Koman nou pé fé parèy Jéova ? Si nou vé aoir ankor plis lo mèm fason pansé é lo mèm fason aji Jéova, i fo nou fé zéfor pou aoir ‘lo mèm fason pansé lo Kris’ (1 Kor. 2:16). Koman nou pé mié konpran lo fason pansé lo Kris ? Na poin d’sékré. Nou doi lir bann Zévanjil. É apré, i fo nou pran lo tan pou réfléchi an profondèr su sak Jézu la fé é poukosa li la fé sa. Lé sur, nou doi osi domand Jéova pou ké li èd anou èt kom Jézu sétadir èt pasian é pa orgéyé. Plis nou nora lo fason pansé lo Kris, plis nou va èt kom Bondié : nou nora plis la pasians èk nou mèm é ansanm lé zot osi (Mat. 18:26-30, 35).

JÉOVA I FÉ IN KONT ÈK BANN TI MOUN

15. Done détroi légzanp k’i fé mont ké Jéova i èm bann ti moun (Psom 138:6).

¹⁵ (Lir Psom 138:6.) Mèm si li lé lo Mèt lunivèr, Jéova i fé vréman in kont èk bann ti moun. Sa lé tro joli ! Réfléchi in pé koman dépi lontan Jéova la toujour done lonèr bann ti moun. Pétèt nou rapèl mèm pa d’zot, mé i koz su zot dan la Bib. Par égzanp, Jéova la pous Moiz pou mèt lo non Débora dan la Bib. Sété èl la nénèn bann marmay dan la kaz Izaak èk Jakob, é sa, pandan 125 zané ! Mèm si nou koné pa gran choz su so madam fidèl-la, Jéova la fé an sort ké nou koné a kèl poin Jakob èk son famiy té èm aèl (Jén. 24:59 ; 35:8, lo ti not). Lontan apré, Jéova la choizi David pou èt lo roi Israèl, alork li lété rienk in jèn gardien mouton (2 Sam. 22:1, 36). Jus apré la nésans Jézu, Bondié la anvoy bann zanj oir bann gardien mouton pou fé konèt azot an promié ké lo Mési la nèt Bètléèm, é sa té in gran lonèr pou banna (Luk 2:8-11). É kan Jozèf èk Mari la amèn Jézu lo tanp, Jéova la fé konèt Siméon èk Ane kisa i lé son garson. Par sa, li la fé mont bann gramoun-la ké zot navé la valèr pou li (Luk 2:25-30, 36-38). É oui, « mèm si Jéova lé gran, li romark bann ti moun » !

16. Kan li té trèt lé zot, koman Jézu la fé parèy son Papa ?

¹⁶ Jézu i fé parèy son Papa. Kom son Papa, Jézu la done lonèr bann ti moun. Li la fé konèt bann « domoun sinp sinp ké lavé pa fé gran lékol » la vérité su lo roiyom Bondié (Akt 4:13 ; Mat. 11:25). Li la pa sèlman géri bann malad, mé li la fé mont banna osi ké li té èm é rèspèk azot (Luk 5:13). La nuit avan li mor, Jézu la lav lo pié son bann disip. Dabitud sa té lo travay bann sèrvitèr (Jan 13:5). É jus avan mont dann sièl, li la done tout son bann disip, é anou osi ansanm, lonèr pou fé lo travay lo pli inportan k’i égzis : èd domoun gingn la vi pou toultan (Mat. 28:19, 20).

17. Koman nou pé done lonèr lé zot ? (agard osi lo zimaj).

¹⁷ Koman nou pé fé parèy Jéova ? Nou done lonèr domoun kan nou fé konèt azot lo gayar nouvèl, é sa, kinport zot pasé, zot koulèr d’po ou zot lédukasion. Nou fé mont nou èm é nou rèspèk nout bann frèr é sèr kan nou mèt azot anlèr, é sa, kinport bann kapasité ou bann rèsponsabilité nou néna (Fil. 2:3). Jéova lé kontan kan nou pran pa nou su la otèr é kan nou « done lonèr lé zot an promié », é sa, kinport lo situasion (Rom. 12:10 ; Sof. 3:12).

18. Poukosa ou vé èt kom Jéova ?

¹⁸ Si nou fé zéfor pou fé parèy nout Papa dann sièl ké na poin inn ti tras lorgèy, nou sra plis rézonab, plis pasian é domoun sra alèz sanm nou. É nou va done lonèr lé zot kom Jéova. Oubli pa, kan nou va fé tout pou vni kom nout Bondié ké lé san lorgèy, sa va rand anou ankor plis présié pou li ! (Izai 43:4).