Сар те сведочина кеда користинаја количка или штанди баши литература

О сведочибе количкаја или штандеа баши литература сикавѓа пе сар шукар начин о искрена мануша те џанен о чачипе (Јован 6:44). Адалеске, о старешине сине охрабриме те организиринен те сведочинел пе ко тхана таро ленгоро собрание коте со накхена бут мануша. Адалеске со о количке баши литература пхиравена пе таро јекх тхан ко јавер, обично нане потреба те родел пе дозвола таро властија. Кој шај те учествуњел ко акава сведочиба? О објавителија со шај шукар те проценинен о буќа, со и тане претставителна хем со џанена сар шукар те керен лафи. Ка дикха со ваљани хем со на ваљани те керен о објавителија те шај те овен пошукар ки акаја служба.

Со ваљани те кере:

Ов љубезно хем поздравин е манушен со накхена. Несаве објавителија искрено асана хем љубезно поздравинена е манушен со накхена. Ако некој таро мануша дикхела ко постери тегани шај те вакере: „Шај слободно те ле нешто читибаске ако мангеа“.
Проценин кобор паше те терѓове узи количка. Ко несаве тхана о објавителија тане поуспешна кеда терѓовена паше узи количка. А јавера палем, терѓовена хари подур тари количка соске халиле кај ако тане паше узи количка, о мануша со накхена на осетинена пе слободна те лен песке литература. Кеда дикхеа кај некој авела попаше узи количка тегани трудин ту те почмине те кере леа лафи, аѓаар со ка пуче ле: „Дали некогаш размислинѓан башо акава пучиба?“
Користин и Библија кобор со шај побутер.
Објаснин сар шај те сикљовен тари Библија окола со лена литература проучибаске, сар со и о лил Што учи Библијата? Ако шај, ко тло таблет или мобилно телефони мукх ленге о видеоклипи Соске те сикљове тари Библија?
Секогаш кеда шај, роде контакт-информацие. Ако о мануш на бешела ко тумаро подрачје, пхер о формулари Те молиме, посети го ова лице (S-43) хем де е секретареске со посиг.

Со на ваљани те кере:

Ма ов агресивно, упорно хем ма терѓов узи количка сар несаво чувари.
Ма мислин кај ки акаја служба најважно тано те де со побутер литература. Кеда сиам ки служба, амари цел тани те почмина те сикава е манушен тари Библија, адалеске ваљани те трудина амен те кера ленцар лафи.
Ма терѓов англи количка, те на пханде ла хем ма кер бут лафи е објавителеа со и туја ки служба. Ако мора те јавине ту ко мобилно, најшукар ка овел те цхиде ту хари ки страна тари количка.
Ма дискутирин бут околенцар со противинена пе аменге. Ако некој почминела те вреџинел амен тегани ка овел шукар те цхида амен хем те џа ко јавер тхан.