Со вакерела и Библија баши нуклеарно војна?

Е светоске заканинела пе нуклеарно војна соске о светска силе кхедена са повише нуклеарно оружје. Е манушен иси лен причина те овен секириме соске кобор повише нуклеарно оружје иси, добором побари и опасност тари нуклеарно војна. О мануша дарана исто аѓаар кај ако јекх пхув користинела чак тикни нуклеарно бомба, адава ка уништинел о свето. О списание Bulletin of the Atomic Scientists вакерела кај амен живинаја „цело време ки дар тари нуклеарно опасност“.

Шај ли те почминел нуклеарно војна? Ако оја, дали амари планета ка ачхол? Хем сар те икљова ко крајо е секирацијаја кај шај те авел џи ки нуклеарно војна? Со вакерела и Библија?

Ки акаја статија

• Дали и Библија вакерѓа англедер кај ка овел нуклеарно војна?

• Дали о Девел ка дозволинел нуклеарно војна?

• Дали амари планета ка ачхол?

• Сар шај те икљове ко крајо ако иси тут „нуклеарно анксиозност“?

• Дали о Армагедон тано нуклеарно војна?

• Саво решение дела и Библија башо војне?

• Дали о библиско лил Откровение керела лафи баши нуклеарно војна?

Дали и Библија вакерѓа англедер кај ка овел нуклеарно војна?

И Библија конкретно на спомнинела нуклеарно војна. Сепак, и закана тари нуклеарно војна тани последица таро ставија хем о настанија кола со и Библија пророкујнѓа лен.

Те дикха сар акала библиска стихија тане поврзиме адалеа со авдиве случинела пе ко свето:

Библиска стихија: О ученикија пучле е Исусе: „Кова ка овел о знако баши тли присутност хем башо крајо акале светоскоро?“ О Исус одговоринѓа: „Ка боринел пе народо против народо, хем царство против царство“ (Матеј 24:3, 7).

Светска настанија: О државе машкар коленде сој хем окола со иси лен или со шај те керен нуклеарно оружје, са повише тане ко конфликт јавере државенцар хем користинена оружје.

„Ко последна берша, о свето овела са понасилно, са повише хем повише иси конфликтија“ (Проекти лоцирибаске вооружена конфликтија хем податокија башо настанија [ACLED]).

Библиско стихо: „Ко време е крајоскоро, о цари таро југ ка боринел пе [е цареа таро север]“ (Даниел 11:40).

Светска настанија: О противничка народија хем ленгере сојузникија боринена пе, јавере лафенцар натпреваринена пе башо адава кој те овел најмоќно, баш сар со пророкујнѓа и Библија. Иако о авдисутне најбаре нуклеарна силе на нападинена пе јекх јекхеа директно, ола понадари да произвединена са повише хем повише нуклеарно оружје.

„Ко последна деш берш дикхаја кај са повише иси конфликтија машкар о државе, машкар коленде со иси случаија коте со о главна силе поддржинена о спротивна стране“ (Програма тари Упсала податоконге башо конфликтија [UCDP]).

Библиска стихија: „Ко последна диве ка овел бут пхаро време. Соске о мануша... нане те овен спремна башо било саво договор, клеветникија, нане те контролиринен пе, сурова“ (2. Тимотеј 3:1-3).

Светска настанија: Исто сар бут мануша авдиве, о светска водачија да бут пути на сложинена пе јекх јекхеа. Хем наместо ко мирно начин те аракхен решение башо пумаре разлике, несаве пробинена те решинен о конфликтија заканибаја или силаја. Асавке постапке панда повише бајрарена о ризик баши нуклеарно војна.

„Ако на аракхела пе начин сар те соработинел пе јекх јекхеа, о конфликтија ка овен са поопасна“ (С. Саран хем Џ. Харман, Светско економско форум).

Дали о Девел ка дозволинел нуклеарно војна?

И Библија на вакерела. Ама ој вакерела кај ко амаро време о мануша бут ка даран, јавере лафенцар ка случинен пе буќа со ка даравен (Лука 21:11). Јекх пример башо адава тано о фрдибе атомска бомбе ки Дујто светско војна. И Библија објаснинела соске о Девел дозволинела војне. Те шај те дознајне повише, дикх о видеоклипи Соске о Девел панда мукхела те овел о лошнипе хем о муке?

Дали амари планета ка ачхол?

Оја. Чак ако о мануш палем користинела нуклеарно оружје, о Девел нане те мукхел и ситуација те овел добором лошно со ка уништинел пе цело свето. И Библија откринела аменге кај амари планета на само со нане те овел уништими него хем ка овел е манушенгоро кхер засекогаш.

Несаве мислинена кај ки иднина ки амари планета ка живинен само хари мануша кола со ка мучинен пе те преживинен ки јекх пусто пхув, загадими таро јекх нуклеарно отпад. И Библија сикавела исто аѓаар кај секоја штета со керѓе о војне е пхувјаке, ка овел целосно поправими.

Амаро Створители керѓа и пхув те овел ла јекх посебно способност коркори те шај те обновинел пе. Освен адава, о Девел ка користинел пли моќ те шај те обновинел и пхув, ој засекогаш ка овел сар јекх бут шужо кхер е манушенге (Псалм 37:11, 29; Откровение 21:5).

Сар шај те икљове ко крајо ако иси тут „нуклеарно анксиозност“?

Несаве манушен шај иси лен „нуклеарно анксиозност“, со значинела „дар тари нуклеарно војна хем таро лакере последице“. О библиска ветувања хем советија шај те поможинен асавкенге те на даран добором. Сар?

И Библија вакерела кај е пхувја хем околен со живинена ки лате аџикерела бут шужи иднина. Адава со ка дознајна нешто повише баши акаја надеж, која со ки Библија тани споредими котваја, шај те поможинел аменге те ова похари секириме (Евреија 6:19). Исто аѓаар, шај те ова похари анксиозна аѓаар со ка живина диве дивеске хем нане превише те размислина со са шај те случинел пе ки иднина. Сар со вакерѓа о Исус, „секова диве иси ле пле проблемија“ (Матеј 6:34).

Уствари, важно тано секова јекх те грижинел пе башо пло емоционално састипе. Адава шај те кера ле аѓаар со нане бизи потреба бут те читина, те шуна или те дикха информацие кола со ки аменде бајрарена о секирацие, сар на пример, дискусие, претпоставке хем мислења башо адава со случинела пе е најневе нуклеарно оружјеа. Ама адава на значинела кај на сием свесна баши реалност. Наместо адава, кераја са со шај те на размислина превише башо буќа упро кола со нане амен нисави контрола хем кола со шај никогаш нане те случинен пе.

Барем несаво време избегин лошна вестија хем концентририн тут ко позитивна буќа ко тло живото.

Адава со ка дознајне нешто повише башо е Девлескере ветувања шај те дел тут надеж, радост хем андруно мир.

Дали о Армагедон тано нуклеарно војна?

Несаве мислинена кај о Армагедон тано глобално нуклеарно војна која со ка анел катастрофална последице.

Ама ки Библија е лафеа „Армагедон“ мислинела пе ки војна машкар о Девел хем „о царија таро цело свето“, јавере лафенцар о манушикане владеa (Откровение 16:14, 16). Ко Армагедон нане те овен погодиме о мануша со нане крива, сар со сине случај ки јекх нуклеарно катастрофа. Наместо адава, ко Армагедон о Девел ка уништинел само е лошнон, хем адава ка анел чачутно мир хем сигурност (Псалм 37:9, 10; Исаија 32:17, 18; Матеј 6:10).

Саво решение дела и Библија башо војне?

О Јеховаb о Девел ка сикавел пли моќ упро народија со водинена војне аѓаар со ка чхивел крајо башо ленгере конфликтија хем ка уништинел ленгоро оружје. Адава ка керел ле преку пло Царство — јекх небесно влада која со ка лел и власт упри цели пхув (Даниел 2:44).

Кеда ка владинел е Девлескоро Царство о мануша ка сикљон те живинен ко мир хем ко јекхипе. Адалеске со ка овел само јекх влада упри цели пхув, нане више те овен конфликтија машкар о народо, о мануша више нане те сикљовен те боринен пе (Михеј 4:1-3). Аке сар и Библија опишинела адава време: „Секова јекх ка бешел тели пли дракх хем тели пли смоква хем никој нане те даравкерел лен“ (Михеј 4:4).