АЧХОВЕН ЏАНГАВДЕ!
И пхув уништинела пе — Со вакерела и Библија башо адава?
„Сигате џаја џи ки климатско катастрофа. Баре дизја тело пани. Татипе сар никогаш англедер. Страшно невреме. Ко бут тхана нане те овел пани. Милиоња растенија хем животне више нане те постојнен. Акава нане нешто измислимо хем на бајрараја о буќа. Акава вакерена аменге о научникија кај ка овел сар резултати тари амари енергетско политика“ (Говор таро Антонио Гутереш, о Генерално секретари таро Обединета нацие, башо извештај таро 4 април 2022 берш кова со денѓа ле о Меѓународно панели башо климатска промене).
„О научникија вакерена кај о берша со авена и климатско промена ка уништинел скоро са о 423 национална паркија [ко САД], адалеске сој тане осетлива кеда уштена о температуре. О лошна буќа со шај те случинен пе тане сар о катастрофе коленге со читинаја ки Библија: јаг хем поплава, мразо со мукхљола, бајрола о ниво таро море хем баро татипе“ („О баре поплаве ко Јелоустоун — знако башо кризе со ка авен“, The New York Times, 15 јуни 2022 берш).
Шај ли акала проблемија те решинен пе? Ако оја, кој шај те решинел лен? Дикх со вакерела и Библија.
И Библија англедер вакерѓа кај ка овел аѓаар
И Библија вакерела кај о Девел „ка уништинел околен со уништинена и пхув“ (Откровение 11:18). Таро акава стихо сикљоваја трин буќа:
1. О мануша ки бари мера ка уништинен и пхув.
2. Ка авел диве кеда и пхув повише нане те овел уништими.
3. О Девел, а на о мануша, ка решинел о еколошка проблемија ки пхув.
И иднина амаре планетакири тани сигурно
И Библија вакерела кај „и пхув ка ачховел засекогаш“ (Проповедник 1:4). О мануша секогаш ка живинен ки лате.
„О праведна мануша ка наслединен и пхув хем ка живинен вечно ки лате“ (Псалм 37:29).
О еколошка проблемија тари амари планета ка овен целосно решиме.
„Ка радујнен пе и пустина хем и пхув бизо пани, ка радујнел пе и пхув сој пусто хем ка цветонел сар шафрани“ (Исаија 35:1).